Norwégiyediki namayishchilar xitay wekiller ömikini yene bir qétim chöchütti

Ixtiyariy muxbirimiz ekrem
2019-05-20
Élxet
Pikir
Share
Print
Norwégiye Uyghur komitétining re'isi bextiyar ömer ependi(solda) sitéwan'gér shehiride xitay memliketlik xelq qurultiyining bashliqi li jyenshugha qarshi élip bérilghan namayishida yerlik qollighuchilar bilen. 2019-Yili 17-may, norwégiye.
Norwégiye Uyghur komitétining re'isi bextiyar ömer ependi(solda) sitéwan'gér shehiride xitay memliketlik xelq qurultiyining bashliqi li jyenshugha qarshi élip bérilghan namayishida yerlik qollighuchilar bilen. 2019-Yili 17-may, norwégiye.
RFA/Ekrem

Norwégiyening sitéwan'gér shehiride xitay memliketlik xelq qurultiyining bashliqi li jyenshugha qarshi zor kölemlik namayish élip bérildi.

Xitay xelq qurultiyining re'isi li jyenshuning 3 künlük norwégiye ziyariti munasiwiti bilen 15-may küni paytext oslo shehiride keng kölemlik naraziliq namayishi élip bérilghan idi. Bu namayishning dawami 17-may küni norwégiyening sitéwan'gér shehiride élip bérilghan.

Norwégiyede yashawatqan dunya Uyghur qurultiyining teptishi perhat ependining bayan qilishiche, norwégiyening dölet bayrimi künige toghra kelgen bu namayishqa herqaysiy sheherlerdin kelgen köp sandiki kishiler qatnashqan. Bu namayish sitéwan'gérdiki yerlik xelqning diqqitini tartqan.

Norwégiye Uyghur komitétining re'isi bextiyar ömer ependi bu ikki qétimliq namayish heqqide toxtilishtin ilgiri bu namayishlargha töhpe qatqan Uyghur jama'itige rehmetlirini bildürüp ötti hemde Uyghurlarning bu namayishlar arqiliq norwégiyede yene bir qétim öz küchini namayan qilish pursitige érishkenlikini eskertti.

17-May kechte sitéwan'gér shehirining bashliqi xitay emeldari li jyenshuning sheripige ziyapet berkmekchi bolghan. Namayish del shu ziyapet bérilidighan méhmanxanining aldida élip bérilghan. Sitéwan'gér shehiride yashaydighan, bu qétimqi namayishqa ishtirak qilghan Uyghur ziyaliysi marina tursun xanimning éytishiche, xitay emeldarliri namayishchilarning ghezepliridin qorqup arqa ishiklerdin méngishqa mejbur bolghan.

Norwégiye Uyghur komitétining katipi adiljan abdurehimning tekitlishiche, xitayning norwégiye ziyariti munasiwiti bilen bu ikki qétimliq namayish uyushturulush bilen birge norwégiye Uyghur komitéti yene Uyghur diyarida höküm sürüwatqan éghir weziyet heqqide norwégiyediki munasiwetlik organlargha xetler yollap, xitay bilen bolghan söhbetlerde Uyghurlar mesilisini küntertipte tutushni telep qilghan.

Melum bolghinidek, xitay da'irilirining bu qétimqi norwégiye ziyariti 2 milyondin artuq Uyghurning yighiwélish lagérlirida xarliniwatqanliqi xelq'arada jiddiy diqqet tartiwatqan hemde Uyghur öktichi ziyaliysi ilham toxti "Nobél tinchliq mukapati" gha namzat körsitilgen bir weziyetke toghra kelgen.

Norwégiye Uyghur komitétining re'isi bextiyar ependining ilgiri sürüshiche, namelum xitay teshkilatlirining oslodiki namayish ornini aldin igiliwalghanliqi we xitay emeldarlirining sitéwan'gérda namayishchilardin qorqup ziyapet zaligha aldi ishiktin kirelmey arqa ishiktin kirishke mejbur bolghanliqi norwégiye axbarat wasitilirining qiziq témisigha aylinish bilen birge Uyghurlar mesilisining téximu keng tonulushigha türtke bolghan.

Toluq bet