Kent sékrétari: "Buyruqqa asasen öyümning témidiki méhrab shekillik oyuqni töt chasigha özgerttim"

Muxbirimiz shöhret hoshur
2019-07-03
Élxet
Pikir
Share
Print
Uyghur aptonom rayonidiki lagérlarni közitip kéliwatqan chet'eldiki xitay közetküchi shawén jang öz maqaliside qoyghan kériye héytgah jamesining süriti. 2019-Yili 2‏-aprél.
Uyghur aptonom rayonidiki lagérlarni közitip kéliwatqan chet'eldiki xitay közetküchi shawén jang öz maqaliside qoyghan kériye héytgah jamesining süriti. 2019-Yili 2‏-aprél.
Social Media

Melum bolushiche, xitayning "Diniy esebiylikke qarshi turush" namidiki siyasiy boran-chapquni meschitlerni örüsh, meschit munarlirini yiqitish basquchidin ötüp ahalilerning öy-imaretliridiki méhrab we hilal ay shekillirinimu aman qoymighan.

Ötken hepte ijtima'iy taratqulardiki bir widiyoluq uchurda Uyghur rayonining melum bir jayida bir ayalning öz öyining torusidiki lim yaghachqa neqishlen'gen neqishlerni gürjek bilen soyup chiqiriwatqanliqi körsitilgen. Uning aldida ra'iyomizgha kelgen inkaslarda ghuljining herqaysi yéziliridiki öy-imaretlerning milliy pasondiki neqishlirining tökülüwatqanliqi melum qilin'ghan idi.

Xotendiki bir kent sékrétarining delillishiche, bulturdin bashlap méhrab shekillik körünüshlermu "Diniy esebiylikning alamiti" dep qarilip, ahalilerning öy-imaretlirige neqishlen'gen méhrablar tüzliwétilgen yaki töt chasa sheklige keltürülgen.

Qeshqerdiki bir kent ayallar mudirimu özining mehellide "Diniy esebiylikni yoqitish" heqqide teshwiqatqa yétekchilik qiliwatqanliqini we teshwiqatida öy-imaretlerdiki méhrab sheklini yoqitishning zörürlükini chüshendürüwatqanliqin'i bayan qildi. Uning déyishiche, nöwette u wezipe ötewatqan tewelikte öy-imaretlerdiki méhrab qatarliq diniy tüs alghan shekil we körünüshler teltöküs yoqitilghan.

Xotendiki mezkur kent sékrétari öz öyining témigha ikki yil burun belgilik miqdarda pul xejlep méhrab neqishligenlikini, bulturgha kelgende yuqirining uqturushi bilen bu shekilni buzup tashlighanliqini ashkarilidi. Uning déyishiche, ilgiri mexsus hünerwen teklip qilip neqishligen bu méhrabni bu yil öz qoli bilen buzup tashlighan. Andin saqchi we kadirlardin teshkillen'gen bir xizmet guruppisi uning öy témidiki bu özgirishni tekshürüp ötküzüwalghan. Bu sékrétar yene tam we tüwrükliridiki méhrab we hilal ay shekilliri yoq qilinmighan bir qisim öy-imaretlerning pütünley chéqiwétilgenlikini tilgha aldi. U yene nöwette mehelle-kochilarni aylan'ghanda héch bir öy-imaret we qurulushlarda méhrab, munar we hilal ay shekillirini uchratqili bolmaydighanliqini bayan qildi.

Toluq bet