Норвегийәдә «мәһбуслар садаси вә сикандинавийә уйғур әркинлик йүрүши» намида намайиш өткүзүлди

Ихтиярий мухбиримиз арслан
2019-05-06
Елхәт
Пикир
Share
Принт
Норвегийәниң ослу шәһиридә өткүзүлгән «мәһбуслар садаси вә сикандинавийә уйғур әркинлик йүрүши» намлиқ намайиштин көрүнүш. 2019-Йили 4-май.
Норвегийәниң ослу шәһиридә өткүзүлгән «мәһбуслар садаси вә сикандинавийә уйғур әркинлик йүрүши» намлиқ намайиштин көрүнүш. 2019-Йили 4-май.
RFA/Arslan

4-Май күни норвегийәниң ослу шәһридә «мәһбуслар садаси вә сикандинавийә уйғур әркинлик йүрүши» намида намайиш өткүзүлди.

Бу намайиш норвегийә уйғур комитетиниң уюштуруши вә шветсийә уйғур маарип уюшмисиниң қоллап-қуввәтлиши билән өткүзүлгән болуп, намайишқа нурвегийә вә шиветсийәдә яшаватқан уйғурлардин әр-аял болуп 300дин артуқ киши қатнашти.

Намайишчилар қоллирида ай юлтузлуқ көк байрақ билән җаза лагерлириға қамалған уйғурларниң рәсимлирини көтүрүп йүрүш қилди вә «уйғурларға әркинлик» «хитайлар шәрқий түркистандин чиқип кәтсун», дегәндәк шуарлар товлиди.

Намайиш җәриянида норвегийә уйғур комитетиниң рәиси бәхтияр өмәр әпәнди, шветсийә уйғур маарип уюшмисиниң баш катипи абдулла көкяр әпәнди вә дуня уйғур қурултийиниң иҗраийә комитетиниң муавин рәиси сәмәт абла әпәндиләр сөз қилип, хитайниң җаза лагерлирини тақаш вә лагерларға қамалған нәччә милйон уйғурни қоюп бериш тоғрисида баянатлар елан қилди вә чақириқлар оттуриға қойди.

Сәмәт абла әпәнди бу намайиш тоғрисида пикир баян қилип, бу намайиш, нәччә милйон бигунаһ инсанларниң хитай җаза лагерлирида вә түрмиләрдә азап чекиватқанлиқини дәлил-испат арқилиқ көрситиш, бу арқилқ кишиләргә чинлиқ вә растчиллиқ туйғуси бериш һәм уларниң қоллишиға еишиш үчүн елип берилғанлиқини, шуңа өзлириниң җаза лагерлириға вә түрмиләргә қамалған уйғурларниң рәсимлирини көтүрүп чиққанлиқини билдүрди

Сәмәт абла әпәнди, бу қетимқи намайишниң оңушлуқ өткәнликини, күткән мәқситидә йәткәнликини ипадилиди.

Шветсийә уйғур маарип уюшмисиниң баш катипи абдулла көкяр әпәнди бу намайиш тоғрисида пикир баян қилип, «мәһбуслар садаси вә искандинавийә әркинлик йүрүши» намлиқ намайиш 4-айниң 28-күни шветсийәниң ситокһолум шәһиридә башлинип 5-айниң 4-күни нурвегийәниң ослу шәһиридә ғәлибилик ахирлашқанлиқини билдүрди.

Абдулла көкяр әпәнди бу намайишниң мәқсити тоғрисида тохтилип, өзлириниң 3 милйон әтрапида адәмниң әркинликкә чиқиши үчүн лагерға қамалған вәкил характерлиқ 300 уйғурниң чоң һәҗимдики рәсимлирини көтүрүп ослу кочилирида айлинип намайиш елип барғанлиқини, бу арқилиқ лагер мәсилисидә норвегийә вә шивет хәлқиниң қоллишиға еришиш вә җамаәт пикири пәйда қилишни мәқсәт қилғанлиқини баян қилди.

Норвегийә уйғур комитетиниң рәиси бәхтияр өмәр әпәнди бу намайиш тоғрисида пикир-баян қилип мундақ деди: «ослу шәһиридики бу намайишта падишаһ сарийи, парламент алди қатарлиқ җайларни вә кочиларни айлинип йүрүш қилдуқ. Бу намайиш шветсийә, норвегийә, финландийә қатарлиқ дөләтләрдики уйғур тәшкилатлириниң һәмкарлишиши вә уюшиши арқилиқ йеқин дөләтләрдики уйғурларниң бирлишип намайиш қилип күчимизни топлаштин ибарәт муһим ноқтини йорутуп бәрди».

Биз йәнә норвегийә уйғур комитети һәйити әзаси хәлчәм муһәммәтиминниң пикир-қарашлирини алдуқ, у бу қетимқи намайишниң хитайниң җаза лагерлирини бурмилап чүшәндүрүп, дуняниң көзини бояшқа уриниватқан әпти-бәширисини ечип бәргәнликини билдүрди.

Шветсийәдин келип бу намайишқа қатнашқан қурбанҗан бу намайшқа қатнашқандики тәсиратини ипадиләп мундақ деди: «бу намайишқа 600 километир мусапини бесип шветсийәдин кәлдуқ, намайиш җәриянида һава соғуқ вә қар арилаш ямғур яққан болсиму, лекин хитайниң қилмишлириға болған ғәзәп-нәпритимиз вә намайиш җәриянидики қизғин кәйпиятимизниң түрткисидә соғуқларму һес қилмидуқ».

Пикирләр (0)
Share
Толуқ бәт