Turpan daxiyen türmisidiki mehbuslarning türme ichide mejburiy emgekke séliniwatqanliqi delillendi

Washin'gtondin muxbirimiz shöhret hoshur teyyarlidi
2024.06.10
Mejburiy-Emgek-karton Emgek eslihelirige yötkelgen Uyghurlar karxana liniyeside éksport qilinidighan kiyimlerni qatlawatmaqta.
Yettesu

Muxbirimizning téléfonini qobul qilghan türme bashqurush idarisidiki bir xadim, turpan türmisidiki mehbuslarning her küni 8 sa'et ishleydighanliqi we nöwette mikro éliktur saymanlirini qutilargha qachilawatqanliqini ashkarilidi. Nöwette chet elde yashawatqan bir sabiq mehbus, turpan türmiside mehbuslarning az dégende 11 sa'et ishleydighanliqi heqqide guwahliq berdi.

Uyghur ilida türmide jaza ötewatqan mehbuslarning a'ile-tawabi'atlirigha zor miqdarda jerimane qoyuluwatqanliqi heqqidiki éniqlashlirimiz dawamida, mehbuslarning türmide bikar qoyulmaywatqanliqi we her xil heqsiz we mejburiy emgeklerge séliniwatqanliqi ashkarilandi. Téléfonimizni qobul qilghan ürümchidiki melum bir türme bashqurush idarisi xadimi, özining yéqinda turpan daxiyen türmisini közdin kechürgenlikini we türmidiki mehbuslarning ehwalining “Alahide yaxshi” ikenlikige shahit bolghanliqini bayan qildi. U yene mehbuslarning “Aran 8 sa'et” ishleydighanliqi we ishlirining “Bekla yenggil” ikenlikini teswirlidi. Melum bolushiche bu xadim mezkur türmining 13 ‏-etritining xizmetlirige mes'ul bolup, u ötken yili tekshürüshke barghinida, mehbuslarning quruq üzümlerni türge ayriwatqanliqi, uning aldida köktatlarni yéshikke qachilawatqanliqini öz közi bilen körgen. U ötken ayning 6 ‏-künimu mezkur etretke yene bir ret pesillik tekshürüshke barghan bolup, bu qétim u mehbuslarning mikro éléktir saymanlirini qutilargha qachilawatqanliqini közdin kechürgen.

Nöwette chet elde yashawatqan bir sabiq mehbus, özining 2014‏-yili qamaqxanidin türmige yötkilish jeryanida turpan daxiyen türmiside ikki hepte turghuzulghanliqini, bu jeryanda, u yerdiki mehbuslarning könige 11 sa'et ishlewatqinigha shahit bolghanliqini bildürdi. Uning déyishiche, mezkur türmige a'it bolghan we bir xitay köchmen teripidin bashqurulidighan 500 mo quruq üzümlük bar bolup, bu üzümlükning barliq ishlirigha mezkur türmidiki mehbuslar sélinidiken.

Yuqiriqi türme xadimi, mehbuslargha ish heqqi bérilidighan-bérilmeydighanliqi heqqidiki so'alimizgha jawab bermidi. Emma sabiq mehbus, eyni chaghda türmilerde mehbuslargha peqet ayda 8 yüen turmush puli bérilidighanliqi, bu pulning taziliq xirajetlirigimu yetmeydighanliqi, shunga mehbuslar a'ilisidin kelgen xirajet pulliri bilen yémek we turmush buyumliridiki yétersizliklerni qamdaydighanliqini tilgha aldi.

Bir heweskar tetqiqatchi süpitide Uyghur élining türme ehwalini tordiki matériyallardin we sün'iy hemrah süretliridin közitip kéliwatqan bu sabiq mehbus, nöwette turpanda 17 orunda türme, qamaqxana we lagér barliqini, bu yerdiki tutqun we mehbuslarning hemmisining dégüdek oxshimighan derijide mejburiy emgekke séliniwatqanliqini ilgiri sürdi.

Yuqirida turpan türmiside mehbuslarning mikro éléktir saymanlirini qutilargha qachilash qatarliq mejburiy emgekke séliniwatqanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.