Irandin qayturulghan obulhashim tursunning 15 yilliq késiwétilgenliki we uninggha chétilip 12 kishining jaza ötewatqanliqi ashkarilandi

Washin'gtondin muxbirimiz shöhret hoshur teyyarlidi
2024.02.06
Obulhashim-Tursun-1024 Obulhashim tursun
Obulqasim tursun

Türkiyede yashawatqan muhajir obulqasim tursun, inisi obulhashim tursunning 2018-yili 3-ayda iranning imam humeyni ayrodurumida tutqun qilinip xitaygha qayturuwétilgenlikini inkas qilghanidi. Muxbirimiz obulhashim tursunning yurti yeken nahiyesidiki alaqidar organlargha téléfon qilip, uning 15 yilliq késilgenlikini we uninggha chétilip 12 kishining jaza ötewatqanliqini éniqlidi. Bu heqte pikir bayan qilghan dunya Uyghur qurultiyining qanun ishliri komitéti mudiri memet toxti ependi, iranning xelq'ara ehdinamilerni buzghanliqini eyiblidi we bu ehwalni munasiwetlik xelq'ara organlargha yetküzidighanliqini bildürdi. Töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

 2018-Yili 3-ayning 7-küni irandin qayturuwétilgen obulhashim tursun heqqide, uning türkiyediki akisi obulqasim tursun, aridin ikki yil ötkende, uning qeshqerde türmide ikenliki heqqide gheyriy resmiy bir uchur alghan. Emma, u bu uchurning toghra xataliqi we toghra bolsa jaza mudditining qanchilik ikenliki heqqide melumatqa érishelmigen. Biz obulhashim tursunning yurti bolghan yekenning döngbagh yézisigha téléfon qilip obulhashim tursun heqqide melumat soriduq. Xadimlardin biri, obulhashim tursun heqqidiki so'alimizgha jawaben, bu ehwalning dölet mexpiyetlikige yatidighanliqini eskertti we uning irandin qayturulghanliqini inkar qilmidi. Döngbagh yéziliq edliye ponkiti xadimi obulhashimning nöwettiki ehwali heqqide melumat bérelmigen bolsimu, emma obulhashimning a'ilisini nazaret qilidighan bir mes'ul xadimning alaqe uchurini teminlidi. Bu mes'ul xadim, özining obulhashim tursunning a'ilisini nazaret qilip turidighanliqi we uning 15 yilliq késilip jaza ötewatqanliqidin xewiri barliqini tilgha aldi. J x tarmaqlirining özlirige bu heqte tepsiliy melumat bermigenlikini eskertken bu xadim, obulhashim tursunning ereb birleshme xelipiliki qatarliq sezgür döletlerni ziyaret qilghanliqi üchün jaza ötewatqanliqini ashkarilidi.

 Jaza hökümini 2020-yilining otturiliri obulhashim tursunning a'ilisige özi yetküzüp bergenlikini tilgha alghan bu xadim, hökümnamidin éside qalghanlirigha asasen, obulhashim tursun chet eldiki chéghida uning bilen alaqisi bar dep qaralghan we uning chet elge chiqishigha yardemleshken dep békitilgen abdukérim ömer qatarliq 12 kishiningmu nöwette jazaliniwatqanliqini ashkarilidi.

  Bu ehwal heqqide pikir bayan qilghan dunya Uyghur qurultiyi qanun komitéti mudiri memet toxti ependi, iranning xelq'ara irqiy qirghinchiliqning aldini élish ehdinamisige qol qoyghan turuqluq obulhashim tursunni xitaygha qayturup bériwetkenlikini eyiblidi. Obulhashimning türkiyediki akisi iran elchixana xadimlirining söz arisida uqushmasliq bolghanliqini bildürüp, saxta hésdashliq ipadiligenlikini bildürgenidi. Memet toxti ependi, iranning bu déloda éniq halda xitayning buyruqi boyiche ish tutqanliqini bayan qilip, alaqidar izdinishlerdin kéyin, qurultayning iranning bu qilmishi heqqidimu dawa échish éhtimalliqini tilgha aldi.

Yuqirida irandin qayturulghan obulhashim tursunning 15 yilliq késilgenliki we uninggha chétilip 12 kishining jazalan'ghanliqi heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.