Яқуп өмәроғлу: «‹хәлқаралиқ мәһмуд қәшқәри һекайә йезиш мусабиқиси' гә уйғурларниңму қатнишишини қарши алимиз!»

Ихтиярий мухбиримиз әркин тарим
2020-09-09
Елхәт
Пикир
Share
Принт
Уйғур филологи мәхмут қәшқириниң мәқбәриси. 2015-Йили 11-сентәбир, опал.
Уйғур филологи мәхмут қәшқириниң мәқбәриси. 2015-Йили 11-сентәбир, опал.
wikipedia.org

2008-Йилида мәһмуд қәшқәри туғулғанлиқиниң 1000 йиллиқи мунасивити билән түркийә явро-асия язғучилар җәмийити «хәлқаралиқ мәһмуд қәшқәри һекайә йезиш мусабиқиси» тәсис қилған иди.

Мәзкур мусабиқиниң 6-нөвәтлики һазир рәсмий башланди. явро-асия язғучилар җәмийитиниң рәиси яқуп өмәроғлиниң ейтишичә, бу қетимқи мусабиқиниң тема таллиши әркин болуп, қатнашқучилар халиған темини халиған түркий тилида һекайә йезип әвәтсә болидикән. Бу мусабиқигә қатнишишни халайдиғанлар язған һекайилирини 11-айниң 15-күнигичә әвәтсә болидикән. Мусабиқигә әвәтилгән һекайиләр баһалинип, 2020-йили 12-айниң 15-күнигичә елан қилинидикән. Мусабиқиниң хәлқаралиқ мукапат тарқитиш мурасими 2020-йили 12-айда өткүзүлидикән. яқуп өмәроғли бу мусабиқиниң түрк дунясиға ортақ һекайә йезиш мусабиқиси икәнликини, шуңа уйғурларниңму бу мусабиқигә актиплиқ билән қатнашса болидиғанлиқини билдүрди.

Биз «мәһмуд қәшқәри һекайә йезиш мусабиқиси» тоғрисида техиму тәпсилий мәлумат елиш үчүн бу мусабиқини уюштурған явро-асия язғучилар җәмийитиниң башлиқи яқуп өмәроғлу билән сөһбәт елип бардуқ. У алди билән бу һекайә йезиш мусабиқисиниң шәртлири тоғрисида тохтилип, мундақ деди: «бу йил ‹мәһмуд қәшқәри һекайә йезиш мусабиқиси' ниң 6-нөвәтликини өткүзүватимиз. Тунҗи қетимлиқи мәһмуд қәшқәри туғулғанлиқиниң 1000-йили болған 2008-йилида өткүзүлгән иди. Мәһмуд қәшқәри түркий тиллири үчүн зор төһпә қошқан муһим шәхс болғачқа, униң намида 2 йилда бир қетим өткүзүлүватиду. Шу йилдин бери давамлаштуруватимиз. Бу йил 6-нөвәтлики башланди. Қизиққучилар уйғур тилидиму һекайә йезип, мусабиқигә қатнашса болиду.»

Мәзкур мусабиқини оттура асия түркий җумһурийәтлири вә дуняниң һәрқайси җайлиридики түркий милләтләрму әза болған мәркизи әнқәрәдики «түрксой», йәни «түрк күлтүри вә сәнәтлири тәшкилати» билән «явро-айса язғучилар уюшмиси» ортақ уюштурған болуп, уларниң тор бетидики еланда қатнашқучиларниң төвәндики шәртләргә уйғун болуши керәклики йезилған: 1-һекайиләр kmahmut2020@gmail.com Дегән адресиқа әвәтилсә болиду; 2-мусабиқигә әвәтилидиған һекайиләр бурун һечқандақ бир мусабиқигә әвәтилмигән болуши, һәр қандақ бир йәрдә елан қилинмиған болуши керәк; 3-мусабиқиниң тема таллиши әркин болуп, һәрқандақ темида язса болиду; 4-қатнашқучилар әң көп икки һекайә билән қатнашса болиду. Һекайиниң хәт сани миңдин он миң хәткичә болса болиду; 5-һекайиниң үстигә қатнашқучиниң пәқәтла ләқәми йезилиду. Һекайәни язған кишиниң һәқиқий кимликини билдүридиған нәрсиләрни йезишқа болмайду, язса мусабиқигә қатнишиш һоқуқи бикар қилиниду; 6-мусабиқигә қатнашқучи кимликиниң көпәйтилгән нусхисини, өй адресини, қисқичә тәрҗимали, тәхәллуси вә бир тал фото сүритини айрим әвәтиши керәк; 7-һекайә компийоторда 12 поинтлиқ қилип йезилиши керәк; 8-мусабиқигә әвәтилгән һекайә қайтуруп берилмәйду; 9-мусабиқидә мукапатқа еришкән һекайәләрни елан қилиш һоқуқи «явро-ася язғучилар җәмийити» гә аит болиду.

Мутәхәссисләрниң баян қилишичә бүгүн дуняда 40 әтрапида түркий тили бар икән. «Хәлқаралиқ мәһмуд қәшқәри һекайә йезиш мусабиқиси» гә түрк дунясиниң һәр қайси җайлиридики түркий тиллиқ кишиләр өз ана тилида һекайә йезип қатнашса болидикән.

Доктор яқуп өмәроғлу бу мусабиқиниң әң муһим алаһидиликлиридин бириниң һекайиләрни һәрқандақ бир түркий тилида язса болидиғанлиқи икәнликини баян қилип, мундақ деди: «бу түркий хәлқләр ичидә өткүзүлидиған бирдин-бир хәлқаралиқ мусабиқә. Бу мусабиқиниң сиртида пәқәтла түркий тиллирида өткүзүлидиған бундақ бир мусабиқә йоқ дәп ойлаймән. ‹Диван луғәт түрк' (түркий тиллар дивани) намлиқ бу әсәр пүтүн түркий милләтләрниң ортақ инсиклопедийәси. Бу мусабиқә мәһмуд қәшқәриниң намида өткүзүлгән мусабиқә болғачқа, қатнашқучилар түркий тилларниң һәрқандақ биридә һекайә йезип әвәтсә болиду.»

Доктор яқуп өмәроғли уйғур дияридики язарларниң һекайә йезип әвәтиш мумкинчилики йоқ болсиму, әмма чәтәлләрдики уйғурларниң бу мусабиқигә актип қатнашса болидиғанлиқини, уйғур тилида һекайә йезип әвәтсиму болидиғанлиқини ейтип, мундақ деди: «қәйәрдә туруватқан уйғурлар болса болсун, уйғур тилида өзи халиған темида һекайә йезип бизниң елхәт адресимизға әвәтсә болиду. Һекайә әвәткүчиниң чоқум шәрқий түркистанда туруватқан болуши керәк дәйдиған бир шәртимиз йоқ. Шәртимиз уйғур тилида һекайә язалайдиған болуш, йәни уйғур тилида һекайә йезип бизниң елхәт адрәсимизша әвәтсила болиду. Биз шуни үмид қилимиз.»

Пикирләр (0)
Share
Толуқ бәт