17-Maydin bashlap “Millet nöwette” pa'aliyiti türkiyede qaytidin dawam qilmaqta

Xitay hökümitining Uyghur élidiki qirghinchiliq siyasetlirining zerbisige uchrighan qurbanlarning türkiyediki yéqinliri 2020-yili 18-dékabir küni istanbuldiki xitay konsulxanisining aldida “A'ile nöwette” pa'aliyitini bashlighanidi. Mezkur pa'aliyet 3-féwral enqerediki xitay elchixanisining aldigha yötkelgen bolup, shuningdin buyan pütün dunyadiki xitay diplomatik organlirining aldida dawamliship kelmekte.

3-Féwraldin buyan “Millet nöwette” nami bilen dawamlashqan mezkur pa'aliyet enqerede we qeyseride türkiye dölet xewpsizlik xadimliri teripidin mejburi tarqitiwétilgen bolup, pa'aliyet peqet xitayning istanbuldiki konsulxanisining aldida élip bérilishigharuxset qilin'ghan idi.

Xitayning istanbuldiki konsulxanisining aldida dawamlishiwatqan “Millet nöwette” pa'aliyiti 17-apiril küni, yeni mezkur pa'aliyetning 120-künide türkiye hökümitining ramazan éyida yolgha qoyghan yéngi koruna wirusi tedbirliri seweblik waqtinche toxtitilghanidi.

Türkiyening korona wirusi tedbirlirining boshitilishi bilen 17-may künidin bashlap, lagér qurbanlirining türkiyediki yéqinliri pa'aliyitini qaytidin dawamlashturdi.

Lagér qurbanliri topining mes'ulliridin medine nazimi xanim ziyaritimizni qobul qilip, mezkur pa'aliyetning bügündin bashlap qaytidin bashlan'ghanliqini, her küni etigen sa'et 9 din chüsh sa'et 12 giche élip bérilidighanliqini éytti.

Lagér qurbanliri yéqinlirining pa'aliyetliri türkiyede herxil tosqunluqlargha we qiyinchiliqlargha uchrawatqan bolsimu, emma pa'aliyetlirini üzlüksiz dawamlashturush üchün eng yuqiri chekte tirishchanliq körsitip kelmekte.

Ziyaritimizni qobul qilghan lagér qurbanliri topining mes'ulliridin jewlan shirmemet ependim ziyaritimizni qobul qilip, mezkur pa'aliyetning omumiy jeryani heqqide radiyo anglighuchilirimizgha tepsiliy melumat berdi.

Medine nazimi xanim ziyaritimiz dawamida pa'aliyetchilerning özlirining uruq-tughqanliri we a'ile ezalirining erkinliki üchün mezkur pa'aliyetke dawamliq qatnishidighanliqigha ishinidighanliqini, a'ile ezalirini qutuldurmighuche mezkur pa'aliyetni hergiz toxtatmaydighanliqini éytti.

Xitay hökümitining Uyghur élidiki qirghinchiliq siyasitining tesiride Uyghurlarni asas qilghan milyonlighan yerlik musulman xelqler ziyankeshlikke uchrawatqan bolup, xitayning mezkur siyasitining tesiride nurghunlighan a'ililerning parchilan'ghanliqi we xaniweyran bolghanliqi otturigha qoyulmaqta.

Muhajirettiki Uyghurlarning xitayning ziyankeshlikige uchrawatqan uruq-tughqanliri üchün teshkillep kéliwatqan türlük pa'aliyetliri dunyada küchlük ghulghula qozghimaqta.