Маррийот (Marriott) меһманханиси дуня уйғур қурултийиға йиғин зали бәрмигәнлики үчүн кәчүрүм сориди

Мухбиримиз ирадә
2021-11-19
Share
Маррийот (Marriott) меһманханиси дуня уйғур қурултийиға йиғин зали бәрмигәнлики үчүн кәчүрүм сориди Д у қ рәисликигә қайта сайланған долқун әйса әпәнди, д у қ ниң 7-нөвәтлик қурултийида сөздә. 2021-Йили 14-ноябир. Пирага, чехийә.
Photo: RFA

Дуняда 130 дин артуқ дөләттә шөбиси болған вә дунядики әң чоң меһмансарайлар зәнҗири һесаблинидиған маррийот (Marriott) меһманханисиниң чехийә пайтәхти пирагадики шөбиси дуня уйғур қурултийиниң йиғиниға зал беришни рәт қилған. Вәқә бүгүн ашкариланғандин кейин ахбаратларда вә иҗтимаий таратқуларда зор инкас қозғиди.

Дуня уйғур қурултийиниң программа йетәкчиси зумрәтай әркинниң бизгә ейтишичә дуня уйғур қурултийи 11-айниң 12-күнидин 14-күнигичә пирагада өткүзүлгән йиғини ечилиштин бурун бу шәһәргә җайлашқан бир қанчә меһманханилар билән көрүшүп, қурултайни ечиш үчүн мувапиқ меһманхана издигән вә маррийот меһманханисини көрүп келиши үчүн бир мәсул кишини әвәткән.

Дуня уйғур қурултийиға вәкил болуп барған киши дәсләптә бу йиғинниң ким тәрипидин ечилидиғанлиқини ейтмиған. У меһманханиниң йиғин заллирини айлинип көрүп болғандин кейин андин меһманхана мәсулиға өзиниң дуня уйғур қурултийиға вәкил болуп кәлгәнликини, бу йиғинниң дуня уйғур қурултийиниң йиғини икәнликини ейтқан. Нәтиҗидә узун өтмәйла маррийотниң пирагадики меһманханисидин бу йиғинға зал берәлмәйдиғанлиқи һәққидә хәт тапшурувалған. 1-Өктәбир күни йезилған бу елхәттә мундақ дейилгән: "бүгүн меһманханимизни зиярәт қилғанлиқиңиз үчүн көп рәһмәт. Бәхткә қарши, мән сизгә бизниң силәргә зал тәминлийәлмәйдиғанлиқимизни уқтурмақчимән. Биз ширкәт башқуруш оргини билән бу һәқтә мәслиһәтләштуқ. Сиясий битәрәпликимиз сәвәбидин, биз бу хилдики сиясий темилиқ паалийәтләргә сорун берәлмәймиз. Вақтиңиз вә чүшинишиңизгә йәнә бир қетим рәһмәт".

Һалбуки зумрәтай әркинниң дейишичә, уларниң сиясий йиғинларға орун бәрмәймиз, дегини пут тирәп туралмайдиған сәвәб икән.

Маррийот меһманханисиниң бу һәрикити ашкариланғандин кейин иҗтимаий таратқуларда зор инкас қозғиди. Нурғун кишиләр маррийотниң һәрикитини қаттиқ әйиблиди.

Кишилик һоқуқни көзитиш тәшкилати хитай ишлири директори софи ричардсон бүгүн бизгә қилған сөзидә маррийотниң һәрикити "айримичилиқ" дәп тәнқидлиди. У мундақ деди:

"маррийотниң һәрикити интайин қорқунчақларчә қилинған, кәмситиш характерлик бир һәрикәт вә у қаттиқ әйиблинишкә тегишлик. Маррийот өзиниң бир һөкүмәт әмәсликини унтуп қалмаслиқи керәк. Улар мулазимәт кәспи билән шуғуллинидиған бир саһә болуш сүпити билән бундақ кәмситиш һәрикәтлиридин узақ туруши керәк иди. Әмма билгиниңиздәк бу, уларниң тунҗи хаталиқи әмәс. Илгири тибәтләргиму улар охшаш хаталиқни садир қилған".

