“Millet nöwette pa'aliyiti” 120-künide waqtinche toxtitildi

• Ixtiyariy muxbirimiz azigh
  2021-04-19

Xitayning istanbul konsulxanisining aldida dawamlishiwatqan millet nöwette pa'aliyiti 120-künide türkiye hökümitining ramzan éyida yolgha qoyghan yéngi koruna wirusi tedbirliri seweblik waqtinche toxtitildi.

Türkiyede yéqindin buyan korona wirusining tarqilishi téximu éghirliship ketkenidi.

Xitayning istanbul konsulxanisining aldida bashlinip dawam qiliwatqan “Millet nöwette” pa'aliyitining 120-künide, türkiye bixeterlik xadimliri pa'aliyetchilerdin yéngi élan qilin'ghan koruna wirusi wabasi tedbirliri seweblik pa'aliyetni waqtinche toxtitishni telep qilghan.

Türkiye saqchi da'irilirining téléfonini tapshurup alghan lagér qurbanliri yéqinliridin jewlan shirmemet ependim, saqchilarning buyruqi boyiche xitayning istanbul konsulxanisining aldida dawamlishiwatqan “Millet nöwette” pa'aliyitini waqtinche toxtatqanliqini bildürdi.

Lagér qurbanliri yéqinliridin 12 kishi 2020-yili 18-dékabir küni istanbuldiki xitay konsulxanisining aldida “A'ile nöwette” pa'aliyitini bashlighanidi. Pa'aliyet bu yil 3-féwral enqerediki xitay elchixanisining aldigha yötkelgen bolup, “A'ile nöwette” pa'aliyiti xitayning qirghinchiliq siyasitining zerbisige uchrighan téximu köp kishilerning awaz qoshushi bilen “Millet nöwette” pa'aliyitige özgertilgenidi. Bu pa'aliyetke yawropa, yaponiye we amérika qatarliq dölet we rayonlardiki köpligen lagér tutqunlirining yéqinliri awaz qoshqanidi

Enqere we qeyseride ötküzülüwatqan “Millet nöwette” pa'aliyitige türkiye bixeterlik tarmaqliri yol qoymighanliqi seweblik, 21-féwral küni enqerediki lagér qurbanliri yéqinliri istanbulgha qaytqanidi.

Türkiyede koruna wirusi weqelirining dawamliq éship bérishi seweblik ramzan éyida qaytidin waba tedbirliri yolgha qoyulghan bolup, pa'aliyetchiler ramzan éyidin kiyin pa'aliyitini qaytidin dawamlashturidighanliqini bildürüshti.

Ziyaritimizni qobul qilghan lagér qurbanliri yéqinliridin medine nazimi xanim 120 künlük pa'aliyet jeryanida, türkiyediki Uyghur jama'itining qizghin awaz qoshqanliqini, türkiyediki siyasiy partiyeler we puqrawi teshkilatlarning zor qollishigha érishkenlikini éytti we mundaq dédi: “Pa'aliyetni biz 12 kishi bashlighaniduq. Bügün yüzlerche kishi bizge qétildi. Pütün Uyghur qérindashlar hemmimiz bir sep bolup, zalim xitayning qarshisida 120 künning yaqi tik turuwatimiz. Pa'aliyetni élip bérish jeryanida xelqimizning bir-birige bolghan méhir muhebbitini, öz milliti we a'ilisi üchün qurbanliq bérishtin bash tartmaydighanliqini körduq”.

Lagér qurbanliri yéqinliridin biri doktor burhan ulughyol ependim ziyaritimizni qobul qilip türkiyening korona wirusi wabasi tedbirliri seweblik toxtap qalghan “Millet nöwette” pa'aliyitini tedbirler boshighandin kéyin dawamliq élip bérilidighanliqini éytti.

Xitay hökimiti lagir qurbanliri yiqinlirining a'ile tawi'abatlirini mejburi sözlitip, xitay hökimitining Uyghur élidiki qirghinchiliq siyasetlirini aqlashqa urunup kéliwatqan bolup, lagér qurbanliri yiqinliridin mirzexmet ilyasoghli ependi ziyaritimizni qobul qilip xitayning süpetsiz siyasiy teshwiqatlar arqiliq dunyani aldiyalmaydighanliqini éytti.

Millet nöwette pa'aliyiti bashlan'ghandin buyan türkiye we pütün dunyada zor ghulghula qozghighan bolup, kishilerning diqqitini xitayning Uyghurlarni nishan qilghan yighiwélish lagéri we xalighanche tutqun qilish siyasitige qaritishta muhim rol oynighan. Közetküchiler, yéngi we özgiche qarshiliq pa'aliyetning xitayning qirghinchiliq siyasetlirini dunyagha ashkarilashta zor ehmiyetke ige ikenlikini tekitleshmekte.