"Sherqiy türkistan ölimalar birliki" ning yighinida Uyghur ölimalirining mes'uliyiti we mejburiyetliri toghrisida muhakime élip bérildi

Ixtiyariy muxbirimiz arslan
2020-01-09
Élxet
Pikir
Share
Print
"Sherqiy türkistan ölimalar birliki" ning yighinidin körünüsh. 2020-Yili 6-yanwar, türkiye.
"Sherqiy türkistan ölimalar birliki" ning yighinidin körünüsh. 2020-Yili 6-yanwar, türkiye.
RFA/Arslan

Merkizi istanbuldiki "Sherqiy türkistan ölimalar birliki" ning 6-qétimliq shura yighini 6-yanwar türkiyening antaliye rayonigha qarashliq alanye shehiride bashlandi. Bu yighin'gha sherqiy türkistan ölimalar birlikige eza bolghan, türkiye, se'udi erebistan, awstraliye, shiwétsiye qatarliq her qaysi döletlerdiki Uyghur ölimalardin 60 tin artuq kishi qatnashti.

Yighin qur'an kerim tilawiti bilen bashlan'ghandin kéyin sherqiy türkistan ölimalar birliki re'isi doktor atawulla shahyari échilish nutqi sözlidi.

Kéyin, yéghin'gha sahibxaniliq qilghan türkiye dini ishlar bashqarmisi qarmiqidiki alanye shehirining muptisi doktor éhsan ilham söz qildi. Alanye muptisi doktor éhsan ilham sözide sherqiy türkistan mesilisining ümmetning mesilisi ikenlikini tekitlidi we "Islam dunyasi sherqiy türkistan dewasigha ige chiqishi kérek", dédi.

Biz bu yighin toghrisida téximu köp melumatqa ige bolush üchün sherqiy türkistan ölimalar birlikining mes'ulliridin abdusalam alim we doktor alimjan bughda bilen söhbet élip barduq.

Doktor alimjan bughda bu yighinni uyushturushtiki meqsitining asasliqi sherqiy türkistan ölimalar birlikining élip bériwatqan xizmetlerni közdin kechürüsh, Uyghur xelqining xitayning zulumigha éghir derijide duch kéliwatqan weziyette ölimalarning mes'uliyiti we mejburiyetliri toghrisida muhakime qilish hem kemchilliklerni tüzitish üchün muzakire élip bérish ikenlikini bildürdi.

Doktor alimjan bughdaning bildürüshiche, sherqiy türkistan ölimalar birlikining bu qétimqi yighinida yene bir yilliq xizmet pilani tüzüp chiqilghan.

Awstraliyedin kelgen abdusalam alim ependi bu yighinda otturigha qoyulghan muhim nuqtilar toghrisida toxtilip, sherqiy türkistan ölimalirining Uyghurlarning hazirqi weziyiti toghrisida bash tartmay qilishqa tégishlik mes'uliyetliri we mejburiyetliri toghrisida muzakire élip bérilidighanliqini tekitlidi. U yene özlirining Uyghurlar mesilisini xelq'ara sehnige, bolupmu islam dunyasigha élip chiqishta qilishqa tégishlik wezipiler toghrisida muzakire élip bérilghanliqinimu bildürdi.

Abdusalam alimning bildürüshiche, bu qétimqi sherqiy türkistan ölimalar birlikining yighinida, ölimalarning 2020-yilliq xizmet pilanliri tüzüp chiqilghan.

Yighinning ikkinchi künide 5-qétimliq shura yéghinida élin'ghan qararlarning emeliylishishi heqqide doklat bérildi, kéyin, sherqiy türkistan ölimalar birlikige yéngidin ezaliqqa qobul qilin'ghan bir qisim ölimalar özlirini tonushturup ötti hemde özlirining eza bolushtiki meqsetlirini bayan qildi.

Bu yighin 6-yanwardin 9-yanwarghiche 3 kün dawam qilidighan bolup yighin hazir dawam qilmaqta iken.

Sherqiy türkistan ölimalar birlikining bayanatchisi shundaqla awstraliyediki wekili abdusalam alim, bu yighinda asasliqi ölimalarning mes'uliyiti we sherqiy türkistan ölimalar birlikining kelgüside élip barmaqchi bolghan xizmet pilanliri toghrisida muzakire élip bériliwatqanliqini tekitlidi.

Igilinishiche, sherqiy türkistan ölimalar birlikining yighinigha qatnashqan türkiye dini ishlar bashqarmisi alanye muptisi doktor éhsan ilham ependi Uyghurlargha yéqindin köngül bölüp kéliwatqan kishi bolup, u meschitlerde bayan qilghan xutbiliride jama'et ammisigha xitab qilip, sherqiy türkistandiki qérindashlarni qollashqa dewet qilidiken we ulargha du'a qilidiken.

Doktor éhsan ilham buningdin ilgiriki bir pa'aliyette jüme namizidin chiqishida meschit aldidiki meydan'gha jama'et ammisi bilen topliship Uyghurlar üchün mexsus du'a qilghanidi.

Toluq bet