Istanbuldiki Uyghur yashliri béyjing olimpikige qarshi 5000 métirgha yügürüsh musabiqisi ötküzdi

Ixtiyariy muxbirimiz arslan
2022-02-14
Share
Istanbuldiki Uyghur yashliri béyjing olimpikige qarshi 5000 métirgha yügürüsh musabiqisi ötküzdi Uyghur yashliri 5000 métirgha yügürüsh musabiqisi ötküzüp, béyjing olimpikige qarshiliqini bildürdi. 2022-Yili 12-féwral, istanbul, türkiye.
RFA/Arslan

12-Féwral shenbe küni istanbuldiki Uyghur yashliri 5000 métirgha yügürüsh musabiqisi ötküzdi. Mezkur musabiqini sherqiy türkistan tenterbiye we tereqqiyat jem'iyiti uyushturghan bolup, xelq'ara sherqiy türkistan teshkilatlar birlikimu musabiqeni qollap-quwwetlidi.

Sherqiy türkistan tenterbiye we tereqqiyat jem'iyitining re'isi tahir kökbayraqning bildürüshiche, bu musabiqining meqsiti 2022-béyjing qishliq olimpik tenheriket musabiqisini bayqut qilish we xitayning Uyghurlar üstidin yürgüziwatqan irqiy qirghinchiliqigha qarshi turushtin ibaret iken.

Uyghur yashlirining béyjing olimpikige qarshi ötküzgen 5000 métirgha yügürüsh musabiqiside xelq'ara sherqiy türksitan teshkilatlar birlikining re'isi hidayetulla oghuzxan sözlimekte. 2022-Yili 12-féwral, istanbul, türkiye.
Uyghur yashlirining béyjing olimpikige qarshi ötküzgen 5000 métirgha yügürüsh musabiqiside xelq'ara sherqiy türksitan teshkilatlar birlikining re'isi hidayetulla oghuzxan sözlimekte. 2022-Yili 12-féwral, istanbul, türkiye.
RFA/Arslan

Bu qétimliq yügürüsh musabiqisining échilish murasimida sherqiy türkistan tenterbiye we tereqqiyat jem'iyitining re'isi tahir kökbayraq söz qilip, mundaq dédi: “Biz xitayning wetinimizde bir tereptin irqiy qirghinchiliq qilip, yene bir tereptin uni yoshurush we dunyaning diqqitini bashqa terepke burash üchün olimipik musabiqisi ötküziwatqanliqigha qarshi turush, uni bayqut qilish, shundaqla buninggha naraziliqimizni bildürüsh üchün bu pa'aliyetni uyushturduq.”

Bu qétimliq yügürüsh musabiqisige “Istiqlal médali yügürüsh musabiqisi” dep nam bérilgen bolup, chong-kichik 30 dek Uyghur yash musabiqigha qatnashti. Chong-kichik mahirlar herqaysiy teshkilat mes'olliri we meydandiki ata-ana, uruq-tughqanlirining medet bérishi bilen 5000 métirliq musapini yügürüp ghelibilik tamamlidi.

Uyghur yashliri 5000 métirgha yügürüsh musabiqisi ötküzüp, béyjing olimpikige qarshiliqini bildürdi. 2022-Yili 12-féwral, istanbul, türkiye.
Uyghur yashliri 5000 métirgha yügürüsh musabiqisi ötküzüp, béyjing olimpikige qarshiliqini bildürdi. 2022-Yili 12-féwral, istanbul, türkiye.
RFA/Arslan

Yügürüsh musabiqisi bashlinishtin ilgiri söz qilghan xelq'ara sherqiy türksitan teshkilatlar birlikining re'isi hidayetullah oghuzxan, yashlarning bu qétimliq yügürüsh musabiqisi arqiliq sherqiy türkistan xelqining erkinlik we musteqilliq iradisni namayan qilghanliqini bildürdi.

U mundaq dédi: “Istiqlal üchün uyushturulghan bu qétimliq yügürüsh musabiqisi bizge istiqlaldin ibaret nishan'gha élip baridighan bir rohni nanayan qildi. Bu qétimliq yügürüshning netijisi mahirlarni istiqlal médaligha érishturse, omumiyyüzlük heriket qiliwatqan mujadilimizmu bizni sherqiy türksitanning azadliqi we istiqlalini qolgha keltürüshke bashlap mangidu. Biz mushu niyet we arzu bilen ishimizni bashlaymiz, hemmeylen'ge ghelbe we utuq tileymen!”

Uyghur yashlirining béyjing olimpikige qarshi ötküzgen 5000 métirgha yügürüsh musabiqisidin kéyin xatire süret. 2022-Yili 12-féwral, istanbul, türkiye.
Uyghur yashlirining béyjing olimpikige qarshi ötküzgen 5000 métirgha yügürüsh musabiqisidin kéyin xatire süret. 2022-Yili 12-féwral, istanbul, türkiye.
RFA/Arslan

Tahir kökbayraqning bildürüshiche, musabiqide netijige érishken muhemmed ötkür, abdullah idiqut, abdurahman idiqut, abdullah arif'oghli, hemze niyaz, abduraxman sidiq'oghli, abdulhemid kuchar, muhemmed ömer, abduqahar türk'oghli, eli qaraqash qatarliq aldinqi 10 mahirgha longqa, médal qatarliq maddiy buyumlar we neq pul mukapat bérilgen. Musabiqigha qatniship aldinqi derijige kirelmigen bashqa barliq yashlargha kök hilal ay insaniy yardem jem'iyiti teripidin neq pul bilen righbetlendürüsh mukapati tarqitip bérilgen.

Biz bu qétimliq yügürüsh musabiqiside mukapatqa érishken Uyghur yash mahir muhemmed ömerni ziyaret qilduq. U özining béyjing qishliq olimpik tenheriket musabiqisini bayqut qilish we xitayning Uyghurlar üstidin yürgüziwatqan irqiy qirghinchiliqigha qarshi turush üchün bu qétimliq yügürüsh musabiqisigha qatnashqanliqini, bu arqiliq özining bir kishilik mes'uliyitini ada qilalighanliqidin tolimu xursen ikenlikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet