Алақидар хадимлар атақлиқ язғучи мәмтимин һошурниң әсәрлиридин «мәсилә» чиққанлиқини ашкарилиди

Мухбиримиз шөһрәт һошур
2019-04-12
Елхәт
Пикир
Share
Принт
Атақлиқ язғучи мәмтимин һошур әпәнди.
Атақлиқ язғучи мәмтимин һошур әпәнди.
ug.wikipedia.org

Бирқанчә айдин буян җәмийәттә атақлиқ язғучи мәмтимин һошурниңму тутқунда икәнлики һәққидә ғәйрий-рәсмий учурлар тарқилип келиватқан иди. Түнүгүн америкадики «тинч окян өлчими» журнилида елан қилинған тәклимакан уйғур нәшрияти һәққидики мақалидиму бу йил 74 яшқа киргән атақлиқ язғучи мәмтимин һошурниң тутқунда икәнлики тилға елинған. Мухбиримизниң бу һәқтә елип барған ениқлашлири давамида уйғур райондики алақидар хадимлар мәмтимин һошурниң әсәрлиридин «мәсилә» чиққанлиқини ашкарилиди.

Атақлиқ язғучи мәмтимин һошурниң тутқунда икәнлики түнүгүн тунҗи қетим рәсмий ахбарат васитилиридин «тинч окян өлчими» журнилида тилға елинди. Мақалидин мәлум болушичә, бу учур тәклимакан уйғур нәширятиниң қурғучиси абдуҗелил туран әпәнди тәрипидин тәминләнгән. Абдуҗелил туран әпәнди бу бу учурни җәмийәттин аңлиғанлиқи, һазирға қәдәр уйғур җәмийитидики мәшһур шәсхләрниң тутулғанлиқи һәққидики җәмийәт хәвәрлириниң һәммисиниң дегүдәк раст болуп чиқиватқанлиқини баян қилған.

«Қум басқан шәһәр» романи, «сараң», «бурут маҗираси» қатарлиқ йүрүшлүк һекайилири билән даңқ чиқарған язғучи мәмтимин һошур 1995‏-йилидин 2006 ‏-йилиғичә уйғур аптоном районлуқ язғучилар җәмийитигә рәис болған. Уйғур аптоном районлуқ язғучилар җәмийити язғучи мәмтимин һошурниң һазирқи әһвалидин хәвири йоқлуқини ейтти. У бир мәзгил муавин рәис болуп вәзипә өтигән уйғур аптоном районлуқ әдәбият-сәнәтчиләр бирләшмисиниң бир нәпәр нөвәтчи хадимиму мәмтимин һошурниң алақә учурлирини тәминләп берәлмиди.

1944‏-Йили ғулҗа шәһиридә туғулған, 1967‏-йили шинҗаң университетиниң тил-әдәбият факултетини пүттүргән мәмтимин һошур 1979‏-йилидин 1995‏-йилиғичә «или дәряси» журнилида муһәррир вә баш муһәррир болуп вәзипә өтигән. Бу журналдики алақидар хадимлар мәмтимин һошур һәққидики соалимизға җаваб бериштин өзлирини қачурди.

Материялларда көрситилишичә, язғучи мәмтимин һошур ғулҗидики мәзгилидә или областлиқ әдәбият-сәнәтчиләр бирләшмисидә кәспий язғучи вә рәис болуп вәзипә өтигән. Мәзкур бирләшмә хадими мәмтимин һошурниң алақә учурини, йәни аилисиниң телефонини сориғинимизда номурни бериштин өзини тартти. Қәшқәр уйғур нәшриятидики тутқунлар һәққидә елип барған ениқлашлиримиз давамида даириләрниң 2017 ‏-йилдин башлап нәшрият орунлириға қарита тәкшүрүш елип барғанлиқи вә зор бир түркүм китаб-журналларни «мәсилилик китаблар» дәп бекитип чиққанлиқи шундақла уларни язған, тәһрирлигән вә тәстиқлиғанларни тутқун қилғанлиқи дәлилләнгән иди.

Биз «или дәряси» журнилиниң алақидар хадимидин «мәсилилик китаблар» арисида мәмтимин һошурниң әсәрлириниң бар-йоқлуқини соридуқ. Улар «әлвәттә бар» дәп җаваб бәрди. Биз улардин мәмтимин һошурниң қанчә вә қайси әсәрлиридин «мәсилә» тепилғанлиқини сориғинимизда улар буниң мәхпийәтликкә ятидиғанлиқини әскәртип, мәлумат беришни рәт қилди. Биз арқидин йәнә мәмтимин һошурниң қайси орун вә кимләр тәрипидин тутулғанлиқини сориғинимизда у бу һәқтә уйғур тәһрир бөлүмидин учур елишимизни тәвсийә қилди. Биз униңдин мәмтимин һошурниң қачан тутулғанлиқини сориғинимизда бу соалға җаваб берәләйдиған башқа бир бөлүмниң телефонини тәминлиди. Бу хадим бу соалимизға җаваб беришниң орниға бу учурни немә үчүн сораватқанлиқимизни сүрүштә қилди.

Телефон зиярәтлиримиз давамида һеч бир хадим язғучи мәмтимин һошурниң тутқунда икәнликини рәт қилмиди, униң әсәрлиридин «мәсилә» чиққанлиқини ашкарилиған болсиму, униң һазир нәдилики, әгәр тутқунда болса немә үчүн тутулғанлиқи һәққидә мәлумат берәлмиди.

Абдуҗелил туран әпәнди атақлиқ язғучи мәмтимин һошурниң әсәрлиридин «мәсилә» тепилмиған тәқдирдиму униң нөвәттики шан-шөһрити вә җәмийәттики тәсириниң өзила униң тутулушиға сәвәб болуш еһтималлиқини оттуриға қойди.
Атақлиқ язғучи мәмтимин һошур 1990‏-йилларда «тәңритағ» журнили тәрипидин елип берилған китабханлар райини синашта язғучи зордун сабир вә әхтәм өмәр билән бирликтә «уйғур оқурмәнлири тәрипидин әң сөйүлгән 3 язғучиниң бири» болуп баһаланған иди.

Пикирләр (0)
Share
Толуқ бәт