Турпан дахийән түрмисидики мәһбусларниң түрмә ичидә мәҗбурий әмгәккә селиниватқанлиқи дәлилләнди

Вашингтондин мухбиримиз шөһрәт һошур тәйярлиди
2024.06.10
Mejburiy-Emgek-karton Әмгәк әслиһәлиригә йөткәлгән уйғурлар кархана линийәсидә експорт қилинидиған кийимләрни қатлаватмақта.
Yettesu

Мухбиримизниң телефонини қобул қилған түрмә башқуруш идарисидики бир хадим, турпан түрмисидики мәһбусларниң һәр күни 8 саәт ишләйдиғанлиқи вә нөвәттә микро еликтур сайманлирини қутиларға қачилаватқанлиқини ашкарилиди. Нөвәттә чәт әлдә яшаватқан бир сабиқ мәһбус, турпан түрмисидә мәһбусларниң аз дегәндә 11 саәт ишләйдиғанлиқи һәққидә гуваһлиқ бәрди.

Уйғур илида түрмидә җаза өтәватқан мәһбусларниң аилә-тавабиатлириға зор миқдарда җәриманә қоюлуватқанлиқи һәққидики ениқлашлиримиз давамида, мәһбусларниң түрмидә бикар қоюлмайватқанлиқи вә һәр хил һәқсиз вә мәҗбурий әмгәкләргә селиниватқанлиқи ашкариланди. Телефонимизни қобул қилған үрүмчидики мәлум бир түрмә башқуруш идариси хадими, өзиниң йеқинда турпан дахийән түрмисини көздин кәчүргәнликини вә түрмидики мәһбусларниң әһвалиниң “алаһидә яхши” икәнликигә шаһит болғанлиқини баян қилди. У йәнә мәһбусларниң “аран 8 саәт” ишләйдиғанлиқи вә ишлириниң “бәкла йәңгил” икәнликини тәсвирлиди. Мәлум болушичә бу хадим мәзкур түрминиң 13 ‏-әтритиниң хизмәтлиригә мәсул болуп, у өткән йили тәкшүрүшкә барғинида, мәһбусларниң қуруқ үзүмләрни түргә айриватқанлиқи, униң алдида көктатларни йешиккә қачилаватқанлиқини өз көзи билән көргән. У өткән айниң 6 ‏-күниму мәзкур әтрәткә йәнә бир рәт пәсиллик тәкшүрүшкә барған болуп, бу қетим у мәһбусларниң микро електир сайманлирини қутиларға қачилаватқанлиқини көздин кәчүргән.

Нөвәттә чәт әлдә яшаватқан бир сабиқ мәһбус, өзиниң 2014‏-йили қамақханидин түрмигә йөткилиш җәрянида турпан дахийән түрмисидә икки һәптә турғузулғанлиқини, бу җәрянда, у йәрдики мәһбусларниң көнигә 11 саәт ишләватқиниға шаһит болғанлиқини билдүрди. Униң дейишичә, мәзкур түрмигә аит болған вә бир хитай көчмән тәрипидин башқурулидиған 500 мо қуруқ үзүмлүк бар болуп, бу үзүмлүкниң барлиқ ишлириға мәзкур түрмидики мәһбуслар селинидикән.

Юқириқи түрмә хадими, мәһбусларға иш һәққи берилидиған-берилмәйдиғанлиқи һәққидики соалимизға җаваб бәрмиди. Әмма сабиқ мәһбус, әйни чағда түрмиләрдә мәһбусларға пәқәт айда 8 йүән турмуш пули берилидиғанлиқи, бу пулниң тазилиқ хираҗәтлиригиму йәтмәйдиғанлиқи, шуңа мәһбуслар аилисидин кәлгән хираҗәт пуллири билән йемәк вә турмуш буюмлиридики йетәрсизликләрни қамдайдиғанлиқини тилға алди.

Бир һәвәскар тәтқиқатчи сүпитидә уйғур елиниң түрмә әһвалини тордики материяллардин вә сүний һәмраһ сүрәтлиридин көзитип келиватқан бу сабиқ мәһбус, нөвәттә турпанда 17 орунда түрмә, қамақхана вә лагер барлиқини, бу йәрдики тутқун вә мәһбусларниң һәммисиниң дегүдәк охшимиған дәриҗидә мәҗбурий әмгәккә селиниватқанлиқини илгири сүрди.

Юқирида турпан түрмисидә мәһбусларниң микро електир сайманлирини қутиларға қачилаш қатарлиқ мәҗбурий әмгәккә селиниватқанлиқи һәққидә мәлумат бәрдуқ.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.