Қирғизистанда хитайға наразилиқ билдүрүш паалийити өткүзүлди

Ихтиярий мухбиримиз ферузә
2019-10-03
Елхәт
Пикир
Share
Принт
Қирғизистан уйғурлири д у қ ниң чақириқиға аваз қошуп өткүзгән хитай һөкүмитигә қарши наразилиқ паалийитидин көрүнүш. 2019-Йили , 1-өктәбир, бишкәк.
Қирғизистан уйғурлири д у қ ниң чақириқиға аваз қошуп өткүзгән хитай һөкүмитигә қарши наразилиқ паалийитидин көрүнүш. 2019-Йили , 1-өктәбир, бишкәк.
RFA/Féruze

Қирғизистан уйғурлири дуня уйғур қурултийиниң чақириқиға аваз қошуп, 1-өктәбир күни пүтүн уйғурлар дияри хитай коммунист һөкүмити тәрипидин ишғал қилинғанлиқиниң 70-йиллиқи мунасивити билән наразилиқ билдүрүш йиғини өткүзди.

Мәзкур йиғин қирғизистан пайтәхти бишкәк шәһириниң аламедин-1 мәһәллисидә қирғизистан уйғурлири «иттипақ» җәмийити вә дуня уйғур қурултийиниң қирғизистандики вәкили тәрипидин уюштурулди. Йиғинға «иттипақ» җәмийитиниң рәиси әсқәр қасимоф вә муавин рәиси исмаил таһироф, «иттипақ» гезитиниң баш муһәррири әкбәрҗан бавудуноф, дуня уйғур қурултийиниң қирғизистандики вакаләтчиси розимуһәммәт абдулбақийеф, «инсан һоқуқлирини қоғдаш» тәшкилатиниң рәиси турсун ислам ниязи, «иттипақ» җәмийитиниң аяллар вә яшлар комитетлириниң әзалири шундақла бишкәк шәһири вә униң әтраплиридики йеза-шәһәрләрдин кәлгән уйғур җамаәтчилики болуп 300дин ошуқ киши қатнашти.

Мурасим розимуһәммәд абдулбақийефниң риясәтчиликидә елип берилди. Мәзкур йиғинда вәтән азадлиқи йолида қурбан болған шеһитларға атап қуран оқулуп, андин қирғизистан вә шәрқий түркистан миллий марши ейтилип рәсмий ечилди.

Қирғизистан уйғурлири «иттипақ» җәмийитиниң рәиси әскәр қасимоф сөзгә чиқип, өз нутқида қирғизистан уйғурлири һәр даим өз ара уйғур дияридики дәһшәтлик күнләрни хатириләп вә хитай һакимийитигә етираз билдүрүп кәлгәнликини тилға алди.

Уйғур иштиракчилири 1-өктәбир күнини уйғурлар үчүн мусибәт күни дәп һесаблиған болуп, мәзкур паалийәтму охшашла мусибәт паалийити дәп қаралди. Мәзкур паалийәттә асасий доклатни турсун ислам әпәнди бәрди. У өз доклатида шәрқий түркистан 1949 йили хитай коммунист һакимийити тәрипидин ишғал қилинғанлиқини тилға елип, тарихий вәқәләрни тәпсилий аңлитип уйғурларниң хитайға қарши елип барған һәрикәтлири тоғрисида тохталди.

Мәзкур мурасимға қатнашқан дуня уйғур аяллар бирликиниң әзаси чашмәм мухтарова, радио зияритимизни қобул қилип, бүгүнки күнләрдә ғәрб дөләтлири, болупму америка уйғурларни қоллап келиватқанлиқини тилға елип, уйғурларни өз үмидини үзмәсликигә чақирди.

Шуни тәкитләп өтүш керәкки, бүгүнки күнләрдә уйғур мәдәнийитини раваҗландурушта вә милләтни сақлап қелишта аяллар муһим рол ойнимақта, мәзкур мурасимға қатнашқан «қирғизистан уйғур аяллар бирлики» ниң әзаси һәҗәрбови абдулла, радийомиз зияритини қобул қилип, хитай коммунистлири уйғур диярини игиливалған 70 йил җәрянида уйғур хәлқиниң күрәш қилишни тохтатмиғанлиқини тилға елип, аниларни өз пәрзәнтлирини вәтәнпәрвәрлик роһида тәрбийәләшкә дәвәт қилди.

Йиғинда сөзгә чиққан исмаил таһироф, ғәйрәт җаһаноф, дилмурат әкбәроф вә башқа қирғизистан уйғур актиплири өз сөзлиридә хитай һөкүмитиниң милйонлиған уйғурларни лагерларға солап, уйғур мәдәнийити вә уйғур миллий кимликини йоқитиватқанлиқини әйиблиди.

Радийомиз зияритини қобул қилған қирғизистан радийо-телевизийә оргини қармиқидики «тәңритағ садалири» уйғурчә аңлитиш бөлүминиң мухбири нилүфәр һашимова, мәзкур йиғиндин алған тәсиратлири тоғрисида тохталди.

Қирғизистан сабиқ совет иттипақи йимирилгәндин кейин мустәқиллиққа еришкән оттура асия мәмликити. У, русийә башчилиқида башқа оттура асия мәмликәтлири билән биргә хитай хәлқ җумһурийити билән нурғун һәрбий вә иқтисадий келишимләр билән бағланған. Шундақ болсиму, қирғизистан уйғурлири қирғиз җумһурийитиниң қанунлирини бузмай, өзлириниң мәдәнийәт-сәнитини, тилини, тарихини, шуниңдәк дәһшәтлик вәқәләрни унтумаслиққа тиришип кәлмәктә. Қирғизистан уйғурлири нопус җәһәттә қирғизистандики асаслиқ азсанлиқ милләтләрдин һесаблиниду, улар асаслиқи бишкәк шәһири вә униң әтрапидики йезиларға мәркәзләшкән.

Пикирләр (0)
Share
Толуқ бәт