Qeshqerdin nenjinggha yötkelgen 3000 din artuq mejburiy emgek küchining 30 pirsenti ösmürler ikenliki ashkarilandi

Sichüendiki bir emgek küchi yötkesh shirkiti bu yil6-ayda qeshqerdin nenjinggha yötkigen 3000 din artuq emgek küchining 30 pirsentining 16 yashtin 18 yashqiche bolghan ösmürler ikenliki ashkarilandi. Ichkiy xitaygha yötkelgen ishchilarning terkibi heqqide bu qétim tepsiliy melumat bergen mezkur shirket xadimi, yötkelgenler ichide “Terbiyelesh merkizi” din chiqqanlarningmu barliqini tilgha aldi.

Aldinqi küni téléfonimizni qobul qilghan sichüendiki bir emgek küchi yötkesh mulazimet shirkitining xadimi, bu yil6-ayda qeshqerdin 3000 din artuq emgek küchini nenjingdiki ikki fabrikagha yötkigenlikini ashkarilighan idi. Bügün téléfonimizni qayta qobul qilghan bu xadim, mezkur 3000 din artuq ishchining terkibi heqqide bezi melumatlarni berdi. U bergen melumatida nenjinggha yötkelgen mezkur 3000 din artuq emgek küchining 30 pirsentining 16-18 yash arisidikiler, yeni ösmürler ikenlikini ashkarili'idi. Lagérlar qurulghan 4 yildin buyan mejburiy emgek heqqide köpligen xewerler bérilgen we bu heqte amérikada “Qanun” lar testiqlan'ghan bolsimu, emma mejburiy emgek küchliri arisida ösmürlerningmu barliqi tekitlenmigen idi. Mezkur shirketning torda tarqalghan élanida 2000 din artuq ottura téxnikom we aliy mektep püttürüsh aldidiki emgek küchi barliqi bayan qilin'ghan.

Mezkur xadim bergen melumatida, bularning az bir qisimning, yeni 13 pirsentining aliy mektep melumatigha, qalghan87 pirsentining bolsa ottura téxnikomdin töwen melumat sewiyesige ige ikenlikini bayan qildi. U yene emgek küchlirining oqush püttürüsh aldidikilerla emes, ularning bir qisimning “Terbiyelesh merkezliri” diki, yene bir qismining bolsa jem'iyettiki kishiler ikenlikini tilgha aldi. U “Terbiyelesh merkizi” din chiqqan emgek küchlirining ishchan we bixeter kishiler ikenliki, ularning hemmisining xitayche bilidighanliqini eskertti. Ilgiri uchturpanning imamlirim yézisigha qarita élip barghan téléfon ziyaretlirimiz dawamida, melum bir amanliq mudiri “Terbiyelesh merkezliri” ni ela netije bilen püttürgenlerning aqsudiki xu'afu toqumuchiliq zawutigha 3 yilliq toxtam bilen mejburiy ewetilgenliki, ularning xalighan waqtida a'ilisige qaytalmaydighanliqini ashkarilighan idi.

Mezkur xadim yene bu emgek küchlirini yötkesh üchün, qeshqerdiki da'iriler bilen hemkarlashqanliqini eskertti. Emma u qaysiy organ bilen alaqilashqanliqi heqqide melumat bermidi. Biz bu heqte qeshqerdiki alaqidar idare-organlargha téléfon qilghinimizda, ular bu ishning “Dölet mexpiyetliki” ge yatidighanliqini eskertip, bu heqte melumat bérishni ret qildi. Bultur xitay ölkiliride turup xitaygha qarshi bayanat élan qilghan tutqun mir'adil hesenmu, aqsuda da'irilerning ahalilerni jyangsudiki bir shirketke qul ornida satqanliqini inaks qilghan we bu uchurning toghriliqi éniqlashlirimiz dawamida jyangsudiki shirket xadimliri teripidin delillen'gen idi.

Yuqurida qeshqerdin nenjinggha yötkelgen 3000 din artuq emgek küchi arisida bir qisimning 16‏-18 yash arisidiki ösmürler ikenliki we bir qisimining “Terbiyelesh merkezliri” din chiqqanlar ikenliki heqqide melumat berduq.