Norwégiyede "Mehbuslar sadasi we sikandinawiye Uyghur erkinlik yürüshi" namida namayish ötküzüldi

Ixtiyariy muxbirimiz arslan
2019-05-06
Élxet
Pikir
Share
Print
Norwégiyening oslu shehiride ötküzülgen "Mehbuslar sadasi we sikandinawiye Uyghur erkinlik yürüshi" namliq namayishtin körünüsh. 2019-Yili 4-may.
Norwégiyening oslu shehiride ötküzülgen "Mehbuslar sadasi we sikandinawiye Uyghur erkinlik yürüshi" namliq namayishtin körünüsh. 2019-Yili 4-may.
RFA/Arslan

4-May küni norwégiyening oslu shehride "Mehbuslar sadasi we sikandinawiye Uyghur erkinlik yürüshi" namida namayish ötküzüldi.

Bu namayish norwégiye Uyghur komitétining uyushturushi we shwétsiye Uyghur ma'arip uyushmisining qollap-quwwetlishi bilen ötküzülgen bolup, namayishqa nurwégiye we shiwétsiyede yashawatqan Uyghurlardin er-ayal bolup 300din artuq kishi qatnashti.

Namayishchilar qollirida ay yultuzluq kök bayraq bilen jaza lagérlirigha qamalghan Uyghurlarning resimlirini kötürüp yürüsh qildi we "Uyghurlargha erkinlik" "Xitaylar sherqiy türkistandin chiqip ketsun", dégendek shu'arlar towlidi.

Namayish jeriyanida norwégiye Uyghur komitétining re'isi bextiyar ömer ependi, shwétsiye Uyghur ma'arip uyushmisining bash katipi abdulla kökyar ependi we dunya Uyghur qurultiyining ijra'iye komitétining mu'awin re'isi semet abla ependiler söz qilip, xitayning jaza lagérlirini taqash we lagérlargha qamalghan nechche milyon Uyghurni qoyup bérish toghrisida bayanatlar élan qildi we chaqiriqlar otturigha qoydi.

Semet abla ependi bu namayish toghrisida pikir bayan qilip, bu namayish, nechche milyon bigunah insanlarning xitay jaza lagérlirida we türmilerde azap chékiwatqanliqini delil-ispat arqiliq körsitish, bu arqilq kishilerge chinliq we rastchilliq tuyghusi bérish hem ularning qollishigha é'ishish üchün élip bérilghanliqini, shunga özlirining jaza lagérlirigha we türmilerge qamalghan Uyghurlarning resimlirini kötürüp chiqqanliqini bildürdi

Semet abla ependi, bu qétimqi namayishning ongushluq ötkenlikini, kütken meqsitide yetkenlikini ipadilidi.

Shwétsiye Uyghur ma'arip uyushmisining bash katipi abdulla kökyar ependi bu namayish toghrisida pikir bayan qilip, "Mehbuslar sadasi we iskandinawiye erkinlik yürüshi" namliq namayish 4-ayning 28-küni shwétsiyening sitokholum shehiride bashlinip 5-ayning 4-küni nurwégiyening oslu shehiride ghelibilik axirlashqanliqini bildürdi.

Abdulla kökyar ependi bu namayishning meqsiti toghrisida toxtilip, özlirining 3 milyon etrapida ademning erkinlikke chiqishi üchün lagérgha qamalghan wekil xaraktérliq 300 Uyghurning chong hejimdiki resimlirini kötürüp oslu kochilirida aylinip namayish élip barghanliqini, bu arqiliq lagér mesiliside norwégiye we shiwét xelqining qollishigha érishish we jama'et pikiri peyda qilishni meqset qilghanliqini bayan qildi.

Norwégiye Uyghur komitétining re'isi bextiyar ömer ependi bu namayish toghrisida pikir-bayan qilip mundaq dédi: "Oslu shehiridiki bu namayishta padishah sariyi, parlamént aldi qatarliq jaylarni we kochilarni aylinip yürüsh qilduq. Bu namayish shwétsiye, norwégiye, finlandiye qatarliq döletlerdiki Uyghur teshkilatlirining hemkarlishishi we uyushishi arqiliq yéqin döletlerdiki Uyghurlarning birliship namayish qilip küchimizni toplashtin ibaret muhim noqtini yorutup berdi".

Biz yene norwégiye Uyghur komitéti hey'iti ezasi xelchem muhemmet'iminning pikir-qarashlirini alduq, u bu qétimqi namayishning xitayning jaza lagérlirini burmilap chüshendürüp, dunyaning közini boyashqa uriniwatqan epti-beshirisini échip bergenlikini bildürdi.

Shwétsiyedin kélip bu namayishqa qatnashqan qurbanjan bu namayshqa qatnashqandiki tesiratini ipadilep mundaq dédi: "Bu namayishqa 600 kilométir musapini bésip shwétsiyedin kelduq, namayish jeriyanida hawa soghuq we qar arilash yamghur yaqqan bolsimu, lékin xitayning qilmishlirigha bolghan ghezep-nepritimiz we namayish jeriyanidiki qizghin keypiyatimizning türtkiside soghuqlarmu hés qilmiduq".

Toluq bet