Mustafa destichi: "Biz sherqiy türkistan dewasini, dunya Uyghur qurultiyini qollaymiz we hemkarlishimiz"

Ixtiyariy muxbirimiz erkin tarim
2021-06-30
Share
Mustafa destichi: Türkiye öktichi partiyelerdin "Büyük birlik partiyesi" ning re'isi mustafa destichi ependi Uyghur wekillerni enqerediki partiye merkizide qobul qildi. 2021-Yili iyun, enqere.
RFA/Erkin Tarim

Türkiye parlaméntidiki hökümetni qollawatqan öktichi partiyelerdin "Büyük birlik partiyesi" ning re'isi mustafa destichi ependi dunya Uyghur qurultiyi bash teptishi abdulhékim idris, Uyghur herikiti teshkilati re'isi roshen abbas xanim we Uyghur akadémiyesi wexpisi mu'awin re'isi abdulxemit qaraxan ependilerni enqerediki partiye merkizide qobul qildi. Mezkur partiyening mu'awin re'islirimu qatnashqan bu uchrishishta mustafa destichi ependi sherqiy türkistan mesilisining partiyesining eng muhim mesilisi ikenlikini, türkiyediki hakimiyet béshidiki adalet we tereqqiyat partiyesi bilen ittipaqdash partiye bolush süpiti bilen türkiyediki Uyghurlar duchar boluwatqan qiyinchiliqlarni hel qilip bérishke tirishidighanliqini, sherqiy türkistan ammiwi teshkilatliri bilen bolghan hemkarliqini téximu bek kücheytidighanliqini bayan qildi.

26-Iyun küni ötküzülgen bu uchrishishta mustafa destichi ependi aldi bilen partiyesining bundin kéyin sherqiy türkistan dewasini téximu köp qollaydighanliqini bayan qilip mundaq dédi: "Sherqiy türkistan biz üchün intayin muhim wetendur. Epsuski téxigiche xitayning ishghali astida. Xitayning bésim siyasiti bügünki künde irqiy qirghinchiliqqa aylandi. Biz her da'im tajawuzchi xitayning sherqiy türkistandin derhal chiqip kétishi kérek ikenlikini tekitlep kéliwatimiz. Hemde türkiyediki sherqiy türkistan ammiwi teshkilatlirini qollap kéliwatimiz. Bundin kéyin téximu bek qollaymiz".

Büyük birlik partiyesi 1992-yili qurulghan künidin tartip Uyghurlarni qollap kelmekte. Partiye rehbiri mustafa destichi da'im Uyghur teshkilatliri rehberliri we wekilliri bilen uchriship söhbetler ötküzüp turidu hem birqanche qétim Uyghurlarni qollash ammiwi pa'aliyetlirinimu uyushturghanidi.

D u q bash teptishi abdulhékim idris ependi we Uyghur herikiti teshkilati re'isi roshen abbas xanim türkiye kélechek partiyesining re'isi exmed dawut'oghlu bilen. 2021-Yili iyun, enqere.

Mustafa destichi ependi, amérika qatarliq chong döletlerning Uyghur dewasini qollishining zor ilgirilesh ikenlikini, partiyesining dunya Uyghur qurultiyi bilen hemkarlishishni kücheytidighanliqini bayan qilip mundaq dédi: "Hazir eng muhim bolghini sherqiy türkistan dewasining xelq'aralashqanliqidur. Amérika we birleshken döletler teshkilatining kün tertipige kélishi nahayiti muhim, chünki bular sherqiy türkistan dewasidiki zor ilgirilesh. Biz her da'im sherqiy türkistan dewasini qollaymiz we qollashni dawam qilimiz. Qeyerde bir sherqiy türkistanliq bolsa biz ularning qiyinchiliqlirini hel qilish üchün qolimizdin kelgenni qilimiz. Dunya Uyghur qurultiyining pa'aliyetlirini közitiwatimiz, sherqiy türkistanliqlarning awazi bolushqa tirishiwatidu, biz büyük birlik partiyesi bolush süpitimiz her da'im dunya Uyghur qurultiyi qollaymiz we hemkarlishimiz".

Arqidin dunya Uyghur qurultiyi bash teptishi abdulhékim idris ependi söz qilip, d u q we Uyghur herikiti teshkilati namidin büyük birlik partiyesige rehmet éytidighanliqini bayan qilip mundaq dédi: "Siz her da'im sherqiy türkistan dewasini qollap kelgenlikingiz üchün rehmet éytqili kelduq, bizni qobul qilghanliqingiz üchün köp rehmet. Biz sherqiy türkistanliqlar tarixta körülüp baqmighan irqiy qirghinchiliqqa duchar boluwatimiz. Biz bu zulumni dunya jama'etchilikige anglitishta zor qiyinchiliqlargha duchar boluwatimiz. Chünki, xitay 21-esirde sherqiy türkistanda insaniyetke qarshi jinayet sadir qiliwatidu. Bundaq bir peytte, dunya jama'etchilikining qollap-quwwetlishige éhtiyajimiz bar. Bizni téximu köp qollishingizni ümid qilimen".

Söhbet axirida abdulhékim idris ependi bilen roshen abbas xanim türkiyediki Uyghurlarning özlirige hawale qilghan teleplirini mustafa destichige yetküzdi. Mustafa destichi ependi bu teleplerni türkiye hökümitige yetküzidighanliqini bildürdi.

D u q bash teptishi abdulhékim idris ependi we Uyghur herikiti teshkilati re'isi roshen abbas xanim türkiye iyi partiyesining re'isi meral aqshener xanim bilen. 2021-Yili iyun, enqere.

Abdulhékim idris ependi bu uchrishish heqqidiki tesiratini bayan qilip, özlirining mustafa destichige d u q ning amérika we gherb döletliridiki pa'aliyetliri toghrisidimu tepsiliy melumat bergenliki we d u q bilen türkiyediki siyasiy partiyeler otturisidiki hemkarliqni kücheytish toghrisidimu muzakire élip bérilghanliqini bayan qildi.

Uyghur herikiti re'isi roshen abbas xanim bilen d u q bash teptishi abdulhékim idris ependi 21-iyundin 27-iyun künigiche enqerede élip barghan pa'aliyetliride yawropa döletlirining enqerede turushluq diplomatlirigha Uyghurlarning hazirqi éghir weziyiti toghrisida doklat bergendin sirt, iyi partiyesi re'isi meral aqshener xanim, kélechek partiyesi re'isi exmed dawut'oghlu qatarliqlar bilenmu körüshüp Uyghurlarning hazirqi éghir weziyiti we Uyghur mesilisining xelq'aradiki tereqqiyati toghrisidimu melumat bergen.

Iyi partiyesi re'isi meral aqshener xanim ulargha "Sherqiy türkistan dewasining partiyesining öz dewasi ikenliki" ni tekitligen.

Kélechek partiyesi re'isi exmed dawut'oghlu partiyesining qurulghan kündin tartip sherqiy türkistan dewasini qollawatqanliqini bundin kéyinmu qollaydighanliqini alahide tekitligen

Abdulhékim idris ependi ependi qobul qilghan siyasiy partiye rehberlirige "Qizil qiyamet" namliq özi yazghan kitabini teqdim qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet