Йопурға наһийисиниң бир мәхпий доклатидин радийомиз ишлигән бир хәвәрниң чинлиқи вә тәсир күчи дәлилләнди
Йопурға наһийилик парткомниң әркин асия радиосиниң бир парчә хәвириниң тәсиригә қайтурған инкаси вә бу һәқтики өзини тәкшүрүш маһийитидики доклати қолға чүшүрүлди.
-
Мухбиримиз шөһрәт һошур
2019-09-13 -
-
-
Your browser doesn’t support HTML5 audio
Йеқинда радийомиз йопурға наһийилик партком тәрипидин һазирланған вә қәшқәр вилайәтлик парткомға йолланған бир мәхпий муһакимә доклатини қолға чүшүрди. Доклатиниң мавзуси “америка әркин асия радиосиниң наһийәмиздики ‛үч хил кишиләр‚ тоғрулуқ хәвәр тарқитип пәйда қилған яман тәсири үстидә ойлиниш” дәп аталған. Бу доклатта мәзкур хәвәр елан қилинғандин кейин наһийидә кәң көләмдә ишләнгән чәтәл мухбир зияритини тосуш хизмәтлири доклат қилиниш билән бирликтә, радийомиз хәвиридә паш қилинған пәрзәнтлири лагерға әкетилгән 80 яшлиқ бовайниң там бесивелип өлүш вәқәсиниң йүз бәргәнлики вә бу вәқәдә наһийәниң кона өйләрни чеқишта бихәтәрлик тәдбирлирини яхши ишлимигәнликидәк мәсулийәтсизликиниң сәвәб болғанлиқи етирап қилинған. Төвәндә мухбиримиз шөһрәт һошурниң бу һәқтә тәйярлиған программиси диққитиңларда болиду.
Әслидә шу күнки әһвал ениқлишимиз давамида, 80 яшлиқ бовайни там бесивелип өлгәнлик хәвирини наһийә вә йезидики көпинчә хадимлар инкар қилған яки хәвәрсизликини ейтқаниди. Ахирида зияритимизни қобул қилған дохтурхана хадимлири бовайниң там бесивелип өлгәнликини дәлиллигәниди. Йопурға наһийисиниң мәхпий доклатидин мәлум болушичә, даириләр бу вәқә үстидә тохтилип, “чәтәлдики дүшмән күчләрниң кичиккинә бир иҗтимаий қазани чоңайтивәткәнлики вә бу һәқтә хәвәр тарқитип, партийә вә һөкүмәтниң йүзини төккәнлики” ни қәйт қилған. Даириләр доклатта йәнә мәзкур вәқәдики мәсулийитиниму үстигә елип, “вилайәт биздин кона өйләрни чаққанда алди билән кәнт парткомини хәвәрләндүрүшни тәләп қилған болсиму, биз бу тәләпкә уйғун һәрикәт қилалмидуқ; шу сәвәбтин кона өйләрни чеқип кәнт қияпитини рәткә селиш хизмити давамида өлүм һадисиси келип чиқти” дегән вә бу һадисиниң “чегра сиртидики 3 хил күчләрниң еғизиға лоқма селип бәргәнлики” ни әскәрткән.
80 яшлиқ бовайниң өлүми һәққидики хәвиримиз вәқә йүз берип 2 саәттин кейин ениқланған вә шу күни елан қилинғаниди; бу вәқә мисирдин қайтқан 17 яшлиқ яқупҗан наман дегән бир оқуғучиниң лагерда өлгәнлики һәққидики учурни ениқлишимиз давамида паш болғаниди, яқупҗан наманниң өлүмиму мәзкур хәвәрдин 3 күн кейин елан қилинған. Мәхпий доклатта әркин асия радиосиниң 9- вә 10-март күнлири йопурға һәққидә арқа-арқидин хәвәр бәргәнлики, болупму там бесип адәм өлүш вәқәсиниң йүз берип бир нәччә саәт ичидә ашкарилинип болғанлиқиға һәйранлиқ билдүрүлүш билән бирликтә; наһийидә илгири дөләт мәхпийәтликини сақлаш һәққидә қайта-қайта уқтуруш қилинған, йиғинлар ечилған болсиму, әмма асасий қатламдики кадир вә аһалиләрниң бихудлуқтин сақлиналмиғанлиқи оттуриға қоюлған. Доклатта, бихудлуқни түгитиш үчүн йәнә бир қатар йеңи тәдбир елинғанлиқи тилға елинип, буниңдин кейин бу хил бихудлуқни тәкрарлимайдиғанлиқи һәққидә вилайәткә вәдә маһийитидә ипадиләр билдүрүлгән.
“бәйду учур амбири” да көрситилишичә, йопурға наһийиси 4 базар, 5 йеза, бир чарвичилиқ мәйданидин тәшкилләнгән 180 миң нопуслуқ бир наһийәдур; нопуси 96% уйғурдур.
Һөрмәтлик радио аңлиғучилар, юқирида, йопурға наһийилик парткомниң әркин асия радиосиниң бир парчә хәвириниң тәсиригә қайтурған инкаси вә бу һәқтики өзини тәкшүрүш маһийитидики доклатниң аз бир қисим мәзмуни һәққидә аңлитиш бәрдуқ.