Йәһуди оқуғучилар тәшкилати явропаниң нурғун шәһәрлиридә бейҗиң қишлиқ олимпикигә қарши мәшәл йәткүзүш паалийити өткүзгән

Мухбиримиз әркин
2021-10-26
Share
Йәһуди оқуғучилар тәшкилати явропаниң нурғун шәһәрлиридә бейҗиң қишлиқ олимпикигә қарши мәшәл йәткүзүш паалийити өткүзгән Явропа йәһудий оқуғучилар уюшмиси өткүзгән “башқа бир мәшәл йәткүзүш” паалийитидә йәһудий яшниң башқа мәшәлни көтүрүп кетиватқан көрүнүш. 2021-Йили 24-өктәбир, париж.
Social Media

Явропа йәһуди оқуғучилар уюшмиси 24-өктәбир исраилийә вә явропаниң нурғун шәһәрлиридә “башқа бир мәшәл йәткүзүш” паалийити өткүзүп, хәлқара җәмийәтни “ирқий қирғинчилиқ олимпики” дәп аталған хитайниң саһипханлиқидики 2022-йиллиқ бейҗиң қишлиқ олимпикини байқут қилишқа чақирған. Мәлум болушичә, бу паалийәт уйғур ирқий қирғинчилиқиға қарши “әмди һәргиз қайтиланмисун” һәрикитиниң орунлаштурушидики “хәлқара һәрикәт күни” ниң парчиси сүпитидә бир туташ пиланланған бир хил паалийәт шәкли икән.

24-Өктәбир күни явропа йәһуди оқуғучилар уюшмисиниң әзалири бейҗиң қишлиқ олимпикиниң мәшелигә қарши “башқа бир мәшәл” көтүрүп, исраилийәниң тел-авиф, явропаниң лондон, париж, берлин, мюнхен, бонн, берюссел, җәнвә, вена қатарлиқ шәһәрлириниң кочилирида күч улап йүгүргән. Лондондики мәшәл йәткүзүш паалийити әнгилийә парламентиниң алдида ахрлашқан. Йәһуди очуғучилар уюшмиси елан қилған бу һәқтики баянатида, бу паалийәт арқилиқ “олимпикни қайтурувелиш, хитайниң уйғур, тибәт вә хоңкоңлиқларға қилған системилиқ зиянкәшликини ечип беришни көзлигәнлики” тәкитләнгән.

явропа йәһудий оқуғучилар уюшмиси өткүзгән “башқа бир мәшәл йәткүзүш” паалийитидә башқа мәшәлгә әгишип маңған яшлар. 2021-Йили 24-өктәбир, париж.
Явропа йәһудий оқуғучилар уюшмиси өткүзгән “башқа бир мәшәл йәткүзүш” паалийитидә башқа мәшәлгә әгишип маңған яшлар. 2021-Йили 24-өктәбир, париж.

“әмди һәргиз қайтиланмисун” һәркитиниң паалийәтчиси, явропа йәһуди оқуғучилар иттипақиниң әнгилийәдә турушлуқ муавин рәиси олаф стандо (Olaf Stando) ниң ейтишичә, “хитайниң һәшәмәтлик олимпик мусабиқисиниң қараңғу көләңгүсидә шу тапта садир қиливатқан инсанийәткә қарши җинайитини йепишиқа йол қоюлмаслиқи керәк” икән.

‍Олаф стандо 26-өктәбир бу һәқтики зияритимизни қилип, бу паалийәт арқилиқ дуняға шу икки сигнални бәрмәкчи болғанлиқини билдүрди.

Олаф стандо мундақ дәйду: “бәрмәкчи болған сигналимиз наһайити ениқ. Бәрмәкчи болған 1-сгналимиз 2022-йиллиқ қишлиқ олимпикни байқут қилиш. Биз уни ‛ирқий қирғинчилиқ олимпики‚ дәп атаймиз. Хитай хәлқара җамаәт алдида ирқий қирғинчилиқ қиливатиду. Хоңкоңлиқларни, тибәтләрни җәнубий моңғулларни җазалаватиду. Бизниң дәйдиғинимиз, хитайниң ирқий қирғинчилиқни пәрдазлишиға йол қоймайла қалмай, бәлки униң олимпикни пайдилинип қилмишини улуғварлаштуруши, буни хәлқара сәһинидә қанунлаштурушиға йол қоймаслиқтур.”

Олаф стандониң ейтишичә, уларниң бәрмәкчи болған 2-сигнали йәһуди яшлириға чоң қирғинчилиқни хатирлитиш, уйғур, тибәт вә хоңкоңлиқлар билән иттипақлишип, хитайниң қилмишиға ‛яқ! ‚ дейиш икән.

Олаф стандо мундақ деди: “бәрмәкчи болған 2-сигналимиз ‍охшимиған гуруппиларни иттипақлаштуруп, ирқий қирғинчилиқ ‛һәргиз қайтиланмисун‚ дейиш ‍үчүндур. Бу паалийәтни биз йәһуди яшлар орунлаштурдуқ. Чүнки, биз йәһуди яшлири чоң қирғинчилиқни бивастә бешимиздин кәчүрүп бақмидуқ. Бирақ бизниң әҗдатлиримиз чоң қирғинчилиқни бешидин кәчүрди, нәччә он йилларғичә җазалашқа учриди. Шуңа биз уйғурлар, тибәтләр, хоңкоңлиқлар билән иттипақлишип, хитай бу һәрикитигә ‛яқ‚ дегән синални бәрмәкчи болдуқ,” деди.

