Қәшқәрдин нәнҗиңға йөткәлгән 3000 дин артуқ мәҗбурий әмгәк күчиниң 30 пирсәнти өсмүрләр икәнлики ашкариланди

Мухбиримиз шөһрәт һошур
2021-10-27
Share
Қәшқәрдин нәнҗиңға йөткәлгән 3000 дин артуқ мәҗбурий әмгәк күчиниң 30 пирсәнти өсмүрләр икәнлики ашкариланди Хуафу мода кийим-кечәк завутида пахта йипи пишшиқлап ишләватқан көрүнүш. 2021-Йили 20-апрел, ақсу.
AP

Сичүәндики бир әмгәк күчи йөткәш ширкити бу йил6-айда қәшқәрдин нәнҗиңға йөткигән 3000 дин артуқ әмгәк күчиниң 30 пирсәнтиниң 16 яштин 18 яшқичә болған өсмүрләр икәнлики ашкариланди. Ичкий хитайға йөткәлгән ишчиларниң тәркиби һәққидә бу қетим тәпсилий мәлумат бәргән мәзкур ширкәт хадими, йөткәлгәнләр ичидә "тәрбийәләш мәркизи" дин чиққанларниңму барлиқини тилға алди.

Алдинқи күни телефонимизни қобул қилған сичүәндики бир әмгәк күчи йөткәш мулазимәт ширкитиниң хадими, бу йил6-айда қәшқәрдин 3000 дин артуқ әмгәк күчини нәнҗиңдики икки фабрикаға йөткигәнликини ашкарилиған иди. Бүгүн телефонимизни қайта қобул қилған бу хадим, мәзкур 3000 дин артуқ ишчиниң тәркиби һәққидә бәзи мәлуматларни бәрди. У бәргән мәлуматида нәнҗиңға йөткәлгән мәзкур 3000 дин артуқ әмгәк күчиниң 30 пирсәнтиниң 16-18 яш арисидикиләр, йәни өсмүрләр икәнликини ашкарилииди. Лагерлар қурулған 4 йилдин буян мәҗбурий әмгәк һәққидә көплигән хәвәрләр берилгән вә бу һәқтә америкада "қанун" лар тәстиқланған болсиму, әмма мәҗбурий әмгәк күчлири арисида өсмүрләрниңму барлиқи тәкитләнмигән иди. Мәзкур ширкәтниң торда тарқалған еланида 2000 дин артуқ оттура техником вә алий мәктәп пүттүрүш алдидики әмгәк күчи барлиқи баян қилинған.

Мәзкур хадим бәргән мәлуматида, буларниң аз бир қисимниң, йәни 13 пирсәнтиниң алий мәктәп мәлуматиға, қалған87 пирсәнтиниң болса оттура техникомдин төвән мәлумат сәвийәсигә игә икәнликини баян қилди. У йәнә әмгәк күчлириниң оқуш пүттүрүш алдидикиләрла әмәс, уларниң бир қисимниң "тәрбийәләш мәркәзлири" дики, йәнә бир қисминиң болса җәмийәттики кишиләр икәнликини тилға алди. У "тәрбийәләш мәркизи" дин чиққан әмгәк күчлириниң ишчан вә бихәтәр кишиләр икәнлики, уларниң һәммисиниң хитайчә билидиғанлиқини әскәртти. Илгири учтурпанниң имамлирим йезисиға қарита елип барған телефон зиярәтлиримиз давамида, мәлум бир аманлиқ мудири "тәрбийәләш мәркәзлири" ни әла нәтиҗә билән пүттүргәнләрниң ақсудики хуафу тоқумучилиқ завутиға 3 йиллиқ тохтам билән мәҗбурий әвәтилгәнлики, уларниң халиған вақтида аилисигә қайталмайдиғанлиқини ашкарилиған иди.

Мәзкур хадим йәнә бу әмгәк күчлирини йөткәш үчүн, қәшқәрдики даириләр билән һәмкарлашқанлиқини әскәртти. Әмма у қайсий орган билән алақилашқанлиқи һәққидә мәлумат бәрмиди. Биз бу һәқтә қәшқәрдики алақидар идарә-органларға телефон қилғинимизда, улар бу ишниң "дөләт мәхпийәтлики" гә ятидиғанлиқини әскәртип, бу һәқтә мәлумат беришни рәт қилди. Бултур хитай өлкилиридә туруп хитайға қарши баянат елан қилған тутқун мирадил һәсәнму, ақсуда даириләрниң аһалиләрни җяңсудики бир ширкәткә қул орнида сатқанлиқини инакс қилған вә бу учурниң тоғрилиқи ениқлашлиримиз давамида җяңсудики ширкәт хадимлири тәрипидин дәлилләнгән иди.

Юқурида қәшқәрдин нәнҗиңға йөткәлгән 3000 дин артуқ әмгәк күчи арисида бир қисимниң 16‏-18 яш арисидики өсмүрләр икәнлики вә бир қисиминиң "тәрбийәләш мәркәзлири" дин чиққанлар икәнлики һәққидә мәлумат бәрдуқ.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт