Yopurgha nahiyisining bir mexpiy doklatidin radiyomiz ishligen bir xewerning chinliqi we tesir küchi delillendi

Muxbirimiz shöhret hoshur
2019-09-13
Élxet
Pikir
Share
Print
Yopurgha nahiyisining "Amérika erkin asiya radi'osining nahiyemizdiki 'üch xil kishiler' toghruluq xewer tarqitip peyda qilghan yaman tesiri üstide oylinish" namliq mexpiy doklati.
Yopurgha nahiyisining "Amérika erkin asiya radi'osining nahiyemizdiki 'üch xil kishiler' toghruluq xewer tarqitip peyda qilghan yaman tesiri üstide oylinish" namliq mexpiy doklati.
Photo: RFA

Yéqinda radiyomiz yopurgha nahiyilik partkom teripidin hazirlan'ghan we qeshqer wilayetlik partkomgha yollan'ghan bir mexpiy muhakime doklatini qolgha chüshürdi. Doklatining mawzusi "Amérika erkin asiya radi'osining nahiyemizdiki 'üch xil kishiler' toghruluq xewer tarqitip peyda qilghan yaman tesiri üstide oylinish" dep atalghan. Bu doklatta mezkur xewer élan qilin'ghandin kéyin nahiyide keng kölemde ishlen'gen chet'el muxbir ziyaritini tosush xizmetliri doklat qilinish bilen birlikte, radiyomiz xewiride pash qilin'ghan perzentliri lagérgha ekétilgen 80 yashliq bowayning tam bésiwélip ölüsh weqesining yüz bergenliki we bu weqede nahiyening kona öylerni chéqishta bixeterlik tedbirlirini yaxshi ishlimigenlikidek mes'uliyetsizlikining seweb bolghanliqi étirap qilin'ghan. Töwende muxbirimiz shöhret hoshurning bu heqte teyyarlighan programmisi diqqitinglarda bolidu.

Hörmetlik radi'o anglighuchilar, mezkur mexpiy doklattin melum bolushiche, radiyomizda ötken yili 3-ayning 8-küni, yopurgha nahiyisining yekshenbebazar yézisida perzentliri lagérgha ekétilgen 80 yashliq bir bowayning tam bésiwélip ölgenliki heqqidiki xewirimiz élan qilin'ghandin kéyin qeshqer wilayetlik partkom tor we uchur bashqurush ishxanisi yopurgha nahiyilik partkomgha uqturush yollap, ehwalni tekshürüshke buyrughan. Nahiyilik partkom uqturushni tapshuruwalghan küni, yeni mezkur xewirimiz élan qilinip bir kündin kéyin nahiyilik siyasiy qanun komitéti, j x idarisi, terbiyilesh merkezlirini bashqurush idarisi we yekshenbe bazarliq hökümetning bashliqliri bilen yighin ötküzüp, ehwalni muzakire qilghan hem shu kéchisi nahiye boyiche kadirlar yighini chaqirip, mexpiyetlik éngini östürüsh, ehwal pash qilip qoyushtin qattiq saqlinish we uchur ashkarilap qoyushni qayta sadir qilmasliq heqqide agahlandurghan.


Eslide shu künki ehwal éniqlishimiz dawamida, 80 yashliq bowayni tam bésiwélip ölgenlik xewirini nahiye we yézidiki köpinche xadimlar inkar qilghan yaki xewersizlikini éytqanidi. Axirida ziyaritimizni qobul qilghan doxturxana xadimliri bowayning tam bésiwélip ölgenlikini delilligenidi. Yopurgha nahiyisining mexpiy doklatidin melum bolushiche, da'iriler bu weqe üstide toxtilip, "Chet'eldiki düshmen küchlerning kichikkine bir ijtima'iy qazani chongaytiwetkenliki we bu heqte xewer tarqitip, partiye we hökümetning yüzini tökkenliki" ni qeyt qilghan. Da'iriler doklatta yene mezkur weqediki mes'uliyitinimu üstige élip, "Wilayet bizdin kona öylerni chaqqanda aldi bilen kent partkomini xewerlendürüshni telep qilghan bolsimu, biz bu telepke uyghun heriket qilalmiduq؛ shu sewebtin kona öylerni chéqip kent qiyapitini retke sélish xizmiti dawamida ölüm hadisisi kélip chiqti" dégen we bu hadisining "Chégra sirtidiki 3 xil küchlerning éghizigha loqma sélip bergenliki" ni eskertken.

80 Yashliq bowayning ölümi heqqidiki xewirimiz weqe yüz bérip 2 sa'ettin kéyin éniqlan'ghan we shu küni élan qilin'ghanidi؛ bu weqe misirdin qaytqan 17 yashliq yaqupjan naman dégen bir oqughuchining lagérda ölgenliki heqqidiki uchurni éniqlishimiz dawamida pash bolghanidi, yaqupjan namanning ölümimu mezkur xewerdin 3 kün kéyin élan qilin'ghan. Mexpiy doklatta erkin asiya radi'osining 9- we 10-mart künliri yopurgha heqqide arqa-arqidin xewer bergenliki, bolupmu tam bésip adem ölüsh weqesining yüz bérip bir nechche sa'et ichide ashkarilinip bolghanliqigha heyranliq bildürülüsh bilen birlikte؛ nahiyide ilgiri dölet mexpiyetlikini saqlash heqqide qayta-qayta uqturush qilin'ghan, yighinlar échilghan bolsimu, emma asasiy qatlamdiki kadir we ahalilerning bixudluqtin saqlinalmighanliqi otturigha qoyulghan. Doklatta, bixudluqni tügitish üchün yene bir qatar yéngi tedbir élin'ghanliqi tilgha élinip, buningdin kéyin bu xil bixudluqni tekrarlimaydighanliqi heqqide wilayetke wede mahiyitide ipadiler bildürülgen. 

"Beydu uchur ambiri" da körsitilishiche, yopurgha nahiyisi 4 bazar, 5 yéza, bir charwichiliq meydanidin teshkillen'gen 180 ming nopusluq bir nahiyedur؛ nopusi 96% Uyghurdur. 

Hörmetlik radi'o anglighuchilar, yuqirida, yopurgha nahiyilik partkomning erkin asiya radi'osining bir parche xewirining tesirige qayturghan inkasi we bu heqtiki özini tekshürüsh mahiyitidiki doklatning az bir qisim mezmuni heqqide anglitish berduq.

Toluq bet