Ömer bék'ali bérlinda Uyghur diyaridiki jaza lagérliri toghriliq melumat berdi

D u q ning orunlashturushi bilen ömer bék'ali gérmaniye paytexti bérlinda Uyghur diyaridiki jaza lagérliri toghriliq melumat bermekte. 2019-Yili 11-mart.

Ömer bék'ali ependining Uyghur diyaridiki jaza lagérliri toghriliq melumatidin kéyin, d u q re'isi dolqun eysa ependi muxbirlarning so'allirigha jawab bermekte. 2019-Yili 11-mart, bérlin, gérmaniye.

Dunya Uyghur qurultiyining orunlashturushi bilen ömer bék'ali gérmaniye paytexti bérlinda Uyghur diyaridiki jaza lagérliri toghriliq melumat berdi.

Xitayning jaza lagérida 7 ay yétip chiqqan, hazir türkiyede yashawatqan qazaqistan puqrasi ömer bék'ali d u q re'isi dolqun eysa ependi bashchiliqidiki qurultay rehberlirining hemrahliqida 10-mart kechte bérlin'gha yétip kelgen.

Ömer bék'ali tehdit astidiki xelqler teshkilatining teklipige bina'en 11-mart küni gérmaniye paytexti bérlinda axbarat yighini ötküzüp, xitayning jaza lagérliri mesilisi boyiche muxbirlarning so'allirigha jawab bergen.

D u q re'isi dolqun eysa ependi bu yighinda muxbirlar we yighin ehlini Uyghur diyarining nöwettiki weziyiti hemde jaza lagérliri toghrisida eng yéngi melumatlar bilen teminligen.

Bu yighin'gha muxbirlardin sirt margaréta bawzé qatarliq gérmaniye parlaméntining ezalirimu qatniship, xitayning kishilik hoquq depsendichiliki we Uyghur diyaridiki jaza lagérlirini eyiblep nutuq sözligen. U sözide gérmaniye hökümitining, yawropa ittipaqining we gherb démokratik döletlirining jaza lagérliri mesilisige jiddiy diqqet qiliwatqanliqini bildürgen.

Tehdit astidiki xelqler teshkilatining diréktori ulrik déliyus ependi bu yighin'gha riyasetchilik qilghan. U muxbirlargha eger sherqiy türkistandiki kishilik hoquq depsendichiliki toghriliq bir nerse bilishni xalisa, xitayning jaza lagérlirida yétip chiqqan hayat shahit ömer bék'alidin sorisa bolidighanliqini qeyt qilghan.

Muxbirlar jaza lagérliri toghrisida ömer bék'alidin her türlük so'allarni sorighan. Ömer bék'ali muxbirlarning so'allirigha jawab bérish bilen birge jaza lagérliridiki öz kechmishliri hemde körgen-bilgenliri toghriliq etrapliq melumatlar bergen.

Bérlindin ziyaritimizni qobul qilghan dolqun eysa ependi bügünki bu yighinning nahayiti muweppeqiyetlik we netijilik bolghanliqini eskertti. Ömer bék'ali bolsa gérmaniye axbarat wasitiliri aldida özining sherqiy türkistandiki zulumni anglitish, bolupmu jaza lagérliridiki insan qélipidin chiqqan wehshiyliklerni gérmaniye taratqulirigha anglitish pursitige érishkenlikidin köp memnun bolghanliqini bayan qildi. U yene bizni yawropadiki öz pa'aliyetliri toghrisida bundin kéyinmu dawamliq melumatlar bilen teminlep turushni xalaydighanliqini bildürdi.

D u q rehberlirining éytishiche, ömer bék'ali aldimizdiki künlerde yene d u q ning orunlashturushi bilen b d t da uyushturulghan türlük yighinlarda jaza lagérliri toghriliq guwahliq béridiken.