Түркийәдики мәшһур бай мурат үлкәрниң баянати кишиләрниң наразилиқиға учриди

Ихтиярий мухбиримиз әркин тарим
2019-06-05
Елхәт
Пикир
Share
Принт
Түркийәдики йилдиз ширкәтләр гуруһи башқуруш һәйити рәиси мурат үлкәр.
Түркийәдики йилдиз ширкәтләр гуруһи башқуруш һәйити рәиси мурат үлкәр.
RFA/Erkin Tarim

Түркийә вәтән партийәсиниң уюштуруши билән истанбулда өткүзүлгән «түркийә-хитай тиҗарәт ишлар йиғини» да йилдиз ширкәтләр гуруһи башқуруш һәйити рәиси мурат үлкәрниң «һәммимиз хитайниң йенида» дегән сөзи кишиләрниң қаттиқ наразилиқиға учриди.

27-Май күни истанбулда чақирилған йиғин түркийәдики бәзи телевизийә қаналлирида тарқитилғандин кейин, иҗтимаий таратқуларда нурғун кишиләр наразилиқ баянати елан қилди. Парламент әзаси мустафа йенәроғлу «миллий гезит'ниң 3-июн күнидики санида елан қилинған баянатида ширкәт хоҗайини қайил қиларлиқ баянат елан қилмиғучә «үлкәр маркилиқ малларни сетип алмайдиғанлиқи» ни билдүргән. У, баянатида мәзкур ширкәтниң хитайниң уйғурларға елип бериватқан инсан қелипидин чиққан бесим сияситини унтуп хитайға мал сетишниң койида икәнликини, шуңа үлкәр маркилиқ буюмларни истемал қилмайдиғанлиқини баян қилған.

Истанбулда өткүзүлгән «түркийә-хитай тиҗарәт ишлири йиғини» да йилдиз ширкәтләр гуруһи башқуруш һәйити рәиси мурат үлкәр алди билән хитай әлчисигә вә бу йиғинни уюштурғанларға рәһмәт ейтип мундақ дегән: «мән хитай тоғрисидики көз қарашлиримни вә хитай билән болған тиҗарий мунасивитимдики тәсиратлиримни аңлатмақчимән. Һәр һалда буму йиғинимизниң мәқсити болса керәк. Биз кичик вақтимизда чоңлиримиз чини-мачин, йәни хитайлар вә хитай болмиғанлар дәп айрийтти дуняни, бу һазир һәқиқәт болди, дуня хитай вә хитай болмиғанлар дәп иккигә айрилди, бизму һазир хитай тәрәптә туруватимиз. Хитай билән болған арилиқимиз шунчә узақ туруқлуқ бүгүн бир йәргә җәм болуп музакирә қилип олтуруптимиз».

Мурат үлкәр әпәнди 2000-йилларниң башлирида хитайда өткүзүлгән бир йиғинда хитай армийәси баш штабиниң муавин башлиқи билән тонушқанлиқини, униң өзини хитайниң ғәрбигә мәбләғ селишини тәвсийә қилғанлиқини, униң тәлипи бойичә уйғур дияриға мәбләғ селип көп пул тапқанлиқини баян қилип мундақ дегән: «2000-йилларниң башлирида бир чүшәнчә институтиниң йиғинида хитай армийәси баш штаби муавин қомандани билән тонуштум. У мениң хитайниң ғәрбий районида мәбләғ селишим керәкликини деди. У йәрдики милләтләр сизниң қериндашлириңиз, уларға пайдиси болиду һәмдә дөләт сизгә алаһидә сиясәт елип берип, аз баҗ алиду, деди. Униңдин кейин биз уйғур райониға әң көп мал сатидиған ширкәткә айландуқ. Уйғур районидики егиз биналарниң үстидә еланлиримиз бар иди. Бүгүн хитайда 200 әтрапида дукинимиз бар, у дуканларда миң әтрапида хизмәтчи ишлитиватимиз. Йерим милярд долларлиқ тиҗарәт соммимиз бар, бу йетәрлик әмәс буни көпәйтишкә тиришимиз».

Йилдиз ширкәтләр гуруһи түркийәдики әң чоң ширкәтләр гуруһи болуп, көпрәк йемәк-ичмәк вә шакилат тиҗарити билән шуғуллиниду. Мәзкур ширкәтниң қурғучиси мурат үлкәрниң дадиси сабри үлкәр әпәнди уйғурларниң әйни замандики түркийә турушлуқ рәһбири әйса йүсүп алиптекин әпәндигә, шәрқий түркистан вәхпигә вә уйғурларға ярдәм қилған. 2000-Йилларниң башлиридин тартип уйғур дияриға мал сетип уйғурлардин пул тапқан. Шәрқий түркистан вәхпиниң сабиқ рәиси һамут гөктүрк әпәнди сабри үлкәр әпәндиниң уйғурларға маддий вә мәниви җәһәттин ярдәм қилғанлиқини баян қилди.

Үлкәр ширкитиниң қурғучиси сабри үлкәр 2012-йили аләмдин өткәндин кейин униң оғли мурат мәзкур ширкәтләр гуруһиниң хоҗайинлиқ вәзиписини өз үстигә алған. Бурун уйғурларға маддий вә мәниви җәһәттин ярдәм қилған үлкәр аилә ширкити 2 милйон уйғур җаза лагерлириға соланған бүгүнки күндә хитай тәрәптә туридиғанлиқини оттуриға қойди. Һамут гөктүрк әпәнди бу һәқтә көз қаришини баян қилди.

Һазир «вәтән партийәси» дәп атилидиған, бурунқи «ишчи партийәси» коммунизм идийәсини яқилайдиған бир сиясий партийә болуп, мәзкур партийә 1975-йили хитай коммунистик партийәси билән достлуқ әһдинамиси түзгән. Мәзкур партийә 44 йилдин буян түркийә-хитай мунасивитини күчәйтишкә тиришмақта. Мәзкур партийәниң улусал телевизийәси мәзкур йиғинни нәқ мәйдандин тарқатқандин кейин түркийәдики шәрқий түркистан аммиви тәшкилатлириниң қаттиқ наразилиқиға учриди. Истанбулдики шәрқий түркистан маарип вә һәмкарлиқ җәмийити уйғурларға үлкәр маркилиқ малларни сетивалмаслиқ тоғрисида чақириқ елан қилди. Мәзкур тәшкилатниң рәиси һидайәтуллаһ оғузхан әпәнди мәзкур чақириққа түркләрниму аваз қошушқа чақирғанлиқини баян қилди.

Йилдиз ширкәтләр гуруһи түркийәниң әң чоң ширкәтлиридин бири һесаблиниду. Мәзкур ширкәтниң қурғучиси сабри үлкәр 1940-йилларда қиримдин түркийәгә көчүп кәлгән татар аилисидә чоң болған. Биз униң оғли мурат үлкәргә телефон қилған болсақму алақә қуралмидуқ.

Пикирләр (0)
Share
Толуқ бәт