Ding shöshu'angning gollandiye ziyariti gollandiyediki Uyghur, tibet we xitay démokratlirining naraziliqigha uchridi

23-Yanwar küni gollandiyediki Uyghur we tibet jama'iti, xitay démokratliri, shundaqla bir qisim Uyghur we tibet mesilisige köngül bölidighan yerlik gollandiyeliklerning teshkillinishi bilen gollandiyening siyasiy paytexti denhaxtiki bash ministir sariyi aldida xitay kompartiyesi siyasiy biyurosi da'imiy komitétining ezasi ding shöshu'angning gollandiye ziyaritige qarshi birleshme namayish ötküzülgen.

Gollandiye xan jemeti tor bétide bildürülüshiche, gollandiye padishahi williyam aléksandér 22-yanwar kechte, xitayning mu'awin ministiri ding shöshyangni kütüwalidighanliqini élan qilghanidi. Xewerde yene, 23-yanwar peyshenbe küni gollandiye bash ministiri shöfning, ding shöshu'anggha kechlik ziyapet béridighanliqi, bu jeryanda ukra'ina urushini öz ichige alghan gé'o-siyasiy weziyet, kilimat, soda we sehiye qatarliq mesililer boyiche hemkarliq söhbiti élip baridighanliqi ilgiri sürülgen. Bu xewerler gollandiyede yashawatqan Uyghur, tibet we xitay démokratlirining küchlük naraziliqini qozghighan. Bu munasiwet bilen gollandiyediki Uyghur, tibet, xitay démokratliri we bir qisim Uyghur we tibet mesilisige köngül bölidighan kishilerning teshkillinishi bilen gollandiye bash ministir sariyining aldida birleshme namayish ötküzülgen.

Gollandiyediki siyasiy pa'aliyetchi abduréhim ghéni neq meydandin téléfon ziyaritimizni qobul qilip, bu namayish heqqide melumat berdi.

Bu namayishqa gollandiyediki Uyghur we tibet teshkilatliri, dunya Uyghur qurultiyining gollandiyediki wekili, d u q ning mu'awin teptishi we lagér shahiti qelbinur sidiqni öz ichige alghan Uyghur jama'iti qatnashqan bolup, namayish jeryanida xitayning mu'awin bash ministiri ding shöshyangning gollandiye ziyaritige küchlük naraziliq bildürülgen.

Melumatlargha asaslan'ghanda, xitay bilen gollandiye otturisidiki soda sommisi uda töt yil 100 milyard dollardin éship mangghan. Kishilik hoquq teshkilatlirining bildürüshiche, xelq'ara jem'iyet xitayni irqiy qirghinchiliq we Uyghur diyaridiki kishilik hoquq depsendichiliki bilen eyiblewatqan bir waqittimu ikki terep hemkarliqta ching turup kelgen. Ding shöshu'ang bu qétimliq ziyaritide yene gollandiye yuqiri qatlam siyasetchilirige “Ikki dölet karxanilirining öz'ara menpe'et yetküzüsh hemkarliqini chongqurlashturushini؛ téximu köp gollandiye puqralirining xitaygha kélip soda we sayahet qilishini؛ yashlar, medeniyet, tenterbiye we bashqa sahelerdiki almashturush we hemkarliqni kücheytish” ni xalaydighanliqini bildürgen. Bu ehwal gollandiyediki siyasiy pa'aliyetchiler we kishilik hoquq teshkilatlirining qattiq naraziliqini qozghighan.

Bügünki bu birleshme namayishni teshkilligüchilerdin gollandiyediki tibet teshkilatining wekilimu radiyomizning ziyaritini qobul qilip, özlirining bügünki bu namayishni uyushturushtiki meqsiti heqqide toxtilip ötti.

U mundaq dédi: “Biz bügün bu yerde tibet, sherqiy türkistan, xongkong, jenubiy mongghuliye we falün'gungchilarni öz ichige alghan kishilik hoquq teshkilatliri birlikte xitayning mu'awin bash ministiri ding shöshu'angning gollandiye ziyaritige qarshi namayish qiliwatimiz. Biz xitay hökümitidin tibetni xelq'ara teshkilatlar we xelq'ara közitish orunlirigha échiwétishini telep qilimiz. Yéqinda yüz bergen yer tewreshte köpligen tibetlikler zerbige uchridi, xelq yardemge érishelmey azab chekmekte. Xelq'araliq yardem qurulushliri we teshkilatliri tosalghusiz halda bu rayon'gha kirishige kapaletlik qilinishi kérek. Her qaysi döletler tibet, sherqiy türkistan, jenubiy mongghuliye, we xongkong xelqining tartiwatqan zulum hem achchiq qismetlirige köz yummasliqi kérek!”

Bu namayish bügün, yeni 23-yanwar chüshtin kéyin sa'et üchte bashlinip, gollandiyening yamghur we shiwirghanliq hawasigha qarimay kech sa'et altigiche dawam qilghan. Xitay ministiri ding shöshu'ang kechlik ziyapet bérilgen tashqi ishlar ministirliqi sariyigha kirish we chiqishta namayishchilarning qolliridiki sherqiy türkistanning ay-yultuzluq kök bayraqliri, tibetler, jenubiy mongghuliyelikler we bashqa teshkilatlarning bayraqliri, shundaqla xitaygha qarshi towlan'ghan jarangliq sho'arlar bilen qarshilashqan.