Норвегийә уйғур комитети җаза лагерлириға қарши паалийәтлирини күчәйтмәктә

Ихтиярий мухбиримиз әкрәм
2020-01-16
Елхәт
Пикир
Share
Принт
(Солдин) норвегийә уйғур комитетиниң рәиси бәхтияр өмәр әпәнди, мәшһур кишилик һоқуқ паалийәтчиси гури мелби, далай ламаниң шималий явропадики вәкили сонам фраси, норвегийә хоңкоң комитетиниң муавин рәиси стевен, норвегийә тибәт комитетиниң рәиси сома сивенинсенлар норвегийә парламентида. 2020-Йили 15-январ.
(Солдин) норвегийә уйғур комитетиниң рәиси бәхтияр өмәр әпәнди, мәшһур кишилик һоқуқ паалийәтчиси гури мелби, далай ламаниң шималий явропадики вәкили сонам фраси, норвегийә хоңкоң комитетиниң муавин рәиси стевен, норвегийә тибәт комитетиниң рәиси сома сивенинсенлар норвегийә парламентида. 2020-Йили 15-январ.
RFA/Ekrem

15-январ норвегийә уйғур комитети норвегийә парламентини зиярәт қилди һәмдә түрк тәшкилатлири рәһбәрлири билән учришиш өткүзди.

Норвегийә пайтәхти ослодин кәлгән мәлуматларға қариғанда, 15-январ күни норвегийә уйғур комитетиниң рәиси бәхтияр өмәр, норвегийә тибәт комитетиниң рәиси сома сивенинсен, далай ламаниң шималий явропадики вәкили сонам фраси, норвегийә хоңкоң комитетиниң муавин рәиси стевен қатарлиқлар бирликтә норвегийә парламентида зиярәттә болуп парламент әзаси, мәшһур кишилик һоқуқ паалийәтчиси гури мелби билән сөһбәт елип барған.

Бу сөһбәт норвегийә билән хитай оттурисидики мунасивәт барғансери бузулушқа йүз тутқан бир вақитқа орунлаштурулған. Норвегийә уйғур комитетиниң рәиси бәхтияр өмәр әпәнди бу һәқтә тохталғанда кишилик һоқуқ мәсилисидә норвегийәдә алаһидә даңқ чиқарған парламент әзаси гури мелби билән уйғур, тибәт, хоңкоң вәзийити һәққидә узун пикир алмаштуруш елип берилғанлиқини тилға алди.

Норвегийә хоңкоң комитетиниң муавин рәиси стевен зияритимизни қобул қилғанда бу қетимқи сөһбәттә асаслиқи хитайниң уйғурларға, тибәтләргә вә хоңкоңлуқларға селиватқан зулуми вә бу зулумдин қутулушниң чарилири һәмдә уйғур дияридики җаза лагерлири һәққидә музакирә қилинғанлиқини баян қилди.

15-январ күни йәнә норвегийә уйғур комитетида уйғурлар вә норвегийәдики түрк тәшкилатлири рәһбәрлириниң иштиракида хитайниң җаза лагерлири сияситигә қарши алдимиздики күнләрдә елип берилидиған паалийәтләр тоғрилиқ сөһбәт йиғини болуп өткән. Д у қ иҗраийә комитетиниң муавин рәиси сәмәт абла әпәнди бу һәқтә бизни бәзи мәлуматлар билән тәминлиди.

Норвегийә уйғур комитетиниң рәиси бәхтияр өмәр әпәнди бу қетимқи учришишниң норвегийәдики түрк тәшкилатлири билән елип берилған тунҗи қетимлиқ көлими зор бир учришиш болғанлиқини, сөһбәттә хитайниң җаза лагерлири сияситигә қарши өз-ара һәмкарлишип зади немә ишларни қилиш лазимлиқи тоғрисида узун музакириләр елип берилғанлиқини тәкитлиди.

Норвегийә түрк дәрнәклири федиратсийониниң баш секретари мәһмәт тимән әпәндиму зияритимизни қобул қилип, бу йиғин һәққидики қарашлирини оттуриға қоюп өтти. У мундақ деди: «биз норвегийәдики түрк тәшкилатлири уйғур қериндашлиримиз билән һәмкарлишип хитайниң шәрқий түркистанда йүргүзүватқан җаза лагерлири сияситини норвегийә һөкүмити вә түркийә һөкүмитигә техиму кәң билдүрүп, уларни чарә-тәдбир елишқа зорлаш, җаза лагерлири мәсилисини норвегийә хәлқи һәм пүтүн дуняға йәниму әтраплиқ аңлитип, хитайниң инсанийәткә қарши җинайәтлиригә нисбәтән хәлқаралиқ бесим пәйда қилиш үчүн немиләрни қилишимиз лазимлиқини музакирә қилиш нийитидә бу йәргә җәм болдуқ. Алдимиздики айларда биз түрк тәшкилатлири норвегийәдики уйғурлар билән бирлишип көлими зор болған бирқанчә қетимлиқ намайишларни елип беришни пиланлаватимиз. Уйғур қериндашлиримизға қолимиздин келишичә ярдәмләрдә болуш бизниң бурчимиз.»

Пикирләр (0)
Share
Толуқ бәт