Toqsunda tün nispide yüz bergen yer tewresh kishilerni sarasimige salghan

25-Iyun tün nispide turpan wilayitining toqsun nahiyiside yüz bergen 5.4 Bal yer tewresh kishilerni sarasimige salghan. Radi'omiz turpan we toqsundiki méhmanxanilar we ahalilerge téléfon qilip igiligen ehwaldin melum bolushiche, yer tewrigendiki silkinish küchlük bolghan. Nahiye ichidiki öy-imaretlerde örülüsh ehwali körülmigen bolsimu, emma yézilardiki bir qisim déhqanlarning öyliri we mal-charwa qotanliri örülgen yaki dez ketken. Da'irilerning hökümet xewerliride yene, yer tewresh sewebidin jenubiy Uyghur élige qatnaydighan tömüryol liniyilirining turpan-toqsun bölikining waqtinche taqalghanliqi xewer qilindi. Diqqitinglar muxbirimiz méhribanning programmisida bolsun.

Xitay axbarat torining 25-iyun xewer qilishiche, 6-ayning 25-küni ürümchi waqti etigen sa'et 1 din 12 minut 51 sékunt ötkende shinjang Uyghur aptonom rayoni turpan shehiri toqsun nahiyisi (shimaliy kenglik 41.6707 Gradus, sherqiy méridi'an 88.356 Gradus) de 5.4 Bal ye tewrigen, yer tewresh chongqurluqi 9 kilométir bolghan.Toqsunda yer tewrigen mezgilde ürümchi, sanji sheherliridimu tewrinish bolghan. Égiz binalarda olturidighan bir qisim sheher ahaliliri binaning lingshighanliqini sezgen. Xewerde déyilishiche, turpan wilayitidin apet rayoni toqsun'gha ewetilgen xizmetchi xadimlar “Toqsunda ölüsh-yarilinish ehwali körülmidi” dep doklat qilghan.

Xitayning hökümet xewerliride 25-iyun tün nispidin ashqan mezgilide yüz bergen yer tewresh apitining keltürgen ziyini heqqide peyshenbe künigiche tepsiliy xewerler bérilmidi. Emma xitayning junggo xewerler torining 25-iyundiki xewiride,“ Toqsunda yüz bergen 5.4 Bal derijidiki yer tewresh sewebidin, ürümchi tömür yol idarisi, tömüryolning turpan-toqsun nahiyisi etrapidiki bölekliride tekshürüsh, rémont ishliri élip bérilidighanliqi,bu sewebtin jenubiy shinjang tömür yoli yü'érgo békitidin korla shimaliy wogzalighiche؛ bakéshu békitidin qarasheher wogzalighiche, lenju shinjang tömür yoli turpan wogzalidin sen'géju'ang békitigiche bolghan ariliq qamal qilinidu” dep uqturush chiqirilghanliqini xewer qildi.

Toqsunda yüz bergen yer tewresh apiti heqqide uchur igilesh üchün, turpan we toqsundiki birqanche méhmanxana, réstoranlar toqsundiki hökümet organliri,yéziliq hökümet ishxaniliri qatarliqlar we toqsundiki sheher ahalisige téléfon qilip ehwal igiliduq.

Toqsundiki hökümet organlirigha urghan télifonlar jawabsiz qalghan bolsimu, emma méhmanxanilar we sheher ahalisige urghan téléfonimizdin toqsunda yüz bergen yer tewresh we ramzan mezgilidiki toqsun-turpan weziyiti we hökümetning ramzan cheklimisige da'ir bezi ehwallar melum boldi.

Turpan shehiridiki jinshin méhmanxanisining xitay millitidin bolghan ayal xizmetchisi 25-iyun kéche tün nispidin ashqanda özlirining qattiq tewrinishni hés qilghanliqini, kéyin xewerlerdin özliridin nechche yüz kilométir yiraqliqtiki toqsunda 5.4 Bal yer tewrigenlikini anglighan we turpanda qayta yer tewresh ehwali sézilmigen bolsimu, emma méhmanxana xadimliri we bu méhmanxanida yataq alghuchilarning yenila yüz bérish éhtimali bolghan yer tewreshtin ensirep,jiddiy halette ikenlikini bildürdi.

Emma bu xizmetchi xadim muxbirning uninggha téléfonni chet'eldin qiliwatqinini bilgendin kéyin, derhal gépini özgertip, yer tewreshning héchqandaq ziyan élip kelmigenliki we bu jayda weziyetning intayin yaxshiliqini tekitlidi.

U bayanida “Toqsunda hemme ehwal yaxshi, hiqchandaq chong ziyan bolmidi. Bu yerde weziyet intayin yaxshi, bixeterlikimizdin ensirigüdek ehwallar yüz bermidi” dep jawab berdi.

Toqsun nahiyisidiki dostluq yoligha jaylashqan toqsun méhman xanisining xitay millitidin bolghan xizmetchi xadimi kéche sa'et 1 din ashqanda yüz bergen qattiq silkinishte, méhmanxana dériziliri jaranglap, méhmanxana aldidiki kochidin ötüwatqan aptomobillarning silkinip yoldin chiqip ketkenlikini, tewreshtin kéyin méhmanxanidiki hemme kishining qorqup kochigha chiqip ketkenlikini nöwette özlirining yenila qattiq ensiresh ichide turuwatqanliqini bildürdi.

Uningdin yer tewresh sewebidin toqsun-turpan bölikidiki tömüryol liniyiside poyiz toxtap rémont qiliniwatqanliqi heqqidiki uxturushtin xewiri bar yoqluqini sorighinimizda, u sezgürlük bilen bu uxturushtin xewiri yoqluqini, toqsunda meyli siyasiy weziyet bolsun yaki bashqa ehwallar bolsun hemmisi yaxshi ikenlikini tekitlidi. We özining aldirashliqini bildürüp téléfonni qoyuwetti.

Téléfonimiz toqsun nahiye bazirigha yéqin jaydiki bir Uyghur a'ilisige ulan'ghinida, téléfonimizni alghan yashan'ghan xanim, qolum-qoshnilar bilen bolghan söhbette, ular turghan mehellide we nahiye ichide öy örülüsh we adem ölüsh ehwalini anglimighanliqini, emma toqsun etrapidiki yézilardiki apet heqqide radi'o-téliwizorlarda héchqandaq xewer bérilmigenliki üchün, yézilardiki apet ehwalidin xewersiz ikenlikini bildürdi.

Bu xanim téléfonning chet'eldin uruluwatqinini bilgendin kéyin, bu yilliq ramzan heqqide toxtilip, toqsunda özige oxshash yashan'ghanlarning roza tutqanliqini, emma hökümetning cheklimisi we “Qoghdash” qattiq bolghini üchün, yashlar, hökümet xizmetchiliri we oqughuchilarning “Köngülning arami, a'ilidikilerning xatirjemlikini nezerge élip roza tutmighanliqini” tekitlidi. Bu xanim yene ramzan mezgilide chet'eldin ulardin hal sorap urulghan téléfon üchün rehmet éytti.