Roshen'gül tashmemet: érim ömerbek azad boldi emma inim we oghlum a'ilisi boyiche lagérgha qamaqliq

Muxbirimiz méhriban
2019-05-28
Élxet
Pikir
Share
Print
4 Ayliq ayrilishtin kéyin ömer bék'ali a'ilisi bilen qayta istanbul jem bolghandiki xushalliq keypiyati. 2018-Yili 19-séntebir, türkiye.
4 Ayliq ayrilishtin kéyin ömer bék'ali a'ilisi bilen qayta istanbul jem bolghandiki xushalliq keypiyati. 2018-Yili 19-séntebir, türkiye.
RFA/Gulchehre

Lager shahiti ömer békelining ayali roshen'gül tashmemetning oghli we inisi a'ilisi boyiche lagérlargha qamaqliq iken.

Xitay hökümitining lagérlirining ichki ehwalini dunyagha ashkarilighan pa'aliyetchi ömerbek élining ayali roshen'gül xanimning bildürüshiche, qazaqistan puqrasi bolghan éri ömer bek'eli 2017-yili lagérgha qamalghandin kéyin uzun mezgillik sürüshtürüsh netijiside 2018-yili lagérdin qoyup bérilip qazaqistan'gha qayturulghan bolsimu, emma ömer bék'eli bilen oxshash mezgilde tutqun qilin'ghan oghli éli tashmumet we inisi shirmuhuhemmet a'ilisi boyiche ikki yildin buyan lagérlargha qamaqliq iken, shuningdek uning ghuljida béqimsiz qalghan yashan'ghan anisining ehwalimu melum emes iken. Ömer békeli ependimu ziyaritimizni qobul qilip, "Bu a'ilining béshigha kelgen éghir qismetler pütkül sherqiy türkistan xelqining béshigha kelgen ortaq paji'e" dep tekitlidi.

27-May radiyomiz ziyaritini qobul qilghan roshen'gül xanimning bayanliridin melum bolushiche, 2017-yil 4-ay mezgilide u xitay da'iriliri teripidin lagérgha qamalghan éri ömerbek élining ehwalini sürüshtürgen mezgilde yurti ghulja sherhidiki anisi patigül emetke téléfon qilish arqiliq, 24 yashliq oghli éli tashmumet kélini selime, inisi shirmuhemmet tashmemet ayali abide qatarliqlarning a'ile boyiche baliliri bilen lagérgha élip kétilgenlik xewirini alghan.

Roshen'gül xanimning bildürüshiche, eyni chaghda oghli élining 4 yérim yashliq qizi sumeyye, 2 yashliq oghli abdullamu da'iriler teripidin élip kétilgen bolup, ikki yildin buyan roshen'gül xanim sürüshtürgen bolsimu ikki newrisining dérikini alalmighan.

Roshen'gül xanimning anisining 2017-yili 4-ayning axiri uninggha bildürüshiche, inisi shirmuhemmetning üch balisimu eyyni chaghda ata-anisi bilen birlikte tutqun qilinip lagérgha qamalghan. Eyni chaghda ularning chong qizi xediche 18 yashta, oghli xalit 16 yashta, kichik oghli mujahit 14 yashta iken.

Roshen'gül xanimning bildürüshiche, 2017-yili 4-aydin kéyin roshen'gül xanimning ghuljidiki anisi patigül emet bilen bolghan alaqisi üzülüp qalghan. Ilgiri inisi shirmuhemmet we oghli élining béqishida bolghan 70 yashlargha kirip qalghan anisining nöwette béqimsiz qalghan ehwali roshen'gül xanimni eng ensiritiwatqan we azablaydighan ehwallarning biri iken.

Bügün ömerbek éli ependimu ziyaritimizni qobul qilip, özining pichandiki a'ilisi we ayali roshen'gülning ghuljidiki a'ilisining béshigha kelgen éghir qismetlerning pütkül sherqiy türkistan xelqining béshigha kelgen ortaq paji'e" ikenlikini tekitlidi.

Ömerbek élining bildürüshiche, u 2018-yili xitayning lagiridin azad bolup, qazaqistan'gha kelgendin kéyin, xitayning lagérlirining ichki ehwalini dunyagha ashkarilighanliqi üchün, xitay da'irilirining biwasite tehditi we öch élishigha uchrighan.

Da'iriler uning ayali roshen'gülning ghuljidiki oghli éli tashmuhemmet we inisi shirmuhemmetlerni a'ile boyiche lagérgha qamighandin bashqa ömerbek élining pichandiki ata-anisi we qérindashlirigha ziyankeshlik qilishni toxtatmighan.

Uning bildürüshiche, bultur yeni 2018-yili9-ayning 18-küni qazaqistandin ayali roshen'gül we balilirini türkiyege élip kélish sepiride, xitay hökümitining yalghan melumati seweblik ayali roshen'gül istanbul ayroportida 24 sa'et tosup qélin'ghan. Shu mezgilde xitay saqchiliri uninggha tehdit télifoni qilip, lagirlar ehwalini dawamliq ashkarilashni toxtatmisa öch alidighanliqini éytqan. Bir aydin kéyin yeni bultur 10-ay mezgilide pichandiki dadisi éli ebubekrining lagirda ölgenlik xewirini anglighan. Shundin buyan ömerbek éli pichandiki anisi aminixan sadiq, qérindashliridin abduraxman ebubekri, inisi osman ebubekri, singilliridin rizwan'gül, adile qatarliqlarning ehwalidin xewer alalmighan.

Yuqiriqi awaz ulinishidin söhbetning tepsilatini anglaysiler.

Toluq bet