Язғучи вә шаир һаҗи мирзаһид кериминиң 82 йешида түрмидә вапат болғанлиқи дәлилләнди

Мухбиримиз шөһрәт һошур
2021-01-15
Share
язғучи вә шаир һаҗи мирзаһид кериминиң 82 йешида түрмидә вапат болғанлиқи дәлилләнди Уйғур елида тонулған, һазир қәшқәрдә яшаватқан атақлиқ шаир вә язғучи һаҗи мирзаһид керими. (Орни вә вақти ениқ әмәс)
Photo: RFA

Оттуз йилдин артуқ хитайниң түрмә вә нәзәрбәтнлирини баштин кәчүргән, шундиму һәқни сөзләш вә йезиштин қилчиму янмиған, уйғур хәлқигә "йүсүп хас һаҗип", "мирза абабәкри", "султан абдурешитхан" қатарлиқ алтундин қиммәт тарихий әсәрләрни қалдуруп кәткән пишқәқәдәм шаир, әдиб, тарихчи һаҗи мирзаһид кериминиң 82 йешида хитай түрмисидә җан үзгәнлики дәлилләнди.

Әдиб, шаир һаҗи мирзаһид кериминиң қәшқәрдә түрмидә җан өзгәнлики һәққидә иҗтимаий ахбаратларда учур тарқалғандин кейин, биз қәшқәрдики алақидар сақчи органлириға телефон қилип, бу һәқтә мәлумат соридуқ. Хадимлар илгирикигә охшашла бу темида гәп қилиштин өзлирини тартти.

Хәвәр архиплиримизидин мәлум болушичә, йигирмә яш вақтисда түрмигә ташланған, түрмидин чиқип йәнә узун мәзгил нәзәрбәнд астида яшиған, әдиб һаҗи мирзаһид керими йеши 80 йеқинлашқан йиллардиму, һәқни сөзләш вә хәтәргә тәвәккүл қилиштин янмиған иди. У 2017-йили йил 6‏-айниң 17-күни радийомиз мухбириниң зияритини қобул қилип, өзиниң "йүсүп хас һаҗип", "җудалиқ", "султан сәидхан", "султан абдурешитхан", "мирза абабәкри" қатарлиқ 7 томлуқ 5 тарихий романини хитай сақчилириниң өй ахтуруп елип чиқип кәткәнликини паш қилған иди. Мәлум болушичә, хитай тәрәп мәзкур китаблардики диний мәзмунлардин биарам болған, һаҗи мирзаһид керими шу күни хитай сақчилириға өзиниң илгириму гуман билән тутқун қилинип, 20 йиллиқ кесилгәнлики вә 13 йил түрмидә ятқанлиқини әскәртип, сақчиларни гуманхорлуқтин сақлинишқа дәвәт қилған. Әмма сақчилар униң шу 5 романидин башқа, техи елан қилинмиған бир қисим әсәрлириниңму қол язмилириниму елип чиқип кәткән.

Аридин бир йил өткәндә қәшқәрдики алақидар бир сиясий-қанун кадири, қәшқәр уйғур нәшриятиниң пенсийәгә чиққан вә вәзипидики болуп 30 пирсәнт ишчи-хизмәтчисиниң тутқунда икәнликини паш қилған вақтида, әң башта тутулған вә кесилгәнләр арисида һаҗи мирзаһид кериминиң барлиқини ейтқан вә униң 11 йиллиқ кесилгәнликини тилға алған иди. Алақидар хадим һаҗи мирзаһид кериминиң тутулушиға язған китаблиридин башқа, өзигә атап өткүзүлгән бир қетимлиқ тон кийдүрүш мурасимида қилған сөзи сәвәбликму сораққа дуч кәлгәнликини паш қилған иди. Һаҗи мирзаһид керими әйни чағда радийомиз зияритини қобул қилған вақтида, өзини йоқлап кәлгән оқурмәнләр сәвәблиму сорақққа тартилғанлиқи мәлум болған иди.

Ениқлашлиримиздин мәлум болушичә, һаҗи мирзаһид керими бу йил9-январ күни қәшқәрдә түрмидә җаза муддитини өтәватқан мәзгилидә җан үзгән. Алақидар бир сақчи хадиминиң дейишичә, мәрһумниң кесили еғирлашқанда түрмидин дохтурханиға әкелингән вә дохтурханида җан үзгән.

Бу програмимизни мәрһумға атап йезилған, иҗтимаий таратқуларда тарқалған, аптори намәлум бир мәрсийә билән ахирлаштуримиз:

Яқ, сән техи яшап болмидиң

(Мәрһум мирзаһид керими устазға)

Давами бар қилған ишиңниң,

Ахири бар көргән чүшүңниң.

Баһари бар өткән қишиңниң,

Яқ, сән техи яшап болмидиң!

Гәплириң бар қилип болмиған,

Ишлириң бар билип болмиған.

Бир гүлхансән йенип болмиған,

Яқ, сән техи яшап болмидиң!

Техи талай арманлириң бар,

Техи талай арзулириң бар.

Гәрчә, дағда қалғанлириң бар,

Яқ, сән техи яшап болмидиң.

Сүрүватқан хияллириң бар,

Түзүватқан пиланлириң бар.

"изиңда көп қиранлириң бар,"

Яқ, сән техи яшап болмидиң!

Өмүр дегән пушайманға бай,

"арманиңдур юлтуз билән ай.

Көк асмандур ай көрүнәр җай,"

Яқ, сән техи яшап болмидиң!

2021-Йил 9-январ

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт