Alaqidar xadimlar ataqliq yazghuchi memtimin hoshurning eserliridin "Mesile" chiqqanliqini ashkarilidi

Muxbirimiz shöhret hoshur
2019-04-12
Élxet
Pikir
Share
Print
Ataqliq yazghuchi memtimin hoshur ependi.
Ataqliq yazghuchi memtimin hoshur ependi.
ug.wikipedia.org

Birqanche aydin buyan jem'iyette ataqliq yazghuchi memtimin hoshurningmu tutqunda ikenliki heqqide gheyriy-resmiy uchurlar tarqilip kéliwatqan idi. Tünügün amérikadiki "Tinch okyan ölchimi" zhurnilida élan qilin'ghan teklimakan Uyghur neshriyati heqqidiki maqalidimu bu yil 74 yashqa kirgen ataqliq yazghuchi memtimin hoshurning tutqunda ikenliki tilgha élin'ghan. Muxbirimizning bu heqte élip barghan éniqlashliri dawamida Uyghur rayondiki alaqidar xadimlar memtimin hoshurning eserliridin "Mesile" chiqqanliqini ashkarilidi.

Ataqliq yazghuchi memtimin hoshurning tutqunda ikenliki tünügün tunji qétim resmiy axbarat wasitiliridin "Tinch okyan ölchimi" zhurnilida tilgha élindi. Maqalidin melum bolushiche, bu uchur teklimakan Uyghur neshiryatining qurghuchisi abdujélil turan ependi teripidin teminlen'gen. Abdujélil turan ependi bu bu uchurni jem'iyettin anglighanliqi, hazirgha qeder Uyghur jem'iyitidiki meshhur shesxlerning tutulghanliqi heqqidiki jem'iyet xewerlirining hemmisining dégüdek rast bolup chiqiwatqanliqini bayan qilghan.

"Qum basqan sheher" romani, "Sarang", "Burut majirasi" qatarliq yürüshlük hékayiliri bilen dangq chiqarghan yazghuchi memtimin hoshur 1995‏-yilidin 2006 ‏-yilighiche Uyghur aptonom rayonluq yazghuchilar jem'iyitige re'is bolghan. Uyghur aptonom rayonluq yazghuchilar jem'iyiti yazghuchi memtimin hoshurning hazirqi ehwalidin xewiri yoqluqini éytti. U bir mezgil mu'awin re'is bolup wezipe ötigen Uyghur aptonom rayonluq edebiyat-sen'etchiler birleshmisining bir neper nöwetchi xadimimu memtimin hoshurning alaqe uchurlirini teminlep bérelmidi.

1944‏-Yili ghulja shehiride tughulghan, 1967‏-yili shinjang uniwérsitétining til-edebiyat fakultétini püttürgen memtimin hoshur 1979‏-yilidin 1995‏-yilighiche "Ili deryasi" zhurnilida muherrir we bash muherrir bolup wezipe ötigen. Bu zhurnaldiki alaqidar xadimlar memtimin hoshur heqqidiki so'alimizgha jawab bérishtin özlirini qachurdi.

Matériyallarda körsitilishiche, yazghuchi memtimin hoshur ghuljidiki mezgilide ili oblastliq edebiyat-sen'etchiler birleshmiside kespiy yazghuchi we re'is bolup wezipe ötigen. Mezkur birleshme xadimi memtimin hoshurning alaqe uchurini, yeni a'ilisining téléfonini sorighinimizda nomurni bérishtin özini tartti. Qeshqer Uyghur neshriyatidiki tutqunlar heqqide élip barghan éniqlashlirimiz dawamida da'irilerning 2017 ‏-yildin bashlap neshriyat orunlirigha qarita tekshürüsh élip barghanliqi we zor bir türküm kitab-zhurnallarni "Mesililik kitablar" dep békitip chiqqanliqi shundaqla ularni yazghan, tehrirligen we testiqlighanlarni tutqun qilghanliqi delillen'gen idi.

Biz "Ili deryasi" zhurnilining alaqidar xadimidin "Mesililik kitablar" arisida memtimin hoshurning eserlirining bar-yoqluqini soriduq. Ular "Elwette bar" dep jawab berdi. Biz ulardin memtimin hoshurning qanche we qaysi eserliridin "Mesile" tépilghanliqini sorighinimizda ular buning mexpiyetlikke yatidighanliqini eskertip, melumat bérishni ret qildi. Biz arqidin yene memtimin hoshurning qaysi orun we kimler teripidin tutulghanliqini sorighinimizda u bu heqte Uyghur tehrir bölümidin uchur élishimizni tewsiye qildi. Biz uningdin memtimin hoshurning qachan tutulghanliqini sorighinimizda bu so'algha jawab béreleydighan bashqa bir bölümning téléfonini teminlidi. Bu xadim bu so'alimizgha jawab bérishning ornigha bu uchurni néme üchün sorawatqanliqimizni sürüshte qildi.

Téléfon ziyaretlirimiz dawamida héch bir xadim yazghuchi memtimin hoshurning tutqunda ikenlikini ret qilmidi, uning eserliridin "Mesile" chiqqanliqini ashkarilighan bolsimu, uning hazir nediliki, eger tutqunda bolsa néme üchün tutulghanliqi heqqide melumat bérelmidi.

Abdujélil turan ependi ataqliq yazghuchi memtimin hoshurning eserliridin "Mesile" tépilmighan teqdirdimu uning nöwettiki shan-shöhriti we jem'iyettiki tesirining özila uning tutulushigha seweb bolush éhtimalliqini otturigha qoydi.
Ataqliq yazghuchi memtimin hoshur 1990‏-yillarda "Tengritagh" zhurnili teripidin élip bérilghan kitabxanlar rayini sinashta yazghuchi zordun sabir we extem ömer bilen birlikte "Uyghur oqurmenliri teripidin eng söyülgen 3 yazghuchining biri" bolup bahalan'ghan idi.

Toluq bet