Тутқундики пенсийонер нияз насирниң лагердин җәсити чиққан

Аилисидә 3 пәрзәнти дөләт хизмәтчиси болған, өзиму ашлиқ идарисидин пенсийәгә чиққан 78 яшлиқ нияз насир, лагерда еғир кесәл һалитидиму қоюп берилмигән. Хитай даирилири униң пәрзәнтлириниң дадисини капаләткә қоюп бериш тәлипи кәскин рәт қилған. Нәтиҗидә 2018‏-йили тутуп кетилгән нияз насирниң өткән йилниң ахири лагердин җәсити чиққан.

Тоққузақлиқ бир муһаҗирниң радийомизға инкас қилишичә, тоққузақ ашлиқ идарисиниң пенсийонери нияз насир дегән киши 2018-йили 76 йешида лагерға елип китилгән. Хели бир мәзгилгичә аилиси билән көрүштүрлмигән нияз насир 2018-йилниң ахирлири аилиси билән екранда көрүштүрүлгән. Дийилишичә, нияз насирниң үч пәрзәнти дөләт хизмәтчиси болуп, улар дадисиниң екрандики һалитиниң бәкму аҗиз вә начар икәнликини көрүп, униң саламәтликдин әндишиә қилған. Улар дадисиниң аилидә тәрбийәлинишини тәләп қилип капаләткә қоюп бериш һәққидә алақидар органларға илтимас сунған. Даириләр нияз насирниң саламәтликидә мәсилә йоқлуқи вә башқилардин алаһидә яхши икәнликини билдүрүп, униң лагердин қоюп берилишини рәт қилған. Тоққузақтики бу нәпәр үч дөләт хизмәтчисиниң иккиси компартийә әзаси туруқлуқ, көзлири барғансери чоңқурлап, иңәклири чоқчийип вә чирайи татирип кетиватқан дадисини лагердин елип чиқишқа қурби йәтмигән. Өткән йилниң ахириға кәлгәндә, нияз насирниң җәсити аилисигә тапшурулған.

Биз бу учурларниң тоғрилиқини дәлилләш үчүн, тоққузақтики алақидар органларға телефон қилдуқ.

Тоққузақ наһийәлик әдлийә идарисиниң бир хадими, нияз насирниң үч пәрзәнтиниң уни капаләткә елип чиқиривелиш һәққидә тәләп сунғанлиқидин хәвири йоқлуқини ейтти. У бу түрдики ишларниң, җүмлидин лагердики өлүм хәвәрлириниң әдлийә хадими туруқлуқ үзлиригә уқтурулмайдиғанлиқини әскәртти. У йәнә булақсу сақчиханисиниң башлиқи билән йеқин мунасивити болсиму, нияз насир дегән кишиниң өлүми һәққидә һечқандақ гәп аңлимиғанғлиқи тилға алди.

Радийомизға кәлгән инкаста, пенсийонер нияз насирниң лагер дохтурханисида җан үзгәнлики вә җәсити аилисигә тапшурулғанда, униң өлүм сәвәби һәққидә һечқандақ изаһат берилмигәнлики, шундақла тезликтә йәрликигә қоюветишкә буйрулғанлиқи қәйт қилинған. Тоққузақ булақсудин телефонимизни қобул қилған бир аманлиқ мудири, пенсийонер нияз насирниң2018-йили тутқун қилинип, лагерда җан үзгәнликини дәлиллиди.

Радийомизға кәлгән инкаста дейилишичә, нияз насир дегән кишиниң булақсу йеза 6-кәнттә олтурушлуқ икәнлики, үч пәрзәнтиниң исмлириниң абдулнасир, абдуләһәт вә амангүл икәнлики қәйт қилинған. Булақсудики мәзкур аманлиқи мудири нияз насирниң мәзкур үч пәрзәнтиниң наһийилик ашлиқ идариси, йеза-игилик банкиси вә сода-санаәтни мәмурий башқуруш идарисида хизмәт қилидиғанлиқини ашкарилиди, әмма уларниң дадисини лагердин елип чиқиш үчүн немә ишларни қилғанлиқидин хәвәрсизликини ейтти.

Тоққузақлиқ муһаҗирниң инкасида дейилишичә, нияз насир җан үзүштин бир айчә аввал пәрзәнтлири билән екранда көрүшкән болсиму, у саламәтликидә көрүливатқан мәсилә һәққидә һечқандақ еғиз ачмиған, пәрзәнтлириниң бу һәқтики соаллирини җавабсиз қалдурған. Илгири радийомиз зияртини қобул қилған бир лагер сақчиси лагер тутқунлири аилиси билән телефонда көрүшкәндә, өз әһвалидин шикайәт қилишқа болмайдиғалиқи, чоқум әһвалини яхши дәп мәлумат беришкә мәҗбур икәнликини ашкарилиған иди.