Tutqun mir'adil hesenning bir mehel nenjing qamaqxanisida tutup turulghandin kéyin ürümchige yötkelgenliki delillendi

Muxbirimiz shöhret hoshur
2020-12-02
Share
Tutqun mir'adil hesenning bir mehel nenjing qamaqxanisida tutup turulghandin kéyin ürümchige yötkelgenliki delillendi Ijtima'iy taratqularda özining jyangsu ölkiside turuwatqanliqini ilgiri sürgen mir'adil hesen Uyghur rayonida irqiy qirghinchiliq dawam qiliwatqanliqini otturigha qoymaqta. 2020-Yili séntebir.
Social Media

Bu yil 9‏-ayning deslepki heptisi xitayda turup xitaygha qarshi bayanat élan qilghan aqsu onsuluq mir'adil hesen, bayanatidin 3 kün kéyin ghayip bolghan we muxbirimizning éniqlashliri dawamida uning jyangsu saqchiliri teripidin tutqun qilin'ghanliqi delillen'gen idi.

Weziyetttin xewerdar kishilerdin biri ötken hepte muxbirimizgha uchur yollap, xitayda turup xitaygha qarshi bayanat élan qilghan tutqun mir'adil hesenning bir ayche nenjing qamaqxanisida tutup turulghandin kéyin ürümchige yötkep kétilgenlikini melum qildi. Téléfonimizni deslepte qobul qilghan jyangsu ölkilik j x xadimliri mir'adil hesenning ehwalidin xewersizlikini éytti. Radiyomizgha kelgen inkasta mir'adil hesenning "Milliy bölgünchilik" gumani bilen tutqun qilin'ghanliqi qeyt qilin'ghan idi.

Mir'adil hesen eyni chaghda élan qilghan 3 qétimliq bayanatida xitayning Uyghur rayonida irqiy qirghinchiliq élip bériwatqanliqini özi shahid bolghan bir qisim pakitlar bilen otturigha qoyghan idi. Téléfonimizni qobul qilghan nenjingdiki alaqidar saqchi xadimi "Mir'adil hesenning xitay dölitige qara sürkigenliki üchün tutulghanliqi we nöwette Uyghur rayonigha yolgha sélinip bolghanliqi" ni bayan qildi. Emma u mir'adilning konkirét qandaq jinayet gumani bilen tutulghanliqini tilgha almidi.

Mir'adil hesen mezkur bayanatida özining aqsu onsudiki mezgilide lagérgha ekitilish xewpige duch kelgende, yurtidin ayrilip xitay ölkilirige qachqanliqini we bir yildin artuq bu ölkilerde sersan hayat kechürgenlikini bayan qilghan. Emma u hayatining bu chaghdiki minutlirini "Uyghuristan azatliq herkiti" dep qaraydighanliqini bayan qilghan. U bu sözliri arqiliq özining onsudin xitay ölkilirige seper qilishi we jaylardiki mükünüp yürüshining jan saqlash üchün emes, belki Uyghur qirghinchiliqini dunyagha ashkarilash üchün bir purset kütüsh we purset yaritish jeryani ikenlikini isharetligen.

Téléfonimizni qobul qilghan nenjingdiki alaqidar saqchi xadimi üzlüksiz so'allirimizgha jawaben mir'adilning ehwalini nenjing sheherlik saqchi idarisidin sorishimizni tewsiye qildi. Xadimlardin biri mir'adil hesenning ürümchige qayturulup bolghanliqini bayan qilghan bolsimu, emma qayturulushtin awwal qaysi qamaqxanida yatqanliqini tilgha almidi. Mezkur saqchi idarisidiki yene xadim, mir'adil hesenning nenjing sheherlik qamaqxanida bir mehel tutup turulghanliqini ashkarilidi. Nenjing sheherlik qamaqxana xadimi mir'adil hesenning bu qamaqxanida bir mehel yatqanliqini delillidi. Emma u mir'adilning éniq qachan tutulghanliqi, qanchilik yatqanliqi we qaysiy ayning qaysi küni ürümchige yötkelgenliki heqqide melumat bérishni ret qildi. Bu xadim gep arisida özining bu heqte melumati barliqini, emma xizmet tüzümi seweplik bu uchurlarni ashkariliyalmaydighanliqini eskertti. U axirida bu heqte melumat élish üchün qamaqxanining memuriy ishxanisidin melumat élishimizni tewsiye qildi. Lékin mir'adil hesen yatqan nenjing qamaqxanisining éniq orni heqqidiki so'alimizgha jawap bérishni keskin ret qildi.

Mir'adil hesen bayanatida bashtin-axir eng xeterlik düshmenning qorqunchaqliq ikenlikini nuqtiliq halda tekitligen we qorqunuchtin qutulmay turup héchqandaq bir düshmenning üstidin ghalip kelgili bolmaydighanliqini eskertken. U özining xitay ölkiside xitaygha qarshi bayanat bérelishining sewebinimu bu bayanliri we emeliy herkiti arqiliq namayen qilghan idi.

Biz mir'adilning Uyghur rayonigha yollan'ghandin kéyin qaysi qamaqxanigha apirilghanliqini éniqlash üchün Uyghur aptonum rayonluq idare-jem'iyetlerge téléfon qilduq. Uyghur aptonum rayonluq qatnash saqchi etritining bir xadimi özlirining bu délodin xewersizlikini éytti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet