Қазақистан вәкиллири иккинчи нөвәтлик шәрқий түркистан миллий кеңишиниң роһини хәлққә йәткүзмәктә

Ихтиярий мухбиримиз ойған
2022.06.09
Share on WhatsApp
Share on WhatsApp
Дуня уйғур қурултийиниң қазақистандики вәкиллири йеңи хизмәт пиланлирини түзди Д у қ ниң 7-нөвәтлик вәкилләр қурултийиға қазақистанлиқ вәкилләрдин 39 адәм тор арқилиқ иштирак қилған. 2021-Йили 14-ноябир, алмута.
RFA/Oyghan

Йеқинда германийәниң мюнхен шәһиридә өткүзүлгән иккинчи нөвәтлик шәрқий түркистан миллий кеңиши, пүткүл дунядики уйғурларниң, шу җүмлидин қазақистандики уйғурларниңму диққәт мәркизидә болмақта. Бәзи обйектип сәвәбләргә көрә, шәрқий түркистан миллий кеңишиниң хәвири гәрчә қазақистандики аммивий ахбарат васитилирида хәвәр қилинмиған болсиму, әмма қазақистандин миллий кеңәшкә қатнашқан вәкилләр бу мәмликәттики мумкинчиликләргә тайинип, бу йиғинниң роһини хәлққә йәткүзүшкә тиришмақта. Бу җәһәттә дуня уйғур қурултийиниң алий мәслиһәтчиси, сиясәтшунас қәһриман ғоҗамбәрдиниң иҗтимаий таратқуларда тарқитиливатқан “ахбаратнамә” намлиқ тор журнили муһим рол ойнимақта.

6-Июнда йезилған мәзкур “ахбаратнамә” дики мақалиниң мавзуси “дуня уйғур қурултийиниң рәһбәрликидики 23 тәшкилатниң саһибханлиқида 2022-йили 26-28-май күнлири германийәниң мюнхен шәһиридә мувәппәқийәтлик өткүзүлгән 2-нөвәтлик шәрқий түркистан (уйғуристан) миллий кеңиши” дәп қоюлған. Мақалә аптори қәһриман ғоҗамбәрди мәзкур кеңәш һәққидә йезилған чоң һәҗимлик мақалисини улуғ уйғур мутәппәкүри йүсүп хас һаҗибниң “адаләт вә қанун-асманниң түврүкидур, түврүк қиңғайса асман өрә туралмайду” дегән сөзи билән башлиған.

Икки қисимлиқ бу мақалидә иккинчи нөвәтлик шәрқий түркистан миллий кеңиши һәққидә тәпсилий мәлумат берилгән, ахирида пүткүл уйғурларға мураҗиәт қилип, мундақ дейилгән: “әзиз вәтәндашлар! есимиздә болсунки, әмди әң муһими д у қ рәһбәрликидә дуняниң һәрқайси җайлирида паалийәт елип бериватқан уйғур тәшкилатлири, шу җүмлидин қазақистандики д у қ вәкиллири вә уларниң җанкөйәрлири, омумән һәр қандақ бир вәтәнпәрвәр шәхс өзлири туруватқан дөләтләрдики һөкүмәтләргә, сиясий партийә вә тәшкилатларға һәмдә биваситә уйғур хәлқигә иккинчи нөвәтлик шәрқий түркистан (уйғуристан) миллий кеңишиниң роһини һәмдә хитапнамәсиниң маһийитини йәткүзүштә тиришчанлиқ көрситиши керәк. Бу вәтән, милләт алдидики муқәддәс бурчимиздур.”

Йәнә бир тәрәптин, дуня уйғур қурултийиниң қазақистандики вәкиллири җай-җайларда болуватқан уйғурларниң нәзир-чирақ, той-төкүн вә башқа йиғилишлириға қатнишип, иккинчи нөвәтлик шәрқий түркистан (уйғуристан) миллий кеңишиниң роһини җамаәткә йәткүзмәктә. Йеқинда қәһриман ғоҗамбәрди башлиқ бир гуруппа уйғур паалийәтчилири алмута шәһириниң уйғурлар зич олтурақлашқан горний гигант мәһәллисидә вә алмута вилайитиниң талғир наһийәсигә қарашлиқ бесағаш йезисида өткән нәзирләрдә аһалә билән учришип, бу һәқтики учурларни аңлатқан.

Радийомиз зияритини қобул қилған дуня уйғур қурултийиниң қазақистандики вәкили, иккинчи нөвәтлик шәрқий түркистан миллий кеңишиниң қатнашқучиси рәһим мәнсуроф әпәнди мундақ деди: “йигирмидәк мәмликәт парламентлири бизни қоллап, бизгә һәр даим уйғур дәвасини тохтатмаңлар, бизму силәр билән биллә, деди. Шуму чоң бир хушаллиқтур. Рәисимиз долқун әйсаниң һәммимизниң нийити бир, дүшминимизму бир, вәтәнниң азадлиқи үчүн бирликтә ишләйли, дегән сөзи һәммимизгә яқти. Биз кәлгәндин кейин тинч турмидуқ. Горний гигант мәһәллисидә, бесағаш йезисида өткән нәзирләрдә хәлқ бизни диққәт билән тиңшиди.”

Рәһим мәнсуроф иккинчи нөвәтлик шәрқий түркистан миллий кеңишиниң роһини, шуниңдәк дуня уйғур қурултийиниң паалийәтлири һәққидики хәвәрләрни тохтимай хәлқ арисида тәшвиқ қилидиғанлиқини билдүрди.

Зияритимизни қобул қилған талғир наһийәлик йигит беши кеңишиниң рәиси өктәбир қурбаниязоф әпәнди, дуня уйғур қурултийи вәкиллириниң келип, иккинчи нөвәтлик шәрқий түркистан миллий кеңиши һәққидә мәлумат бәргәнликини, шуниңдәк қазақистандики уйғурларниң бүгүнки күндики вәзипилирини оттуриға қойди.

Дуня уйғур қурултийи маарип комитетиниң мудири, филологийә пәнлириниң намзат доктори дилнур қасимова ханимму радийомиз зияритини қобул қилип, бүгүнки күндә уйғур дәвасини қиливатқан паалийәтчиләрниң билимини көтүрүш лазимлиқини тәкитлиди. У мундақ деди: “биз миллий кеңәш җәрянида көплигән мутәхәссисләрниң сөзлирини аңлидуқ. Бизниң дәвайимиз намайишлар биләнла түгимәйду. Биз өзимизму бу саһәдики мутәхәссисләрдин болушимиз керәк. Чүнки бүгүнки күндә қорал билән биз бир нәрсини йеңәлмәймиз. Биз вәтинимизниң азадлиқини қанун арқилиқ тәләп қиливатимиз. Буниң үчүн қануний билимимизни ашурушимиз керәк.”

Дилнур қасимова йәнә уйғур дәвасида һәр қандақ гуваһлиқ көрситәләйдиған һөҗҗәтләрниң вә гуваһчиларниң муһим рол ойнайдиғанлиқини, буниң барлиқини хәлққә йәткүзүшниң зөрүрликини, буниң үчүн тәшвиқат ишлирини техиму күчәйтиш керәкликини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.