Norwégiye Uyghur komitéti jaza lagérlirigha qarshi pa'aliyetlirini kücheytmekte

Ixtiyariy muxbirimiz ekrem
2020-01-16
Élxet
Pikir
Share
Print
(Soldin) norwégiye Uyghur komitétining re'isi bextiyar ömer ependi, meshhur kishilik hoquq pa'aliyetchisi guri mélbi, dalay lamaning shimaliy yawropadiki wekili sonam frasi, norwégiye xongkong komitétining mu'awin re'isi stéwén, norwégiye tibet komitétining re'isi soma siwéninsénlar norwégiye parlaméntida. 2020-Yili 15-yanwar.
(Soldin) norwégiye Uyghur komitétining re'isi bextiyar ömer ependi, meshhur kishilik hoquq pa'aliyetchisi guri mélbi, dalay lamaning shimaliy yawropadiki wekili sonam frasi, norwégiye xongkong komitétining mu'awin re'isi stéwén, norwégiye tibet komitétining re'isi soma siwéninsénlar norwégiye parlaméntida. 2020-Yili 15-yanwar.
RFA/Ekrem

15-Yanwar norwégiye Uyghur komitéti norwégiye parlaméntini ziyaret qildi hemde türk teshkilatliri rehberliri bilen uchrishish ötküzdi.

Norwégiye paytexti oslodin kelgen melumatlargha qarighanda, 15-yanwar küni norwégiye Uyghur komitétining re'isi bextiyar ömer, norwégiye tibet komitétining re'isi soma siwéninsén, dalay lamaning shimaliy yawropadiki wekili sonam frasi, norwégiye xongkong komitétining mu'awin re'isi stéwén qatarliqlar birlikte norwégiye parlaméntida ziyarette bolup parlamént ezasi, meshhur kishilik hoquq pa'aliyetchisi guri mélbi bilen söhbet élip barghan.

Bu söhbet norwégiye bilen xitay otturisidiki munasiwet barghanséri buzulushqa yüz tutqan bir waqitqa orunlashturulghan. Norwégiye Uyghur komitétining re'isi bextiyar ömer ependi bu heqte toxtalghanda kishilik hoquq mesiliside norwégiyede alahide dangq chiqarghan parlamént ezasi guri mélbi bilen Uyghur, tibet, xongkong weziyiti heqqide uzun pikir almashturush élip bérilghanliqini tilgha aldi.

Norwégiye xongkong komitétining mu'awin re'isi stéwén ziyaritimizni qobul qilghanda bu qétimqi söhbette asasliqi xitayning Uyghurlargha, tibetlerge we xongkongluqlargha séliwatqan zulumi we bu zulumdin qutulushning chariliri hemde Uyghur diyaridiki jaza lagérliri heqqide muzakire qilin'ghanliqini bayan qildi.

15-Yanwar küni yene norwégiye Uyghur komitétida Uyghurlar we norwégiyediki türk teshkilatliri rehberlirining ishtirakida xitayning jaza lagérliri siyasitige qarshi aldimizdiki künlerde élip bérilidighan pa'aliyetler toghriliq söhbet yighini bolup ötken. D u q ijra'iye komitétining mu'awin re'isi semet abla ependi bu heqte bizni bezi melumatlar bilen teminlidi.

Norwégiye Uyghur komitétining re'isi bextiyar ömer ependi bu qétimqi uchrishishning norwégiyediki türk teshkilatliri bilen élip bérilghan tunji qétimliq kölimi zor bir uchrishish bolghanliqini, söhbette xitayning jaza lagérliri siyasitige qarshi öz-ara hemkarliship zadi néme ishlarni qilish lazimliqi toghrisida uzun muzakiriler élip bérilghanliqini tekitlidi.

Norwégiye türk dernekliri fédiratsiyonining bash sékrétari mehmet timen ependimu ziyaritimizni qobul qilip, bu yighin heqqidiki qarashlirini otturigha qoyup ötti. U mundaq dédi: "Biz norwégiyediki türk teshkilatliri Uyghur qérindashlirimiz bilen hemkarliship xitayning sherqiy türkistanda yürgüzüwatqan jaza lagérliri siyasitini norwégiye hökümiti we türkiye hökümitige téximu keng bildürüp, ularni chare-tedbir élishqa zorlash, jaza lagérliri mesilisini norwégiye xelqi hem pütün dunyagha yenimu etrapliq anglitip, xitayning insaniyetke qarshi jinayetlirige nisbeten xelq'araliq bésim peyda qilish üchün némilerni qilishimiz lazimliqini muzakire qilish niyitide bu yerge jem bolduq. Aldimizdiki aylarda biz türk teshkilatliri norwégiyediki Uyghurlar bilen birliship kölimi zor bolghan birqanche qétimliq namayishlarni élip bérishni pilanlawatimiz. Uyghur qérindashlirimizgha qolimizdin kélishiche yardemlerde bolush bizning burchimiz."

Toluq bet