“Matem küni” de yawropa elliride xitaygha qarshi namayishlar ötküzüldi
2021.10.01

1-Öktebir küni gérmaniye, bélgiye, norwégiye, en'gliye qatarliq döletlerde “Matem küni” munasiwiti bilen xitaygha qarshi namayishlar ötküzüldi.
D u q bundin 10 yillar ilgiri 1949-yili Uyghur diyari xitay kommunist armiyesi teripidin bésiwélin'ghan we xitay xelq jumhuriyiti qurulghan 10-ayning 1-künini “Matem küni” dep jakarlighan hemde her yili 1-öktebirde “Matem küni” munasiwiti bilen dunya miqyasida xitaygha qarshi namayish ötküzüshni teshebbus qilip kelgenidi. Bu teshebbusning rohigha bina'en bügün 1-öktebir küni dunyaning herqaysi elliride xitaygha qarshi namayishlar ötküzüldi. Jümlidin yawropadiki gérmaniye, bélgiye, norwégiye, en'gliye qatarliq döletlerdimu herxil kölemde namayishlar élip bérildi.
Gérmaniye paytexti bérlindiki xitay bash elchixanisining aldida élip bérilghan namayishqa 100 ge yéqin adem qatnashqan. Namayishta gérmaniyediki kishilik hoquq teshkilatlirining wekilliri we Uyghurlar nutuqlar sözlep, xitay hakimiyitining 72 yilliq asaretlik zulumi üstidin shikayetler qilghan. Namayish jeryanida xitayning sherqiy türkistandiki éghir jinayetlirini pash qilip nutuq sözligen d u q yashlar komitétining re'isi, qurultay bérlin ishxanisining mudiri gheyur qurban ependi neqmeydandin ziyaritimizni qobul qilghanda, bu namayishqa köpligen teshkilatlarning ishtirak qilghanliqini tilgha aldi.
1-Öktebir yene gérmaniyening myunxén shehiridiki xitay konsulxanisi aldidimu namayish élip bérilghan. Namayishchilar ay yultuzluq kök bayraqlarni, xitay zulumini eks ettüridighan türlük lozunkilarni kötürüp, 72 yilliq qanliq tarixni eyiblep jarangliq sho'arlarni towlap, konsulxana aldini lerzige salghan. D u q mu'awin re'isi perhat muhemmidi ependi neqmeydandin bu qétimqi namayish toghrisida bizni melumatlar bilen teminlidi.
1-Öktebir küni norwégiyening oslo shehiridimu namayish élip bérilghan. Norwégiye Uyghur komitétining re'isi, “Uyghur edliyesi arxip ambiri” ning mudiri bextiyar ömer ependi bu heqte toxtalghanda, oslodiki namayishning hayajanliq bir keypiyatta ötküzülgenlikini eskertti.
Bélgiye paytexti biryussélda 1-öktebir ötküzülgen namayish yawropa ittipaqi binasi aldida élip bérilghan. Namayishchilar herxil tillarda jarangliq sho'arlarni towlap, Uyghurlargha azadliq, xitay hakimiyitige zawalliqlar tilep etraptiki ammining diqqitini jelp qilghan.
En'gliye paytexti londonda bügün élip bérilidighan namayish kech sa'et 18:30 gha orunlashturulghan. D u q london ishxanisining mudiri rehime xanimning bildürüshiche, bu namayishqa Uyghurlar, tibetler, xongkongluqlardin bashqa yerlik kishilik hoquq teshkilatlirining ezaliri bolup köp sanda kishi qatnishidiken.
D u q rehberlirining bildürüshiche, 2-öktebir küni firansiye paytexti parizhda yene “Uyghur irqiy qirghinchiliqigha qarshi yürüsh” namliq zor kölemlik birleshme namayish élip bérilidiken.