Mayk pompéyo watikan da'irilirini xitaydiki étiqadchilarni qollashqa chaqiridi

Amérika tashqi ishlar ministiri mayk pompéyo “Tunji shey'iler” namliq diniy zhornalda maqale élan qilip, watikan da'irilirini xitaydiki étiqadchilarni qollashqa chaqiridi.

U maqaliside shi jinpingning mustebit hakimiyiti astida xitaydiki kishilik hoquqning, bolupmu étiqadchilarning éghir talapetke yoluqqanliqini tilgha aldi. 

U maqaliside, xitay kompartiyesining Uyghur élidiki musulmanlargha qarita mejburiy bala chüshürüsh we tughmas qilish programmisi yolgha qoyghanliqi, katolik poplar we étiqadchilirini xarlighanliqi, protéstant yer'asti chérkawlirigha hujum qilghanliqi, shi jinpingning özini bir ilahiy küch süpitide otturigha chiqiriwatqanliqi qatarliqlarning ishenchlik doklatlar teripidin ashkarilan'ghanliqini otturigha qoydi. 

U mundaq dédi: “Hazir xitaydiki diniy jama'et watikanning exlaqiy guwahliqi we hakimiyet nuqtisidin qollishigha her qandaq waqittikidinmu bekrek éhtiyajliq.”

U yene, amérik bashlighan xitayning barghanche ötkürlishiwatqan kishilik hoquq depsendichiliklirini eyiblesh herikitige nurghun döletlerning awaz qoshqanliqini, ötken yili 22 döletning b d t kishilik hoquq kéngishige birlikte mektup yollap, xitayning 1 milyondin artuq Uyghur musulman, qazaq we bashqilarni atalmish “Qayta terbiyelesh” lagérlirigha solighanliqini eyibligenlikni, amérikaning xitaydiki kishilik hoquq depsendichiliklirini eyibleshni izchil dawam qilidighanliqini bildürdi. 

Pompéyoning bu maqalisi watikan diplomatliri bilen xitay kommunist diplomatliri arisida bu ay ichide ötküzülidighan di'alogdin burun élan qilindi.