Biryussélda Uyghur mejburiy emgiki toghriliq muhakime yighini ötküzüldi

Myunxéndin ixtiyariy muxbirimiz ekrem teyyarlidi
2024.02.16
biryusel-uyghur-mejburiy-emgek-yighin-2 “Yawropa quyash énérgiyesi sana'etchiler kéngishi” (ESMC)ning uyushturushi bilen ötküzülgen “Teminlesh zenjiridiki pakize énérgiye we mejburiy emgekke qarita döletlerning inkasi” témisidiki yighinda sözge chiqqanlar. 2024-Yili 15-féwral, biryussél, bélgiye.
RFA/Ekrem

15-Féwral bélgiye paytexti biryussélda “Yawropa quyash énérgiyesi sana'etchiler kéngishi” (ESMC)ning uyushturushi bilen Uyghur mejburiy emgiki mesilisige béghishlan'ghan “Teminlesh zenjiridiki pakize énérgiye we mejburiy emgekke qarita döletlerning inkasi” dégen témida ilmiy muhakime yighini ötküzülgen. Merkizi washin'gtondiki Uyghur herikiti teshkilatining teshebbusi bilen teshkillen'gen bu yighin'gha biwasite we tor arqiliq 130 din artuq parlamént ezaliri, tetqiqatchilar, quyash énérgiyesi mutexessisliri, karxanichilar we muxbirlar qatnashqan.

“Yawropa quyash énérgiyesi sana'etchiler kéngishi” teripidin tunji qétim ötküzülgen bu yighinda yawropa parlaménti ezaliridin rayinxard bütikofér (Reinhard Bütikofer), anna kawazzini (Anna Cavazzini), Uyghur herikiti teshkilatining re'isi roshen abbas, amérika kommunizim qurbanliri fondining tetqiqatchisi adriyan zénz (Adrian Zenz), pakiz énérgiye shirkitidin anya lan'gé (Anja Lange), Uyghur mejburiy emgikini axirlashturush birleshmisidin patrisiya karrér (Patricia Carrier) we “Yawropa quyash énirgiyesi sana'etchiler kéngishi” din yohan lindahil (Johan Lindahl) qatarliqlar nutuq sözligen.

“Teminlesh zenjiridiki pakize énérgiye we mejburiy emgekke qarita döletlerning inkasi” témisidiki yighinda “Uyghur herikiti” teshkilatining re'isi roshen abbas xanim doklat bermekte. 2024-Yili 15-féwral, biryussél, bélgiye.
“Teminlesh zenjiridiki pakize énérgiye we mejburiy emgekke qarita döletlerning inkasi” témisidiki yighinda “Uyghur herikiti” teshkilatining re'isi roshen abbas xanim doklat bermekte. 2024-Yili 15-féwral, biryussél, bélgiye.
RFA/Ekrem

Biryusséldin ziyaritimizni qobul qilghan Uyghur tetqiqat merkizining diréktori abdulhakim idris ependining bildürüshiche, gérmaniyening BASF shirkiti korladin chékinip chiqish aldida turuwatqan, wolkiswagén üstidin ürümchidiki zawutini taqash chuqanliri ewj éliwatqan bir mezgilde, yawropadiki quyash énérgiyesi shirketlirining mexsus Uyghur mejburiy emgek toghrisida bundaq muhim bir yighinni chaqirishi Uyghurlar üchün zor ehmiyetke ige iken.

Yawropa ittipaqi-xitay munasiwetler komitétining re'isi rayinxard bütikofér yighinda qilghan sözide, mejburiy emgekke séliniwatqan Uyghurlarning qan-teri bedilige yaralghan mehsulatlarning yawropa bazarlirigha kirishini chekleshning zörüriyetlirini tekitlep ötkendin kéyin, “Xitay Uyghur irqiy qirghinchiliqi we Uyghur mejburiy emgekini inkar qiliwatidu, xitay yalghan sözlewatidu, xitay tosqunluq qiliwatidu, xitay tetür teshwiqatni kücheytiwatidu, xitay diqqetni chéchiwatidu, emma pakit beribir pakit, xitayning köz aldimizdila zamaniwiy qulluq jinayetlirini sadir qiliwatqanliqi esli pakittur” dégenlerni tilgha alghan.

“Teminlesh zenjiridiki pakize énérgiye we mejburiy emgekke qarita döletlerning inkasi” témisidiki yighinda xatire süret. 2024-Yili 15-féwral, biryussél, bélgiye.
“Teminlesh zenjiridiki pakize énérgiye we mejburiy emgekke qarita döletlerning inkasi” témisidiki yighinda xatire süret. 2024-Yili 15-féwral, biryussél, bélgiye.
RFA/Ekrem

Roshen abbas xanim öz sözide, xitay hakimiyitining Uyghurdin ibaret bir millet üstidin irqiy qirghinchiliq yürgüzüpla qalmay, uningdin qul süpitide paydiliniwatqanliqini, Uyghurlarning qan-teri bedilige wujudqa chiqqan mehsulatlarni yawropa bazarlirida sétiwatqanliqi misalliri bilen otturigha qoyghan. U biryusséldin ziyaritimizni qobul qilghanda, “Yawropa quyash énérgiyesi sana'etchiler kéngishi” arqiliq bundaq bir yighinni teshkilleshtiki meqsetning Uyghur mejburiy emgiki mehsulatlirining yawropa bazarlirigha kirishini chekleshtin ibaret ikenlikini ilgiri sürdi. U sözide, yawropa shirketlirige “Silerning érishiwatqininglar pakize énérgiye emes, siler bir milletning qénigha shérik boluwatisiler” dégenni bildürüshning zörürlükini tekitlidi.

Doktor adriyan zénz yighinda qilghan sözide, Uyghur mejburiy emgikige qurban boluwatqan Uyghurlarning ne ishlesh-ishlimeslik heqlirining yoqluqi, ularni döletning mejburiy yighip sana'et zawutlirigha teqsimlep ishlitiwatqanliqi, ularning ish ornidin ayrilalmaydighanliqi, ish heqqini telep qilalmaydighanliqi qatarliq bir talay mesililerni bayan qilip ötken.

Uyghur herikiti teshkilatining programma mudiri serkan tash ependining bildürüshiche, “Yawropa quyash énérgiyisi sana'etchiler kéngishi” (ESMC)ning uyushturushi bilen ötküzülgen “Teminlesh zenjiridiki pakize énérgiye we mejburiy emgekke qarita döletlerning inkasi” namliq bu yighin yawropa sana'etchilirige Uyghur mejburiy emgiki toghrisida muhim bir ders bolghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.