Норвегийәдики намайишчилар хитай вәкилләр өмикини йәнә бир қетим чөчүтти

Ихтиярий мухбиримиз әкрәм
2019.05.20
bextiyar-omer-ependi.jpg Норвегийә уйғур комитетиниң рәиси бәхтияр өмәр әпәнди(солда) ситевангер шәһиридә хитай мәмликәтлик хәлқ қурултийиниң башлиқи ли җйәншуға қарши елип берилған намайишида йәрлик қоллиғучилар билән. 2019-Йили 17-май, норвегийә.
RFA/Ekrem

Норвегийәниң ситевангер шәһиридә хитай мәмликәтлик хәлқ қурултийиниң башлиқи ли җйәншуға қарши зор көләмлик намайиш елип берилди.

Хитай хәлқ қурултийиниң рәиси ли җйәншуниң 3 күнлүк норвегийә зиярити мунасивити билән 15-май күни пайтәхт осло шәһиридә кәң көләмлик наразилиқ намайиши елип берилған иди. Бу намайишниң давами 17-май күни норвегийәниң ситевангер шәһиридә елип берилған.

Норвегийәдә яшаватқан дуня уйғур қурултийиниң тәптиши пәрһат әпәндиниң баян қилишичә, норвегийәниң дөләт байрими күнигә тоғра кәлгән бу намайишқа һәрқайсий шәһәрләрдин кәлгән көп сандики кишиләр қатнашқан. Бу намайиш ситевангердики йәрлик хәлқниң диққитини тартқан.

Норвегийә уйғур комитетиниң рәиси бәхтияр өмәр әпәнди бу икки қетимлиқ намайиш һәққидә тохтилиштин илгири бу намайишларға төһпә қатқан уйғур җамаитигә рәһмәтлирини билдүрүп өтти һәмдә уйғурларниң бу намайишлар арқилиқ норвегийәдә йәнә бир қетим өз күчини намаян қилиш пурситигә еришкәнликини әскәртти.

17-Май кәчтә ситевангер шәһириниң башлиқи хитай әмәлдари ли җйәншуниң шәрипигә зияпәт бәркмәкчи болған. Намайиш дәл шу зияпәт берилидиған меһманханиниң алдида елип берилған. Ситевангер шәһиридә яшайдиған, бу қетимқи намайишқа иштирак қилған уйғур зиялийси марина турсун ханимниң ейтишичә, хитай әмәлдарлири намайишчиларниң ғәзәплиридин қорқуп арқа ишикләрдин меңишқа мәҗбур болған.

Норвегийә уйғур комитетиниң катипи адилҗан абдурәһимниң тәкитлишичә, хитайниң норвегийә зиярити мунасивити билән бу икки қетимлиқ намайиш уюштурулуш билән биргә норвегийә уйғур комитети йәнә уйғур диярида һөкүм сүрүватқан еғир вәзийәт һәққидә норвегийәдики мунасивәтлик органларға хәтләр йоллап, хитай билән болған сөһбәтләрдә уйғурлар мәсилисини күнтәртиптә тутушни тәләп қилған.

Мәлум болғинидәк, хитай даирилириниң бу қетимқи норвегийә зиярити 2 милйондин артуқ уйғурниң йиғивелиш лагерлирида харлиниватқанлиқи хәлқарада җиддий диққәт тартиватқан һәмдә уйғур өктичи зиялийси илһам тохти “нобел тинчлиқ мукапати” ға намзат көрситилгән бир вәзийәткә тоғра кәлгән.

Норвегийә уйғур комитетиниң рәиси бәхтияр әпәндиниң илгири сүрүшичә, намәлум хитай тәшкилатлириниң ослодики намайиш орнини алдин игиливалғанлиқи вә хитай әмәлдарлириниң ситевангерда намайишчилардин қорқуп зияпәт залиға алди ишиктин кирәлмәй арқа ишиктин киришкә мәҗбур болғанлиқи норвегийә ахбарат васитилириниң қизиқ темисиға айлиниш билән биргә уйғурлар мәсилисиниң техиму кәң тонулушиға түрткә болған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.