Мәрвинә турсунниң тутқундики аниси вә тағиси һәққидики гуваһлиқи норвегийә таратқулирида диққәт қозғиди

Мухбиримиз меһрибан
2019-05-16
Елхәт
Пикир
Share
Принт
Норвегийәдә магистирлиқ оқуватқан мәрвинәниң турсунниң лагерға қамалған аписи мунәввәр  турсунниң паспорти.
Норвегийәдә магистирлиқ оқуватқан мәрвинәниң турсунниң лагерға қамалған аписи мунәввәр турсунниң паспорти.
Social Media

Бирнәччә күндин буян норвегийә дөләтлик радийоси вә стевангер шәһиридә чиқидиған «стевангер кәчлик гезити» қатарлиқ таратқуларда норвегийәдики уйғурлардин мәрвинә турсунниң аилиси һәққидики хәвәрләр диққәт қозғимақта. Мәзкур хәвәрләрдә мәрвинә турсунниң қарамайдики аписи мунәввәр турсун вә тағиси камил турсунниң 2017-йилиниң ахирида йиғивелиш лагериға қамилип, кейин кесиветилгәнлики баян қилинған.

Нөвәттә норвегийәниң стевангер шәһиридә иқтисад кәспидә магистирлиқ аспирантлиқида оқуватқан мәрвинә турсун 16-май күни радийомиз зияритини қобул қилип, өз аилисидикиләрниң лагерға тутулуш җәряни һәққидә мәлумат бәрди.

У илгири өзиниң бир мәзгил сүкүт қилғанлиқини, әмма йеқинда лагердики аписиниң кесилип түрмигә елип кетилгәнлик хәвирини аңлиғандин кейин қәтий нийәткә келип, таратқуларниң зияритини қобул қилиш қарариға кәлгәнликини билдүрди.

Мәрвинәниң билдүрүшичә, униң вә норвегийәдә олтурушлуқ һаммиси һөрниса турсунниң юртидики башқа уруқ-туғқанлири билән болған алақиси 2017-йилиниң ахиридин башлап үзүлүп қалған. 

Йеқинда мәрвинәниң һаммиси қарамайдики башқа уруқ-туғқанлиридин сүрүштүрүш арқилиқ қарамай 2-завут райони, йәни җәрәнбулақ райони йоруқ мәһәллиси 20-бина 5-өйдә олтурушлуқ қарамай нефитликиниң дәм елишқа чиққан ишчиси мунәввәр турсун (1965-йили 9-айниң 15-күни туғулған) билән майтағдики тағиси камил турсун (1970-йили 8-айниң 12-күни туғулған) һәдә-ини иккийләнниң майтағ түрмисидә икәнликини уққан. Әмма уларға қандақ җинайәт артилғанлиқи вә нәччә йиллиқ кесилгәнлики һәққидики учурларни сүрүштүрүш имканийити болмиған. 

Мәрвинә ханим өзиниң 2017-йили 5-ай мәзгилидә аписи билән үндидарда көрүшкинидә униң тунҗи қетим тәрбийиләш намида бир айлиқ лагерға елип кетилгәнликини уққан. Шу йили 7-айда у аписини йоқлаш үчүн юрти қарамайға берип кәлгән. Әпсуски, 2017-йили 11-ай мәзгилидә даириләр униң аписини чәтәлдики аталмиш «террорчилар» билән алақидә болған дегән җинайәт билән 2-қетим лагерға қамиған.

Мәрвинә ханим йәнә әйни чағда өзиниң вә норвегийәдики һаммисиниң юртидики башқа уруқ-туғқанлириниң бихәтәрликидин әнсиригәнликини, шу сәвәбтин норвегийә уйғур комитети арқилиқ әһвални норвегийә һөкүмәт органлириға мәлум қилиш биләнла чәкләнгәнликини, әмма хәвәрни таратқуларда елан қилиштин еһтият қилғанлиқини әскәртип өтти.

Норвегийә уйғур комитетиниң рәиси бәхтияр өмәр әпәндиму зияритимизни қобул қилип, мәрвинә турсунниң өз вақтида аписи вә тағисиниң әһвалини норвегийә уйғур комитетиға мәлум қилғанлиқини, өзлириниң буни «хитай лагерлириға қамалған уйғур мәһбуслири архипи» ға киргүзгәнликини тилға алди.

У баянида һазирға қәдәр өзлириниң 3000 дин артуқ уйғурниң гуваһлиқ испатлирини топлиған болсиму, әмма испат бәргүчиләрниң тәлипи вә учур билән тәминлигүчиләрниң бихәтәрликни нәзәрдә тутуп, бу испатларни норвегийә һөкүмити, явропа иттипақи вә башқа бир қисим кишилик һоқуқ органлириға йоллиғандин башқа таратқуларға ашкарилимиғанлиқини әскәртти.

Бәхтияр өмәр әпәнди йәнә мәрвинәниң бу қетим дадиллиқ билән оттуриға чиқип, норвегийәдики дөләтлик таратқуларда аписи вә тағисиниң әһвалини аңлитишиниң зор әһмийәткә игә икәнликини, буниң хитай даирилири тәрипидин лагерларға қамалған уйғурларниң әһвалини дуняға аңлитишта вә хәлқара җамаәт бесими пәйда қилишта үнүмлүк рол ойнайдиғанлиқини алаһидә тәкитлиди. 

Зияритимиз ахирида мәрвинә ханим йеқинда йәнә өзиниң норвегийәдики бирқанчә таратқуниң зияритини қобул қилишқа тәйярлиниватқанлиқини билдүрди.

У муһаҗирәттики уйғурларниң хитай лагерлириға қамалған уруқ-туғқанлириниң мәсилисидә сүкүт йолини әмәс, бәлки таратқулар арқилиқ дуняға ашкарилаш йолини тутушини, буниң тутқундики уйғурларниң балдуррақ әркинликкә чиқишида хитайға нисбәтән зор бесим пәйда қилидиғанлиқини билдүрди.

Пикирләр (0)
Share
Толуқ бәт