Dangliq sen'etkar polat hézimof: qolumdin kelginiche millitim üchün xizmet qiliwatimen

Almutadin ixtiyariy muxbirimiz oyghan teyyarlidi
2023.07.03
qazaqistan-polat-hezimof-01-1024 Qazaqistanning emgek singdürgen xizmetchisi atiqigha sazawer bolghan polat hezimof mukapatlash murasimida. 2023-Yil iyun astana
RFA/Oyghan

Hazirqi ottura asiya jumhuriyetliri ichide qazaqistanda eng köp ziyaliylar qoshunining mewjut ikenliki melum. Eyni waqitlarda, yeni sowét ittipaqi dewride qazaqistanda barliq sahelerde dégüdek kadirlar yétiship chiqqan idi. Ularning beziliri peqet qazaqistandila emes, belki pütkül dunyagha meshhur bolghan.

Ene shu dewrde terbiyelinip, bügünki künde qazaqistanning omumiy tereqqiyatigha öz töhpilirini qoshup kéliwatqan Uyghur xelqi wekilliri az emes. Shularning biri polat hézimof yéqinda “Qazaqistan jumhuriyitining emgek singdürgen xizmetchisi” dégen ataqqa sazawer boldi. Mezkur mukapatlash murasimi qazaqistan paytexti astana shehirining jumhuriyetlik milliy muzéyida ötti.

Qazaqistanning emgek singdürgen xizmetchisi atiqigha sazawer bolghan polat hezimof mukapatlash murasimida. 2023-Yil iyun astana
Qazaqistanning emgek singdürgen xizmetchisi atiqigha sazawer bolghan polat hezimof mukapatlash murasimida. 2023-Yil iyun astana
RFA/Oyghan

Qazaqistanda bir nechche yillardin buyan barliq saheler boyiche “Qazaqistan jumhuriyitining töhpikar xizmetchisi” namida musabiqe ötküzülüp kelmekte. Uning asasiy meqsiti musteqilliq yilliri, yeni 30 yildin oshuq waqit mabeynide memliketning omumiy tereqqiyatigha töhpe qoshqan shexslerni terghib qilish hemde ularni yashlargha ülge qilishtur.

Biz tonulghan sen'etkar, polat hézimof ependi bilen söhbetleshtuq. Uni mezkur mukapat bilen tebrikliginimizde, mundaq dédi: “Chong hesse qoshtum dep éytalmaymen. Millitim üchün qolumdin kélishiche xizmet qiliwatimen. Bu méning eng chong xizmitim. Uyghur xelqining milliy marshini ishlep chiqtim. Bu méning millitim üchün qoshqan chong bir ülüshüm dep hésablaymen. Yash waqitlirimda püwleydighan chalghu eswablardin bashqa hemmini chalalaymen, dep oylayttim” .

Polat hézimof her qandaq bir ademning öz armini bolsimu, bezide u armanni kéyin'ge qaldurup, xelq üchün xizmet qilish yolini tallaydighan ishlarning yüz béridighanliqini otturigha qoydi. U özining qandaqlarche sen'et sahesige kélip qalghanliqini mundaq dep chüshendürdi: “Men mektepte oquwatqan chaghlirimda héch qachan artis bolimen dep oylimayttim. Méning arminim chish doxturi bolush idi. Shuning üchün chish doxturi oqushini tügitip, 11 yil chish doxturluq saheside ishlidim. Ishtin sirt beribir méni muzika özige tartip turdi. Hazirqi “Yarkent bulbulliri” ansambili bilen toy-tökün, olturush, meshreplerde bille bolup, özüm yaxshi köridighan sahe-muzikigha kiriship kettim, désem bolidu.”

Qazaqistanning emgek singdürgen xizmetchisi atiqigha sazawer bolghan polat hezimof érishken médal. 2023-Yil iyun astana
Qazaqistanning emgek singdürgen xizmetchisi atiqigha sazawer bolghan polat hezimof érishken médal. 2023-Yil iyun astana
RFA/Oyghan

Polat hézimof mushu kün'giche barliq diqqitini öz perzentlirini milliy rohta terbiyeleshke qaratqan bolsa, emdi küchini özining söyümlük newrilirige serp qilishqa teyyar ikenlikini otturigha qoydi. U özining bolupmu yash ewladlarning milletning kélechiki ikenlikini yaxshi chüshen'genliktin yash sen'etkarlarni terbiyeleshke alahide köngül bölgenlikini bayan qildi: “Men chish doxturi bolup ishlewatqanda bir küni yash balilar “Polat aka, sen bizge ögetseng, bizmu sendin ögensek” dédi. Shuning bilen men besh-alte balining béshini qoshup, ishtin sirt ögitishke bashlidim. Ularning sani 18 ge yétip bardi. Uning namini “Diyar” ansambili dep qoyduq. Bir az waqit ötmestinla jumhuriyetlik musabiqige bérip, birinchilikni alduq. Kéyin ansambildiki adem sani 37 ge bardi. Men yarkenttin almutagha köchkende u ansambil qélip qaldi. Uningdin bashqa almutada ‛adash‚, qizlarning ‛leyli‚ guruppisini, ‛irade‚ ansambilini qurduq.”

