Майк помпейо американиң уйғур мәсилисини б д т омуми йиғинида оттуриға қоюши мүмкинликини билдүрди

Мухбиримиз әркин
2019-09-07
Елхәт
Пикир
Share
Принт
Америка дөләт ишлири министири майк помпйо «америка авази»ниң телевизийә зияритидә, 2018-йили 19-июл
Америка дөләт ишлири министири майк помпйо «америка авази»ниң телевизийә зияритидә, 2018-йили 19-июл
VOA

Америка ташқи ишлар министири майк помпейо американиң уйғур мәсилисини б д т омуми йиғинида оттуриға қоюп, башқа дөләтләрни хитайниң уйғур мусулманлириға тутқан муамилисигә диққәт қилишқа чақириши мүмкинликини билдүргән. Әгәр дегәндәк америка уйғур мәсилисини б д т омуми йиғинида оттуриға қойса, бу, уйғур мәсилисиниң тунҗи қетим б д т омуми йиғинида тилға елиниши болуп қалиду.

Ройтерс агентлиқиниң хәвәр қилишичә, майк помпейо бу сөзләрни 6‏-сентәбир күни кансас штатлиқ университетида нутуқ сөзлигәндә тәкитлигән. У, америка хитайниң уйғурларни бастурушиға хатимә беришни қандақ ишқа ашуриду? дегән соалға җаваб берип: ««биз сентәбирниң 3 ‏-һәптиси б д т омумий йиғиниға қатнишимиз. Биз бирмунчилиған йиғилишларни өткүзимиз. Бу йиғилишларда биз башқа дөләтләрни буниңға иштирак қилип, бизгә ярдәмдә болушини қолға кәлтүрүшкә тиришимиз» дегән.

У йәнә: «биз бу кишиләрниң (уйғурларниң) әркинликини истәймиз. Биз хитайниң нурғун хирислириға дуч келиватимиз. Әмма бу мәсилә, бу кишиләрниң тартивелишқа болмайдиған түп һәқ-һоқуқ мәсилисидур» дегән.

Ройтерсниң хәвиридә қәйт қилинишичә, майк помпейо кансас штатлиқ университетида бурун қилған уйғурлар һәққидики сөзини йәнә тәкитләп; «хитайдики уйғур вә башқа мусулманларға тутулған муамилә бу әсирдә йүз бәргән дунядики әң еғир дағ» дәп көрсәткән. 

Помпейониң қәйт қилишичә, бу йәрдики дәпсәндичиликниң көлими наһайити зор болуп, «униңдики қийинчилиқ пүтүн дуняни буниңға қарши сәпәрвәр қилиш» икән. У йәнә, өзлириниң бу җәһәттә һазирға қәдәр бәзи утуқларға еришкәнлики, лекин буниң йетәрлики әмәсликини, нөвәттики мәсилә башқиларни сәпәрвәр қилип вә хитай һөкүмити билән һәмкарлишип, хитай һөкүмити вә коммунистик партийәсини «бу ишниң уларниң мәнпәәтигә пайдилиқ әмәслики», «башқа инсанларға бундақ муамилә қилишниң тоғра әмәсликигә қайил қилиш» икәнликини тәкитлигән. 

Ройтерсниң билдүрүшичә, майк помпейо йәнә хитайниң «бу лагерлар кишиләрни тәрбийиләп, уларниң радикаллиқ идийисини юқтурувелишидин қоғдайду» дегән сәвәбини рәт қилған. 

Америка һөкүмитиниң илгири сүрүшичә, нөвәттә 800 миңдин 2 милйонғичә уйғур, қазақ вә башқа аз санлиқ мусулман милләтләр бу лагерларда тутуп турулмақта икән.

Пикирләр (0)
Share
Толуқ бәт