Yazghuchi nurmuhemmet toxtining lagérdin chiqip bir aydin kéyin hayatidin ayrilghanliqi delillendi

Muxbirimiz shöhret hoshur
2019-06-12
Élxet
Pikir
Share
Print
Ataqliq yazghuchi nurmuhemmet toxti ependi. (Waqti we orni éniq emes)
Ataqliq yazghuchi nurmuhemmet toxti ependi. (Waqti we orni éniq emes)
Perzentliri teminligen

Ataqliq yazghuchi nurmuhemmet toxtining ölüm uchuri ijtima'iy taratqularda keng tarqilip, küchlük ghulghula qozghimaqta. Emma xitay da'iriliri merhumning ölümi heqqidiki uchurlarni jem'iyettin yoshurmaqta.

Ijtima'iy taratqulardiki bezi uchurlarda déyilishiche, ataqliq yazghuchi nurmuhemmet toxti xotendiki bir yighiwélish lagérida jan üzgen. Yene bezi uchurlarda déyilishiche, u éghir késel halette lagérdin a'ilisige qayturulghan we doxturxanida hayatidin ayrilghan. Yene bezi uchurlarda uning öyidin doxturxanigha élip kétiliwatqanda jan üzgenliki qeyt qilin'ghan. Hetta bezi uchurlarda yazghuchining jesiti lagérdin öyige qayturulghanda putidiki kishenning téxi éliwétilmigenliki ilgiri sürülgen.

Hökümet organlirida uzun mezgil xizmet qilghan, Uyghur edebiyatida öchmes iz qaldurghan yazghuchi nurmuhemmet toxtining ölümi heqqide ta bügün'ge qeder Uyghur rayonidiki héch bir axbarat orginida uchur bérilmidi. Muhajirettiki Uyghur közetküchiler mana mushu ehwalgha qarapla merhumning lagérda ölgenliki yaki lagérdin chiqip ölgenlik uchurining toghriliqini perez qilishmaqta.

1949‏-Yili xoten nahiyesining tewekkül yézisida tughulghan yazghuchi nurmuhemmet toxti 1977‏-yili shinjang uniwérsitétini püttürgendin kéyin, ilgiri-kéyin bolup xoten pédagogika aliy téxnikomida oqutquchi we xoten wilayetlik partkomda katip bolup xizmet qilghan. Emma bu organlargha téléfon qilghinimizda ulardin beziliri yazghuchi nurmuhemmet toxtining kimlikidinmu xewersizlikini bayan qilsa, yene beziliri ochuq halda bu heqte uchur bérelmeydighanliqini bayan qildi.

Merhumning terjimihalida déyilishiche, u yene bir mehel shinjang yazghuchilar jem'iyitining kespiy yazghuchisi bolup ishligen. Shunga biz merhumning ölümi heqqide xoten waliy mehkimisining medeniyet tarmaqliridinmu melumat soriduq. Medeniyet yadikarliqliri idarisining qoghdash xadimi özlirige yazghuchi nurmuhemet toxtining ölümi heqqide héchqandaq uchurning bérilmigenlikini éytti.

Melum bolushiche, yazghuchi nurmuhemmet toxtining kanadada yashawatqan zorigül isimlik bir qizi bar bolup, uning newrisi tünügün Uyghurnaz namidiki féysbuk bétide bowisi nurmuhemmet toxtining ölümi heqqide uchur bergen. Uchurda déyilishiche, merhumning kanadadiki qizi we newrisimu bu ölümdin 11 kün kéchikip xewer tapqan. Bu uchurda déyilishiche, merhum 2018‏-yili 11‏-aydin 2019‏-yili 3‏-ayghiche lagérda yatqan.

Melum bolushiche, birqanche yildin béri diyabit késilige giriptar bolghan yazghuchi nurmuhemmet toxti lagérdiki mezgilide 5 aydin artuq dawalinishtin mehrum qalghan. Merhum majalidin pütünley ketkendin kéyin a'ilisige qayturulghan we 5-ayning 31‏-küni hayatidin ayrilghan. Merhumning kanadadiki bu newrisi yene féysbuktiki uchurida xotendiki uruq-tughqanlirining lagérgha solinish xewpi tüpeyli özlirige bowisining ölümi heqqide waqtida uchur bérelmigenliki we uchur yetküzgendimu tepsiliy jeryanlar heqqide toxtalmighanliqini ashkarilighan.

Xoten wilayetlik medeniyet idarisining katipi yazghuchi nurmuhemmet toxtining atalmish "Terbiyelesh merkizi" din qachan qoyup bérilgenliki heqqidiki so'alimizgha bir ay burun dep jawab berdi. Emma u merhumning ölüm sewebi heqqide uchur bérishni ret qildi.

Yuqiriqi uchurlardin mol-hosulluq yazghuchi nurmuhemmet toxtining ötken yilining axirida késel halitide lagérgha ekitilgenliki, késili béqishsiz qélip éghirlashqandin kéyin a'ilisige qayturulghanliqi we lagérdin chiqip bir aydin kéyin hayatidin ayrilghanliqi melum bolmaqta.

Toluq bet