Ömer Uyghur wexpi: “Kanadadin kelgen yardemni pakistandiki Uyghurlargha tarqattuq”

• Muxbirimiz méhriban
  2020-04-01

Pakistandiki Uyghur pa'aliyetchiliridin ömer Uyghur ependi 1-aprél küni radiyomiz Uyghur bölümining ziyaritini qobul qilip, pakistandiki “Ömer Uyghur wexpi” ning yéqinda kanadaning wankowér shehiridiki ömer dawutning namida ewetilgen yardem pulini tapshuruwalghanliqini bildürdi.

Ömer ependining bildürüshiche, “Ömer Uyghur wexpi” 31-mart küni bu yardem puligha un, yagh, gürüch qatarliq asasiy yémekliklerni élip, korona wirusi yuqumi mezgilide iqtisadiy qiyinchiliqta qalghan rawilpindidiki éhtiyajliq Uyghur a'ililirige tarqitip bergen.

Ömer Uyghur ependining bildürüshiche, korona wirusi yuqumi mezgilide pakistan hökümiti yuqumdin saqlinish üchün karantin tedbirlirini yolgha qoyghan bolsimu, emma hökümet tereptin puqralargha iqtisadiy jehettin yardem bérilidighan emeliy tedbirler téxi resmiy yolgha qoyulmighan. Bu sewebtin pakistanda qiyinchiliqqa uchrighan ahalilerge ammiwi jem'iyetler yardem qilidighan weziyet shekillen'gen. Shunga ömer Uyghur wexpi dunya Uyghur qurultiyi qatarliq teshkilatlar we dunyaning herqaysi jayliridiki Uyghurlargha iqtisadiy jehettin yardem muraji'iti yollighan iken.

Biz ömer Uyghur ependi teminligen téléfon uchuri boyiche kanadaning wankowér shehiridiki ömer dawut ependi bilen alaqileshtuq.

Ziyaritimizni qobul qilghan ömer dawut ependi pakistandiki “Ömer Uyghur wexpi” élan qilghan iqtisadiy jehettin yardem muraji'itini tapshuruwalghandin kéyin wankowérdiki kanada sherqiy türkistan jem'iyitige eza Uyghurlar teripidin yighilghan 1300 kanada dolliri yardem pulini öz namida ewetip bergenlikini bildürdi.

Ömer dawut ependining bildürüshiche, u we kanadaning wankowér shehiridiki Uyghurlar bir yérim yildin buyan pakistandiki Uyghurlargha iqtisadiy jehettin birqanche qétim yardemde bolghan iken. U yene bu qétimqi korona wirusi yuqumi mezgilide néme üchün pakistandiki Uyghurlargha i'ane toplishining sewebi heqqidimu toxtaldi.

Uning bildürüshiche, gerche türkiye we ottura asiyadiki Uyghurlar olturaqlashqan döletlerdimu iqtisadiy jehettin éhtiyajliq a'ililer bar bolsimu, emma ularning alaqe da'irisi pakistandiki Uyghurlargha qarighanda kengri bolghini üchün bu döletlerdiki Uyghurlarning yardemge érishish imkaniyiti pakistandiki Uyghur jama'itige qarighanda kengri iken. Emma pakistan hökümitining xitay bilen bolghan alaqisi we pakistandiki Uyghurlarning til jehettiki qiyinchiliqi qatarliq sewebler tüpeylidin Uyghur teshkilatliri we Uyghur jama'iti bilen alaqiliship yardemge érishish pursiti bekla az iken.

Melum bolushiche, pakistanning rawilpindi, gilgit qatarliq jaylirida yashawatqan Uyghurlarning zor köp qismi yekke tijaret we réstoran mulazimet kespi qatarliqlar bilen shughullinip kündilik turmushini qamdaydiken. “Ömer Uyghur wexpi” qurulghan yéqinqi birqanche yildin buyan, “Ömer Uyghur wexpi” we “Dunya Uyghur qurultiyi” qatarliq Uyghur teshkilatlirining teshebbusi bilen dunyaning herqaysi jayliridiki Uyghurlar pakistandiki iqtisadiy qiyinchiliqi bar Uyghurlargha yardemde bolup kelgen. Bolupmu 2020-yilning béshida xitaydin tarqilip pütkül yer shari xaraktérlik yuqum apitige aylan'ghan korona wirusi yuqumi mezgilide pakistandiki Uyghurlar korona wirusi yuqumidin bashqa iqtisadiy jehettinmu éghir qiyinchiliqta qalghan iken.

Xelq'ara taratqular xewiridin melum bolushiche, 2020-yilning béshida xitaydin tarqalghan krona wirusi pütkül yer shari boyiche éghir yuqumgha aylan'ghan mezgilde, iqtisadiy jehette xitaygha tayinip qalghan hetta siyasiy jehettimu xitay hökümiti bilen yéqindin hemkarliship kéliwatqan pakistan hökümiti krona wirusi yuqumi we iqtisadiy jehettin kelgen éghir talapetke uchrighan.