Uyghur qizi muyesser ablehet "2020-Yili dunyada tesir peyda qilghan 100 ayal" ning biri boldi

Muxbirimiz irade
2020-11-25
Share
tesir-korsetken-100-ayal.gif BBC 2020-Yili dunyaning her qaysi jayliridin kishini tesirlendüridighan we tesiri küchlük 100 ayalning tizimlikini ashkarilidi. 2020-Yili noyabir,
BBC

Dunyadiki nopuzluq axbarat organliridin en'gliye radi'o téléwiziye idarisi b b s 24-noyabir küni "2020-Yili dunyada tesir peyda qilghan 100 ilhambexsh ayal" tizimlikini élan qildi. Bu tizimlikte bir Uyghurning ismimu bar idi. U bolsimu Uyghur ana tilini chet'ellerde saqlap qélish we ana til ma'aripini güllendürüsh yolida ün-tinsiz xizmet qiliwatqan, "Ayxan" fondining qurghuchisi, yazghuchi, Uyghur qizi muyesser ablehet xendan idi.

U bügün radiyomizning ziyaritini qobul qilip özining tesir qozghighan 100 ayal tizimlikige kirgenlik xewirini alghandin kéyin buningdin hem heyran bolghanliqini hem intayin xushal bolghanliqini éytti. U özi üchün xosh bolghan, özini tebrikligen chet'ellerdiki barliq Uyghur jama'itige minnetdarliqini bildürdi.

B b s 'ning ushbu "Tesir qozghighan 100 ayal" ning tallinish jeryanigha bergen izahatidin qarighanda, bu 100 ayal b b s' ning dunyaning herqaysi jaylirida turushluq shöbiliri tewsiye qilghan isimlar ichidin tallinidiken. Bu yilliq tizimlikning bash témisi "Özgirishke yétekchilik qilghan ayallar" bolghan bolup, ular mana bu bash témigha asasen ötken 12 ay ichide özgirish yaratqan, netije qazan'ghan we shu yolda heriket qilghan ayallarni tallighan. Ular bu 100 ayalni "2020-Yilidin ibaret riqabet we dawalghushqa tolghan bir yil ichide tewrenmey turup, özgirishke yétekchilik qilghan we özgirish peyda qilghanlargha wekillik qilidu" dégen.

B b s muxbirliri muyesser bilen "Ayxan ma'arip fondi" ning feyisbuktiki adrési arqiliq alaqe qilghan bolup, ular bu fondi jem'iyet heqqide muyesserdin melumat sorighanda u özining bundaq bir tallashqa kiridighanliqidinmu xewirimu yoq idi. Muyesser "U chaghda men Uyghurlarning smi peqet derd-elem bilen tonulmay, aktip énérgiyelik xewerler bilenmu tonulsun dep fondi jem'iyet heqqide matériyal bilen teminlidim" deydu.

Muyesser ablehet "Ayxan ma'aripi fondi" ni 2015-yili ündidar topi arqiliq qurghan. U bu arqiliq bu topta özige oxshash xalisane ders bériwatqan oqutquchilarning ayliq kirimidin 10 pirsentni fondigha ayrip, bu pul arqiliq 2016-yili Uyghur élidiki 6 qizning aliy mektepte oqushigha yardem qilghan.

Biraq, 2017-yili Uyghur élidiki weziyetning tuyuqsiz özgirishi bilen "Ayxan ma'aripi fondi" Uyghur élidiki yardem pa'aliyetlirini dawamlashturalmighan we netijide muyesser bu fondning pa'aliyetlirini chet'ellerge qaritishni qarar qilghan we netijide chet'ellerde ana til oqutushi we ana til derslik matériyalliri tüzüsh, neshr qilish qatarliq xizmetlerge qaratqan we pütünley heqsz xizmet qilghan.

"BBC" tori muyesser ablehet xendan heqqide mundaq deydu:

"Qelem ismi xendan bilen bilen tonulidighan muyesser abdul'ehet méditsina oqughan. U sha'ir we yazghuchi süpitide nam chiqirishqa bashlighan. U ammiwi saghlamliq kespide magistirliq unwanini tamamlighandin kéyin, yéziqchiliqqa ehmiyet bérishni qarar qilghan. Xendan 2013-yili türkiyege köchüp kelgendin kéyin, di'asporada Uyghur tilini yétishtürüsh we oqutushqa béghishlan'ghan 'ayxan ma'aripi' fondini qurghan. Xendan yéqinda élan qilghan esiri arqiliq wetinidiki krizisqa taqabil turdi. Uning tunji romani'xeyr-xosh quyash'Uyghur rayonidiki jaza lagérlirigha merkezleshken tunji eser bolup hésablinidu".

Muyesser: "Muhajirettiki Uyghurlarning öz kirimini öz ana tili we medeniyitini qoghdap qélish yolida serp qilishi b b s diki bahalighuchi hey'etni tesirlendürgen bolushi mumkin, deydu. U yene özining chet'ellerdiki ana til oqutushini séstimilashturushtin ibaret ghayisini ishqa ashurush üchün dawamliq tirishidighanliqini éytti we bu yolda özige xalisane yardem qiliwatqanlargha minnetdarliqini bildürdi.

Muyesser ablehet bu tizimlikte finlandiye bash ministiri sanna marin, yéngi "Awatar" we "Marwél" filimining cholpini michél yéx, oksford uniwérsitétining tajsiman wirus waksinisi tetqiqatigha mes'ul sara gilbért we kilimat pa'aliyetchisi we aktor jeyn fonda qatarliqlar bilen birge orun alghan. Uning bu netijisi muhajirettiki barliq Uyghurlarni söyündürdi. Istanbulda muyesserning neshr xizmetlirige yéqindin hemkarliship kéliwatqan türkiyediki "Ewlad guruppisi" din abdulla qaraqash ependi bizge öz tesiratini bayan qilip muyesserning öz milliti üchün xalisane qiliwatqan xizmetlirining "2020-Yili tesir körsetken 100 ayal" tizimliki arqiliq mu'eyyenleshtürülgenlikidin intayin xursen bolghanliqini, buning yenimu köp kishilerge ümid bolushini ümid qilidighanliqini éytti.

Bügün yene, amérikadiki "Uyghur herikiti teshkilati" bayanat élan qilip muyesserni tebriklidi. Bayanatta "Muyesserning xizmetliri Uyghur ayallirining küchini esletti" déyildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet