Уйғур ишләмчиләрниң торда сетиливатқанлиқи әнглийә парламент әзалириниң қаттиқ әйиблишигә учриди

Мухбиримиз мәмәтҗан җүмә
2021-04-18
Share
Уйғур ишләмчиләрниң торда сетиливатқанлиқи әнглийә парламент әзалириниң қаттиқ әйиблишигә учриди Хитайниң "бәйду" торида берилгән уйғур әмгәкчиләрниң сетилидиғанлиқи һәққидики елан. 2021-Йили апрел.
Social Media

Уйғур ишләмчиләрниң торда елан берилип сетиливатқанлиқи ашкариланғандин кейин, бу әнглийә парламент әзалириниң қаттиқ әйиблишигә учриған.

Өткән җүмә күни әнглийәдики даңлиқ ахбарат қанили болған "асман хәвәрләр тори" хитайниң "бәйду" қатарлиқ тор бәтлиридә уйғур әмгәкчиләрниң сетилидиғанлиқи һәққидә елан берилгәнликини хәвәр қилған. Улар уйғур әмгәкчиләр һәққидә елан бәргән кишиләр билән алақә қилип, бу уйғурларниң хитай өлкилиридики завутларға йоллинидиған ишчилар икәнлики, буларниң йерим һәрбий түзүм билән башқурулидиғанлиқидин хәвәрдар болған.

Әнглийәдин чиқидиған "мустәқиллиқ гезити" ниң хәвәр қилишичә, бу һәқтә пикир баян қилған әнглийә парламент әзаси нусрәт ғени: "топ-топ һалда уйғурларниң худди қуллардәк ким ашти қилип сетилиши қорқунчлуқ вә пүтүнләй йиргинчлик, дегән."

"асман хәвәрләр тори" ниң мәзкур хәвиригә инкас қайтурған әмгәк партийәсиниң сабиқ рәһбири иан дункан симит хитай һөкүмитиниң ирқий қирғинчилиқ қиливатқанлиқидин қилчә шүбһиләнмәйдиғанлиқини билдүргән.

У мундақ дегән: "һәқиқәт шуки, хитай һөкүмити ирқий қирғинчилиқ билән шуғуллиниватиду. Бу җәһәттә көңлүмдә һеч шәк йоқ. Улар бир етник топлуқни пүтүнләй йоқитивәтмәкчи."

"асман хәвәрләр тори" ниң мухбири том чешайир хитайниң "бәйду" торида 50 дин 100 гә қәдәр уйғурниң сетилидиғанлиқи һәққидә нәччә он йәрдә елан берилгәнликини хәвәр қилған. Хәвәрдә йәнә өзи билән сөзләшкән елан бәргүчиләрниң уйғур районидин кәлтүрүлгән бу ишләмчиләрниң йәрлик һөкүмәт органлириниң сиясий тәкшүрүшидин өткүзүлгәнликини билдүргәнлики көрситилгән.

Бу хәвәр әнглийә парламентида уйғур районида йүз бериватқанларниң "инсанийәткә қарши җинайәт вә ирқий қирғинчилиқ җинайити" шәкилләндүридиған, яки шәкилләндүрмәйдиғанлиқи үстидә муназирә елип берилиши пилан қилинған мәзгилдә елан қилинди.

Әнглийә парламент әзаси нусрәт ғени ханим тәрипидин тонуштурулған бу қарар лайиһиси 22-апрел авазға қоюлидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт