Мәҗбурий әмгәк билән четишлиқи бар йәнә 3 япон ширкити хитай билән болған тиҗаритини тохтатқан

Ихтиярий мухбиримиз әркин тарим
2021-06-01
Share
mejburiy-emgek-xitaygha-yotkesh.jpg Тәйгуаң(Tai Guang) завутидики уйғур ишләмчиләр "анар уруқи" кәчлик мәктипиниң ечилиш мурасимида. 2019-Йили июн. (ASPI Ниң доклатидин елинған)
aspi.org.au

Австралийә истратегийәлик сиясәт институти елан қилған уйғурларниң мәҗбурий әмгәккә селиниши тоғрисидики доклатта исми тилға елинған 14 чоң японийә ширкитидин йәнә үчи хитай билән болған сода алақисини тохтатқанлиқини җакарлиған болуп, һазирғичә хитай билән тиҗаритини тохтатқан ширкәтләрниң сани алтигә йәткән.

Японийәниң әң чоң гезитлиридин "японийә иқтисад гезити" ниң 21-май күни хәвәр қилишичә, японийәдә уйғур елидин чиқидиған пахтиларни ишлитидиған ширкәтләрдин үч ширкәт һазирқи кишилик һоқуқ дәпсәндичиликини нәзәрдә тутуп, уйғур дияридин пахта сетивелишни тохтитишни қарар қилған. Буларуйғур мәҗбурий әмгики билән четишлиқи бар дәп қаралған мизуно, ворд вә кох қатарлиқ үч ширкәттин ибарәт икән.

Биз бу һәқтә техиму тәпсилий мәлумат игиләш үчүн японийә уйғур җәмийити баш катипи әхмәтҗан литип әпәнди билән телефон сөһбити елип бардуқ. У, бу тоғрилиқ мәлумат берип мундақ деди: "японийә иқтисад гезитидә йезилишичә булар кийим-кечәк вә тәнтәрбийә буюмлири ишләп чиқиридиған ширкәтләрдин пай-чекини базарға салған 50 чоң ширкәт үстидә тәкшүрүш елип барған. Буларниң ичидә уйғур дияридин чиқиватқан пахтини ишлитиватқан 14 ширкәтни байқиған, бу 14 ширкәтниң ичидин үчи хитайдин пахта елишни тохтатқанлиқини җакарлиған. Бу үч ширкәттин бири вақтинчә тохтатқанлиқини җакарлиған".

Өткән йили үчинчи айда австралийәдики истратегийәлик сиясәт институти елан қилған доклатта уйғурларға елип бериливатқан мәҗбурий әмгәк билән четишлиқи бар дәп қариливатқан 14 япон ширкитигә орун берилгәндин кейин, японийә уйғур җәмийити дәрһал һәрикәткә өтүп, бу ширкәтләрниң хоҗайинлириға икки қетим хәт язған вә мухбирларни күтүвелиш йиғинлири чақирған. Әхмәтҗан литип әпәнди хәт язған икки чоң ширкәттин хәт кәлгәнликини баян қилип мундақ деди: "йәнә бири японийәдики електроника саһәсидики чоң ширкәтләрдин җапан дисплай намлиқ ширкәт 5-айниң 21-күни японийә уйғур җәмийитигә алақә йоллап, өзлириниң уйғур мәҗбурий әмгики билән четишлиқи бар дәп қариливатқан 2 хитай ширкити билән алақисини үзгәнликини, буниңдин хәвәрдар болуп қелишимизни бизгә хәвәр қилди".

Әхмәтҗан литип әпәнди һазирғичә японийәниң 6 ширкитиниң хитай билән болған алақисини үзгәнликини баян қилип мундақ деди: "буларни қошқан чағда 4-айниң оттурилиридин һазирғичә болған бир йерим ай ичидә японийәниң електроника, йемәк-ичмәк, пахта мәһсулатлири, саһәсидин болуп, җәмий 6 ширкәт мушу уйғурларниң мәҗбурий әмгәк мәсилиси билән четишлиқи бар хитай ширкәтлири, яки вәтәндин биваситә киргүзидиған. Мәһсулатларни ишлитишни бу җәһәттики содисини тохтатқанлиқини җакарлиған болди, бу наһайити яхши бир башлиништур".

Японийә уйғур җәмийити рәиси доктор абдукерим абдурахман әпәнди америка башта ғәрб әллириниң тәсири билән 5-айниң 30-күни японийә парламентиға уйғурлар тоғрисида бир лайиһә сунулғанлиқини баян қилди.

Японийә ширкәтлириниң арқа-арқидин хитайдики ширкәтләр билән болған тиҗарәт алақисини үзүши японийә билән хитай оттурисидики мунасивәткә қандақ тәсир көрситәр? японийәдики уйғур зиялийси садулла уйғур әпәнди әгәр америка вә ғәрб дөләтлиридин бу һәқтә японийәгә бесим кәлсә тәсир көрситиш еһтимал барлиқини баян қилди.

Кагомә намлиқ йемәк-ичмәк саһәсидә бәк тонулған бир ширкәт 4-айниң 14-күни баянат елан қилип, уйғурларниң һазирқи вәзийитидин әнсирәватқанлиқини, бу йәрдики кишилик һоқуқ дәпсәндичиликигә қарап туралмайдиғанлиқини, шу вәҗдин хитайдин пәмидур импорт қилишни тохтатқанлиқини елан қилғаниди. Хитай билән болған сода-алақисини тамамән үзгәнликини елан қилған иккинчи чоң ширкәт болса японийәдики кйокәра намлиқ чоң бир ширкәт болуп, бу японийәдә електрон үскүнилирини ишләп чиқиридиған бир ширкәт иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт