Türkiyediki meshhur bay murat ülkerning bayanati kishilerning naraziliqigha uchridi

Ixtiyariy muxbirimiz erkin tarim
2019-06-05
Élxet
Pikir
Share
Print
Türkiyediki yildiz shirketler guruhi bashqurush hey'iti re'isi murat ülker.
Türkiyediki yildiz shirketler guruhi bashqurush hey'iti re'isi murat ülker.
RFA/Erkin Tarim

Türkiye weten partiyesining uyushturushi bilen istanbulda ötküzülgen "Türkiye-xitay tijaret ishlar yighini" da yildiz shirketler guruhi bashqurush hey'iti re'isi murat ülkerning "Hemmimiz xitayning yénida" dégen sözi kishilerning qattiq naraziliqigha uchridi.

27-May küni istanbulda chaqirilghan yighin türkiyediki bezi téléwiziye qanallirida tarqitilghandin kéyin, ijtima'iy taratqularda nurghun kishiler naraziliq bayanati élan qildi. Parlamént ezasi mustafa yéneroghlu "Milliy gézit'ning 3-iyun künidiki sanida élan qilin'ghan bayanatida shirket xojayini qayil qilarliq bayanat élan qilmighuche "Ülker markiliq mallarni sétip almaydighanliqi" ni bildürgen. U, bayanatida mezkur shirketning xitayning Uyghurlargha élip bériwatqan insan qélipidin chiqqan bésim siyasitini untup xitaygha mal sétishning koyida ikenlikini, shunga ülker markiliq buyumlarni istémal qilmaydighanliqini bayan qilghan.

Istanbulda ötküzülgen "Türkiye-xitay tijaret ishliri yighini" da yildiz shirketler guruhi bashqurush hey'iti re'isi murat ülker aldi bilen xitay elchisige we bu yighinni uyushturghanlargha rehmet éytip mundaq dégen: "Men xitay toghrisidiki köz qarashlirimni we xitay bilen bolghan tijariy munasiwitimdiki tesiratlirimni anglatmaqchimen. Her halda bumu yighinimizning meqsiti bolsa kérek. Biz kichik waqtimizda chonglirimiz chini-machin, yeni xitaylar we xitay bolmighanlar dep ayriytti dunyani, bu hazir heqiqet boldi, dunya xitay we xitay bolmighanlar dep ikkige ayrildi, bizmu hazir xitay terepte turuwatimiz. Xitay bilen bolghan ariliqimiz shunche uzaq turuqluq bügün bir yerge jem bolup muzakire qilip olturuptimiz".

Murat ülker ependi 2000-yillarning bashlirida xitayda ötküzülgen bir yighinda xitay armiyesi bash shtabining mu'awin bashliqi bilen tonushqanliqini, uning özini xitayning gherbige meblegh sélishini tewsiye qilghanliqini, uning telipi boyiche Uyghur diyarigha meblegh sélip köp pul tapqanliqini bayan qilip mundaq dégen: "2000-Yillarning bashlirida bir chüshenche institutining yighinida xitay armiyesi bash shtabi mu'awin qomandani bilen tonushtum. U méning xitayning gherbiy rayonida meblegh sélishim kéreklikini dédi. U yerdiki milletler sizning qérindashliringiz, ulargha paydisi bolidu hemde dölet sizge alahide siyaset élip bérip, az baj alidu, dédi. Uningdin kéyin biz Uyghur rayonigha eng köp mal satidighan shirketke aylanduq. Uyghur rayonidiki égiz binalarning üstide élanlirimiz bar idi. Bügün xitayda 200 etrapida dukinimiz bar, u dukanlarda ming etrapida xizmetchi ishlitiwatimiz. Yérim milyard dollarliq tijaret sommimiz bar, bu yéterlik emes buni köpeytishke tirishimiz".

Yildiz shirketler guruhi türkiyediki eng chong shirketler guruhi bolup, köprek yémek-ichmek we shakilat tijariti bilen shughullinidu. Mezkur shirketning qurghuchisi murat ülkerning dadisi sabri ülker ependi Uyghurlarning eyni zamandiki türkiye turushluq rehbiri eysa yüsüp aliptékin ependige, sherqiy türkistan wexpige we Uyghurlargha yardem qilghan. 2000-Yillarning bashliridin tartip Uyghur diyarigha mal sétip Uyghurlardin pul tapqan. Sherqiy türkistan wexpining sabiq re'isi hamut göktürk ependi sabri ülker ependining Uyghurlargha maddiy we meniwi jehettin yardem qilghanliqini bayan qildi.

Ülker shirkitining qurghuchisi sabri ülker 2012-yili alemdin ötkendin kéyin uning oghli murat mezkur shirketler guruhining xojayinliq wezipisini öz üstige alghan. Burun Uyghurlargha maddiy we meniwi jehettin yardem qilghan ülker a'ile shirkiti 2 milyon Uyghur jaza lagérlirigha solan'ghan bügünki künde xitay terepte turidighanliqini otturigha qoydi. Hamut göktürk ependi bu heqte köz qarishini bayan qildi.

Hazir "Weten partiyesi" dep atilidighan, burunqi "Ishchi partiyesi" kommunizm idiyesini yaqilaydighan bir siyasiy partiye bolup, mezkur partiye 1975-yili xitay kommunistik partiyesi bilen dostluq ehdinamisi tüzgen. Mezkur partiye 44 yildin buyan türkiye-xitay munasiwitini kücheytishke tirishmaqta. Mezkur partiyening ulusal téléwiziyesi mezkur yighinni neq meydandin tarqatqandin kéyin türkiyediki sherqiy türkistan ammiwi teshkilatlirining qattiq naraziliqigha uchridi. Istanbuldiki sherqiy türkistan ma'arip we hemkarliq jem'iyiti Uyghurlargha ülker markiliq mallarni sétiwalmasliq toghrisida chaqiriq élan qildi. Mezkur teshkilatning re'isi hidayetullah oghuzxan ependi mezkur chaqiriqqa türklernimu awaz qoshushqa chaqirghanliqini bayan qildi.

Yildiz shirketler guruhi türkiyening eng chong shirketliridin biri hésablinidu. Mezkur shirketning qurghuchisi sabri ülker 1940-yillarda qirimdin türkiyege köchüp kelgen tatar a'iliside chong bolghan. Biz uning oghli murat ülkerge téléfon qilghan bolsaqmu alaqe quralmiduq.

Toluq bet