Биз вәқәдин кейин маррийот меһманханисиниң вәқә һәққидики инкасини сорап беқиш үчүн уларниң баш штаби билән алақиләштуқ. Меһмансарайниң ахбаратқа мәсул башқармисиниң мудири бән герв бизгә қайтурған язма инкасида төвәндикиләрни дегән:

"маррийот меһманханиси һәммә кишини қарши алиду. Биз меһманханичилиқ кәспий тиҗарити билән шуғуллинимиз вә бу сәвәбтин дуняниң һәр қайси җайлиридики вә һәр саһәдики пәрқлиқ көз қарашларға вәкиллик қилидиған кишиләрни охшаш қарши алимиз. Бу меһманханиниң игилик башқуруш гурупписи бизниң юқиридики сияситимизгә мас кәлмигән һәрикити сәвәбидин сиз дегән бу гуруппа билән алақилишип кәчүрүм сориған. Бизму бу меһманханидики хизмәтчиләрни меһманханимизниң узун йиллиқ әнәнимиз бойичә тәрбийәләштин өткүзүш улар билән һәмкарлишиватимиз".

Дуня уйғур қурултийи программа йетәкчиси зумрәтай әркинниң бизгә ейтишичә, вәқә иҗтимаий таратқуларда зор инкас қозғап кәткәндин кейин пирагадики маррийот меһманханиси һәқиқәтән дуня уйғур қурултийиға вакалитән барған киши билән алақилишип кәчүрүм сориған вә өзлириниң дуня уйғур қурултийи башлиқи долқун әйса әпәнди билән көрүшүшни арзу қилидиғанлиқини билдүргән.

Маррийот ширкитиниң пирагадики йиғинға зал беришни рәт қилишиниң арқисида хитай һөкүмитиниң бесими барму яки улар буни хитайниң чишиға тегип қоюштин әнсирәп қилғанму буниси ениқ әмәс. Әмма софи ханим маррийотниң бу һәрикитиниң қануний җәһәттин һәм җамаәт тәрипидин тәнқидлиниши керәкликини ейтти. У мундақ деди: "мән чехийәниң кәмситиш һәрикәтлиригә мунасивәтлик қанунларниң қандақлиқини билмәймән. Әмма бирәр орган маррийот меһманханисиниң кәмситиш һәрикитини әйибләп дава ачса һәқиқәтәнму диққәт қозғиған болатти. Андин йәнә истемалчилар бундақ мәсилиләргә диққәт қилиши, айримичилиқ қиливатқан мушундақ ширкәтләрни йәнә давамлиқ қоллаймизму дегән мәсилә үстидә яхши ойлишиши керәк. Йәнә бир җәһәттин, биз бу ширкәт вәқәдин кейин қандақ позитсийәдә болди, буни түзитиш үчүн қандақ иҗабий һәрикәтләрни қилди дегәнләрни ойлишишимиз керәк".

Мәзкур вәқә хитай һөкүмитиниң хәлқарадики тәсир көрситиш вә бу арқилиқ пикир әркинликини қамал қилиш һәрикитиниң бир парчиси сүпитидә зор диққәткә еришти. Иҗтимаий таратқуларда нурғун инкаслар чүшти һәтта пирага шәһириниң шәһәр башлиқи издәник херибму тивиттерда инкас қайтуруп "маррийот меһманханиси өзлириниң сиясәткә арилашмайдиғанлиқини илгири сүрүп туруп уйғур дияспорасиға сорун һазирлашни рәт қилипту. Мән булардин қаттиқ номус қилдим. Хитайниң җаза лагерлирини, у йәрдики қейин –қистақ вә мәҗбурий туғмас қилиш һәрикәтлирини мушундақ васитилик қоллаш һәрикәтлири бүгүнкидәк пуқралар җәмийтидә әсла йүз бәрмәслики керәк" дәп язған.

Диққәт қозғайдиғини у тивиттердики юқиридики сөзигә "мән әмди маррийотта турмаймән" йәни "Iwontstaymarriot#" дегән хәштәгни қолланған.

Мәлум болушичә, маррийот хәлқара ширкити 2018-йили меһманханиниң бир рай синаш қәғизидә тибәт, тәйвән, хоңкоң вә макав (авмен )ни хитайниң земини әмәс бәлки мустәқил дөләтләр қатариға тизип қойғанлиқтин хитайниң ғәзипигә вә иқтисадий өч елишиға учриғандин кейин хитайдин кәчүрүм сорашқа мәҗбур болған. Улар әйни чағда елан қилған баянатида "биз хитайниң игилик һоқуқи вә земин пүтүнлүкини бузидиған бөлгүнчи гуруппиларни қоллимаймиз" дегән. Йәнә шу охшаш йилда маррийот меһманханисиниң бир хизмәтчиси маррийотниң тивиттердики рәсмий һесаби арқилиқ тибәтни қоллайдиған бир гуруппиниң йолланмисиини "like" (яхши көрүш бәлгсс )қилғанлиқи үчүн уни иштин қоғлиған. Маррийотниң бу һәрикитиму әйни чағда қаттиқ әйибләшкә учриған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт