Nefise oghuz: “Xitay elchixanisi tagham alim abdukérimning jinayiti heqqide ispat bérishni ret qilip keldi”

Türkiyede turushluq nefise oghuzning taghisi alim abdukérim heqqide bergen guwahliqi bilen alim abdukérim délosi ijtima'iy taratqularda qayta küntertipke keldi.

Ürümchidiki “Xalis xelq'ara soda shirkiti” ning kompyutér inzhénéri alim abdukérim 2017 ‏-yili 8-ayning 27 küni ürümchidiki baxulyang saqchixanisi teripidin tutqun qilin'ghan. Radiyomiz ötken yili alim abdukérimning “Qanunsiz uchurlarni körüsh”, “Qalaymiqan kishiler bilen téléfonlishish” we “Qanunsiz diniy zatlar bilen hemsöhbette bolush” dégendek sewebler bilen tutulup, korla türmiside jaza mudditini ötewatqanliqini delilligenidi.

Nefise oghuz gheyriy resmiy menbelerdin taghisining dölet bixeterlikige xewp yetküzüsh bilen eyiblinip 17 yilliq késiwétilgenlikidin xewer tapqan. Ötken yili enqerediki xitay elchixanisi nefisege téléfon qilip, taghisi alim abdukérimning türmide jaza mudditi ötewatqanliqini yetküzgen, emma uning késilish sewebi heqqide héchqandaq melumat bermestin, késim mudditining “On nechche yil” ikenliki we özlirini qayta izdimeslikni éytip téléfonni qopalliq bilen qoyuwetken.

Nefise Oghuz teminligen

Nefise radiyomizning ziyaritini qobul qilip, xitay hökümiti dunyagha “Xushal Uyghur” teshwiqatini küchep teshwiq qiliwatqanda, taghisining ehwalini dunyagha anglitish arqiliq xitayning yalghanchiliqini ispatlimaqchi bolghanliqini bildürdi.

Amérikada turushluq lagér shahiti zumret dawutning radiyomizgha éytishiche, u xitayning ichide ishlitilidighan dowyin qatarliq ijtima'iy taratqularda tarqalghan Uyghurlargha munasiwetlik uchurlarni toplaydiken. U yéqinda körgen uchurlargha qarighanda, xitayning naxsha-muzika bilenla yashaydighan “Xushal Uyghur” teshwiqatining eksiche, lagér-türmilerde yétiwatqan Uyghurlar yenila köp iken.

Nefise zumret xanimning sözini toluqlap mundaq dédi: “Xitayning istanbuldiki konsulxanisining bayanatchisi Uyghurlarning kallisida késel bolghanliqi üchün, u mekteplerde ularni terbiyelewatimiz, deptu. Méning tagham kompyutér inzhénéri idi”.

U yene xelq'araliq yighinlarda xitay hökümitining chet ellerdiki diplomatlirining “Uyghurlar rahet, xushal yashawatidu” dégen sözlirining tolimu külkilik tuyulidighanliqini bildürdi.

Zumret dawut xanim axirida muhajirettiki Uyghurlarningmu, “Weten'ge barduq” dégendek namlar bilen xitayning “Xushal Uyghur” teshwiqatigha yantayaq boluwatqanliqni eskertip ötti.

Yash kompyutér inzhénéri alim abdukérim tutulghandin kéyin, ularning a'iliwi shirkiti bolghan “Xalis tashqi soda cheklik shirkiti” mu taqilip qalghan. Nefisening bildürüshiche, uning taghisi alim abdukérim hazir korladiki bingtüen 2-diwiziyesining türmiside 3153-nomurluq mehbus süpitide tutup turuluwatqan bolup, türkiyediki xitay elchixanisi izchil sot hökmini teminleshni ret qilghan.