Йәһуди оқуғучилириниң мәзкур паалийити хәлқара олимпик комитети өткән һәптә гретсийәниң олимпис теғида олимпик мәшили йеқиш мурасими өткүзүп, мәшәлни хитайниң 2022-йиллиқ бейҗиң қишлиқ олимпик һәйетигә өткүзүп беришиниң арқисидинла ‍өткүзүлгән. Ахбарат йиғинида хәлқара олимпик комитети олимпик мәшилини уйғурларға қарита “актип ирқий қирғинчилиқ қиливатқан бир дөләткә өткүзүп бериш” билән әйибләнгән иди.

Лондондики “башқа бир мәшәл йәткүзүш” паалийитигә қатнашқан уйғур паалийәтчи, д у қ ниң әнглийәдики вәкили рәһимә маһмут ханим 26-‍өктәбир зияритимизни қобул қилип, йәһуди яшлириниң бейҗиң қишлиқ олимпикини 1936-йилдики берлин олимпикигә ‍охшитип бу паалийәтни өткүзгәнликини билдүрди. Униң ейтишичә, улар дуня өз вақтида натсистларни “қирғинчилиқ қиливатиду” дәп берлин олимпикигә қарши турған болса, “бәлким кейинки қирғинчилиқни тохтитип қелиш имканийити болған болатти,” дәп қарайдикән.

Рәһимә мәһмут йәнә бу паалийәтниң наһайити үнүмлүк болғанлиқи, униң яшларни уйғурларни қутқузушқа җәлп қилиш, болупму исраилийә вә австрийәдәк уйғур мәсилиси “анчә бәк актип болмиған” дөләтләрдә яшларни қозғаш, улар арқилиқ бу дөләтләрниң сияситигә тәсир қилип, хитайға тутқан сияситини өзгәртишигә пайдилиқ болди, дәп қарайдиғанлиқини билдүрди.

Хитай бу қетим қишлиқ олимпик мәшилини 2008-йилидики бейҗиң язлиқ олимпик мусабиқисидә қилғандәк һәр қайси дөләтләрдә айландуруш пиланидин ваз күчкән. Хитайниң 2008-йилидики олимпик мәшилини йәткүзүш паалийити бәзи дөләтләрдә тибәт вә уйғурларниң қаттиқ қаршилиқиға учриған болсиму, бирақ әйни вақитта униң кишилик һоқуқ хатириси һазирқидәк ундақ кәң көләмлик ләнәткә қалмиған иди.

Олаф стандо, явропа дөләтлиридики наразилиқ һәрикәтлириниң хитайни қорқутқанлиқи, шуңа униң қишлиқ олимпик мәшилини күч улап йәткүзүшкә җүрәт қилалмиғанлиқини билдүрди. Униң ейтишичә, бейҗиң қишлиқ олимпикигә қарши турушниң әң үнүмлүк йоли уни дипломатик байқут қилиш икән.

У мунддқ дәйду: “мениң пәризимчә, хитай наразилиқ һәрикәтлиридин қорқти. Бизниңкидәк наразилиқ һәрикәтләрдин, ‍олимпийәдә болғандәк наразилиқ һәрикәтлиридин қорқти. Мана бу униң олимпик мәшилини явропада йәткүзүшкә җүрәт қилалмаслиқидики сәвәб. Әгәр у шундақ қилған болса, қаттиқ қаршилиққа учрайтти. Хәлқара олимпик комитетиға кәлсәк, униң кишилик һоқуқ тәшкилати әмәслики, һоқуқиниң чәклик икәнликини чүшинимән. Бирақ хәлқара җамаәт қилалайдиған әң үнүмлүк чарә дөләтләрниң уни дипломатик байқут қилишидур. Бизниң парламентимиз кишилик һоқуқни, ирқий қирғинчилиқ болғанлиқини сөзлиди. Бирақ улар һәрикәт қилиши, униңға әмәлдарларни вә министирларни әвәтмәслики, униңдин пайда алмаслиқи керәк.”

Явропа йәһуди оқуғучилар уюшмисиниң баянатида тәкитлишичә, хәлқара җәмийәт хитайниң кишилик һоқуқ дәпсәндичиликини нормаллаштурушиға йол қоймаслиқи керәк икән.

Австрийә йәһуди оқуғучилар ‍уюшмисиниң қош рәиси саши түркоф мундақ дигән: “хитай дөлитиниң ахбарат вә дипломатик машиниси дуняниң башқа җайлирида пәрвасизлиққа актип ярдәм берип, уйғур ирқий қирғинчилиқини ақлимақчи болуватиду. Бирақ дуня буни көзәтмәктә. Биз бейҗиң олимпик тәнһәрикәт мусабиқисиға күн санаватқан бир пәйттә, ‛һәргиз қайтиланмисун‚ дегән сөз өз мәнисини тепиши лазим. Хитайниң кишилик һоқуқ дәпсәндичиликини нормаллаштурушиға йол қоюлмаслиқи керәк. Хәлқара җәмийәтниң ойғиниш вақти кәлди. Биз ениқ вә очуқ бир чақириқ билән мәшәл йәткүзүш паалийитимизни өткүзүватимиз: әмди дипломатик байқут қилидиған пәйт кәлди!”

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт