Mayk pompéyo yawropa diplomatliri bilen xitay heqqidiki ortaq endishiliri üstide söhbet ötküzidiken

Amérika tashqi ishlar ministiri mayk pompéyo mushu ay ichide yawropa diplomatliri bilen uchurshup, ikki terepning xitay heqqidiki ortaq endishiliri üstide söhbet ötküzidiken.

“Jenubiy xitay seher géziti” ning xewer qilishiche, bu heqtiki uchurlarni ashkarilighan bir yuqiri derijilik yawropa diplomati amérika we yawropa diplomatliri arisida ötküzülidighan bu söhbetning xitaygha qarishi birliksep qurulushining aldini élsh üchün tirishchanliq körsitiwatqan béyjing da'irilirini teshwishke salidiken. 

Xewerge qarighanda, pompéyo yene italiye we watikanni ziyaret qilip, italiye da'irilirini xitayning “Bir yol bir belwagh qurulushi” kélishimidin waz kéchishke qayil qilishqa tirishchanliq körsitidiken.

Italiye xitayning “Bir yol bir belwagh qurulushi” pilanigha awaz qoshqan bir din bir 7g döliti idi.

Özini mexpiy tutqan mezkur yawropa diplomati, yawropa ellirining tashqi siyasetke mes'ul diplomati josép borrél düshenbe küni yawropa ittipaqigha eza 27 döletning tashqi ishlar ministirlirigha amérika bilen ötküzülidighan diyalog teklipini resmiy shekilde bildüridiken. 

U yene amérika-yawropa diyalogining bundin kéyin dawamliq ötküzülüp turidilighanliqini, buning eng burun bolghanda bu ay bashlinidighanliqini éytqan. 

Özini mexpiy tutqan mezkur yawropa diplomati yene, yawropaning amérika bilen xitay xususidiki ortaq endishliri üstide söhbet ötküzüshtin memnun ikenlikni, buning béyjinggha intayin küchlük bir signal béridighanliqini éytqan. 

Amérika-yawropa diplomatliri arisida ötküzülidighan bu söhbetning heqiqiy waqti 21-séntebir düshenbe küni éniq bolidiken. 

Bu söhbetning xitay diplomati wang yining ikki hepte burun yawropagha qaratqan ziyariti meghlubiyet bilen ayaghlashqanliqi we xitay re'isi shi jinpingning yawropa rehberliri bilen bu hepte ötküzgen intérnét söhbiti kütkendek ünüm bermigenliki xewer qilin'ghan mezgilge toghra keldi.