“Men xitayning lagéridin qéchip chiqtim” namliq téz sizma kitab tarqilishqa bashlidi

Amérikada turushluq lagér shahiti, pa'aliyetchi zumret dawutning hayati teswirlen'gen “Men xitayning lagéridin qéchip chiqtim” namliq téz sizma kitab neshrdin chiqti.

Amérikada turushluq lagér shahiti, pa'aliyetchi zumret dawutning hayati teswirlen'gen “Men xitayning lagéridin qéchip chiqtim” namliq téz sizma kitab neshr qilinip, 13-féwraldin bashlap amazon arqiliq tarqitilishqa bashlidi. Kitab zumret dawut heqqide élan qilin'ghan xewerler we zumret dawutning kishilik hoquq organlirigha bergen guwahliqliri we uning aghzaki bayanliri asasida aptor antoni dél kol teripidin yézilghan, kitabtiki resimler sen'etkar fahize azim teripidin sizilghan.

Bu munasiwet bilen kitabtiki bash pérsonazh zumret dawut xanim radiyomiz Uyghur bölümining mexsus ziyaritini qobul qilip, kitab heqqide melumat berdi.

Zumret dawut

Zumret dawut xanimning bildürüshiche, kitabta uning Uyghur diyarida zor kölemlik tutqun bashlan'ghan 2016-2017-yilliri tutqun qilinip, xitay hökümitining atalmish “Qayta terbiyelesh” namidiki yighiwélish lagérigha qamilishi, lagérda yoluqqan échinishliq qismetliri, pakistan girazhdani bolghan érining pakistan elchixanisi arqiliq sürüshtürüshi netijiside xitay lagéridin qutulup pakistan'gha kétish jeryani, uning pakistandin amérikagha kelgendin kéyin, birleshken döletler teshkilati kishilik hoquq komitétida bergen guwahliqliri we taratqularda uning hayati toghriliq élan qilin'ghan xewerler sizma sheklide sizip chiqilip, resimlik shekilde tepsiliy bayan qilin'ghan.

Zumret dawut xanimning bildürüshiche, mezkur kitabning yene 13 minutluq karton filim nusxisimu ishlen'gen.

 Mezkur karton filim uning körüshigimu ewetip bérilginide, u tolimu hayajanlan'ghan.

Uning bildürüshiche, u, filimni körgendin kéyin, xitayning jaza lagérigha qamalghan özige oxshash Uyghurlarning qismetlirining bundaq bir usulda dunya jama'etchilikige tarqalghanliqidin intayin memnun bolghan we tesirlen'gen.

Zumret dawut

 Mezkur kitab 2022-yili amérikada axbarat-neshriyatchiliq sahesidiki nopuzluq mukapat “Pulitzér mukapati” gha érishken.

Zumret xanim özining eyni chaghda kitabning aptori antoni dél kol teripidin mukapatlash murasimigha qatnashturulghinida kitabqa yuqiri bahalar bérilgenlikini bildürdi.

Zumret xanimning bildürüshiche, 13-féwral kitabning amazon bazirigha sélin'ghanliqi heqqide xewer tarqalghandin kéyin, Uyghurlar uchrawatqan irqiy qirghinchiliq weziyitidin xewerdar bolghan bir qisim amérikaliq pa'aliyetchiler we chet ellerdiki Uyghurlar özige we kitab aptorigha téléfon qilip, rehmet bildürgen.

 Söhbetning tepsilatini yuqiriqi awaz ulinishidin anglaysiler.