Biz qazaqistandiki Uyghur milliy sen'itide uzun yillardin buyan xizmet qilip kéliwatqan tonulghan rézhissor, qazaqistanning xizmet körsetken erbabi yalqunjan shemiyéf ependi bilen alaqileshkinimizde, u polat hézimofning Uyghur milliy sen'itige salmaqliq töhpe qoshup kéliwatqan meshhur sen'etkarlarning biri ikenlikini bildürdi. Uning éytishiche, polat hézimof dangliq “Yarkent bulbulliri” ansambilida alahide orunni igileydiken. Buningdin tashqiri “Diyar” , “Tarim” we bashqimu ansambillarni qurushta hel qilghuchi rol oynighan iken.

U mundaq dédi: “Polat hézimof u kompozitor. Xéli yaxshi naxshilarni yézip, xelqqe tonulghan balilarning biri. Kéyinki yillarda bizning kompozitorlirimizning ishliri anche körün'gen emes. Polatning bir yaxshi yéri, özi kespiy kompozitor bolmisimu, biraq xelq ichidin chiqqan xelq ijadkari, xelq kompozitori. Polatning yene bir alahidiliki, medeniyet merkezliri bolsun, shularning ishlirigha köp hesse qoshqan. Polatning ademgerchilikimu küchlük. Nomusi we wijdani bar. Xelqimge yardem qilay dep nurghun ishlarni qildi.”

Yalqunjan shemiyéf polat hézimofning dangliq naxshichi we kompozitor merhum murat nasirofning xatirisige béghishlan'ghan köpligen féstiwallarni ötküzüshke köp küch chiqarghanliqini ilgiri sürdi. U polat hézimofni bu mukapati bilen qizghin tebriklep, semimiy tileklirini bildürdi.

Quddus ghojamyarof namidiki dölet akadémiyesi Uyghur muzikiliq komédiye tiyatiri terkibidiki “Nawa” ansambilining sen'et yétekchisi niyaz tursunof ependi polat hézimofning bolupmu qazaqistandiki we Uyghur élidiki milliy sen'et otturisidiki alaqilerning mustehkemlinishide zor rol oynighanliqini bayan qildi.

Niyaz tursunof mundaq dédi: “U tiyatir bilen nahayiti yéqin alaqide bolup, özining sen'ettiki yolini birlikte élip mangdi. Bolupmu yashlarni terbiyeleshke küch serp qildi. Ürümchide bizning balilar oqup chiqqandin kéyin tiyatirda ularni ishqa élishqa shara'it bolmay qaldi. Shu peytte polat hézimof “Irade” ansambilini qurup, shuni bashqurdi. Bu yerde yarkenttiki dilshatning emgiki chong boldi. Shu balilarni qaytidin weten'ge élip kirip, hemme chiqimni öz zimmisige aldi. Ene shuning qéshida polat hézimof boldi. Andin mushu kün'giche ‛tarim‚ ansambilini bashqurup, qazaqistanda bolsun, chet ellerde bolsun, tonuydighan ansambil derijisige yetti. Mushu yerdimu polatning emgiki intayin chong.”

U polat hézimfoning yétekchilikide “Tarim” ansambilining yéqinda chong konsértining ötkenlikini tekitlep, tiyatirning uning bilen bolghan alaqisining buningdin kéyinmu mustehkemlinishige ishench bildürdi. U eyni waqitlarda ürümchide bilim élip kelgen yashlarning hazir tiyatirda ünümlük ishlewatqanliqini bildürdi.

Polat kamal oghli hézimof 1964-yili qazaqistanning yarkent shehiride dunyagha kelgen. Ottura mektepni tamamlap, almutadiki jumhuriyetlik méditsina mektipini tamamlighan؛ yarkent shehiride chish doxturi bolup ishligen. Andin sen'et saheside ishlep, 70 ke yéqin Uyghur we qazaq muzikilirini ijad qilghan. Uning eserliri hazir qazaqistandila emes, uning sirtidimu yaxshi tonush.

 

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.