Qirghizistanda xitaygha naraziliq bildürüsh pa'aliyiti ötküzüldi

Ixtiyariy muxbirimiz féruze
2019-10-03
Élxet
Pikir
Share
Print
Qirghizistan Uyghurliri d u q ning chaqiriqigha awaz qoshup ötküzgen xitay hökümitige qarshi naraziliq pa'aliyitidin körünüsh. 2019-Yili , 1-öktebir, bishkek.
Qirghizistan Uyghurliri d u q ning chaqiriqigha awaz qoshup ötküzgen xitay hökümitige qarshi naraziliq pa'aliyitidin körünüsh. 2019-Yili , 1-öktebir, bishkek.
RFA/Féruze

Qirghizistan Uyghurliri dunya Uyghur qurultiyining chaqiriqigha awaz qoshup, 1-öktebir küni pütün Uyghurlar diyari xitay kommunist hökümiti teripidin ishghal qilin'ghanliqining 70-yilliqi munasiwiti bilen naraziliq bildürüsh yighini ötküzdi.

Mezkur yighin qirghizistan paytexti bishkek shehirining alamédin-1 mehelliside qirghizistan Uyghurliri "Ittipaq" jem'iyiti we dunya Uyghur qurultiyining qirghizistandiki wekili teripidin uyushturuldi. Yighin'gha "Ittipaq" jem'iyitining re'isi esqer qasimof we mu'awin re'isi isma'il tahirof, "Ittipaq" gézitining bash muherriri ekberjan bawudunof, dunya Uyghur qurultiyining qirghizistandiki wakaletchisi rozimuhemmet abdulbaqiyéf, "Insan hoquqlirini qoghdash" teshkilatining re'isi tursun islam niyazi, "Ittipaq" jem'iyitining ayallar we yashlar komitétlirining ezaliri shundaqla bishkek shehiri we uning etrapliridiki yéza-sheherlerdin kelgen Uyghur jama'etchiliki bolup 300din oshuq kishi qatnashti.

Murasim rozimuhemmed abdulbaqiyéfning riyasetchilikide élip bérildi. Mezkur yighinda weten azadliqi yolida qurban bolghan shéhitlargha atap qur'an oqulup, andin qirghizistan we sherqiy türkistan milliy marshi éytilip resmiy échildi.

Qirghizistan Uyghurliri "Ittipaq" jem'iyitining re'isi esker qasimof sözge chiqip, öz nutqida qirghizistan Uyghurliri her da'im öz ara Uyghur diyaridiki dehshetlik künlerni xatirilep we xitay hakimiyitige étiraz bildürüp kelgenlikini tilgha aldi.

Uyghur ishtirakchiliri 1-öktebir künini Uyghurlar üchün musibet küni dep hésablighan bolup, mezkur pa'aliyetmu oxshashla musibet pa'aliyiti dep qaraldi. Mezkur pa'aliyette asasiy doklatni tursun islam ependi berdi. U öz doklatida sherqiy türkistan 1949 yili xitay kommunist hakimiyiti teripidin ishghal qilin'ghanliqini tilgha élip, tarixiy weqelerni tepsiliy anglitip Uyghurlarning xitaygha qarshi élip barghan heriketliri toghrisida toxtaldi.

Mezkur murasimgha qatnashqan dunya Uyghur ayallar birlikining ezasi chashmem muxtarowa, radi'o ziyaritimizni qobul qilip, bügünki künlerde gherb döletliri, bolupmu amérika Uyghurlarni qollap kéliwatqanliqini tilgha élip, Uyghurlarni öz ümidini üzmeslikige chaqirdi.

Shuni tekitlep ötüsh kérekki, bügünki künlerde Uyghur medeniyitini rawajlandurushta we milletni saqlap qélishta ayallar muhim rol oynimaqta, mezkur murasimgha qatnashqan "Qirghizistan Uyghur ayallar birliki" ning ezasi hejerbowi abdulla, radiyomiz ziyaritini qobul qilip, xitay kommunistliri Uyghur diyarini igiliwalghan 70 yil jeryanida Uyghur xelqining küresh qilishni toxtatmighanliqini tilgha élip, anilarni öz perzentlirini wetenperwerlik rohida terbiyeleshke dewet qildi.

Yighinda sözge chiqqan isma'il tahirof, gheyret jahanof, dilmurat ekberof we bashqa qirghizistan Uyghur aktipliri öz sözliride xitay hökümitining milyonlighan Uyghurlarni lagérlargha solap, Uyghur medeniyiti we Uyghur milliy kimlikini yoqitiwatqanliqini eyiblidi.

Radiyomiz ziyaritini qobul qilghan qirghizistan radiyo-téléwiziye orgini qarmiqidiki "Tengritagh sadaliri" Uyghurche anglitish bölümining muxbiri nilüfer hashimowa, mezkur yighindin alghan tesiratliri toghrisida toxtaldi.

Qirghizistan sabiq sowét ittipaqi yimirilgendin kéyin musteqilliqqa érishken ottura asiya memlikiti. U, rusiye bashchiliqida bashqa ottura asiya memliketliri bilen birge xitay xelq jumhuriyiti bilen nurghun herbiy we iqtisadiy kélishimler bilen baghlan'ghan. Shundaq bolsimu, qirghizistan Uyghurliri qirghiz jumhuriyitining qanunlirini buzmay, özlirining medeniyet-sen'itini, tilini, tarixini, shuningdek dehshetlik weqelerni untumasliqqa tiriship kelmekte. Qirghizistan Uyghurliri nopus jehette qirghizistandiki asasliq azsanliq milletlerdin hésablinidu, ular asasliqi bishkek shehiri we uning etrapidiki yézilargha merkezleshken.

Pikirler (0)
Share
Toluq bet